Yishima 24 - MUKANDA USANDU WA ZAMBI 1975

¹ Kanda uvwila ukwa atu api. Kanda uzanga kutwama no.

² Mumu mbunge jo kujakunyonga kwonwona; mivumbo yo kuyakuhanjika uhuka.

³ Kakutungisa zuwo ni mana; kakulikolesa ni malinjekela.

⁴ Ku yinyingi kakuzalisa yipatulo yalio ni upite upema wa ndando yinene.

⁵ Mukwa mana katakama; mukwa yinyingi kakuliwezela ndundo.

⁶ Mumu ku yiyulo ya mana mukasa jita ye; alioze mumu ku wunji wa akwa yiyulo kwatwama kuwaha.

⁷ Mana asuha naye hali chihepuke; keshi kupakula kanwe lienyi mu chota.

⁸ Yoze mataka kulinga yuma yipi, atu mamuluka ngwo, Chihuki.

⁹ Nyonga lia uhepuke kuliapwa shili; mukwa kulenya iye chizelwokeso kuli atu.

¹⁰ Nyi mulezumuka mu tangwa lia lamba, tachi je jikepe.

¹¹ Pulula waze anaatwala ku kufwa; lamwina waze anambe kwashiha.

¹² Chipwe muamba ngwe, Kutwachinyingikine, te mwe mukwa kupezalisa mbunge kachimwene? Mukwa kufunga mwono we kachinyingikine nyi? Te kechi kwononona mutu mweswe nikulita ni milimo yenyi?

¹³ Mwanami liako wuchi mumu unayeme; liako chishila cha wuchi chinayeme mu kanwa lie.

¹⁴ Chocho munyingika mana chize apwa mu mbunge ye. Nyi hiwaawana mba muopwa ni kwononona, ni kutalatala che kuchichi kuhwa.

¹⁵ Ena chingulungulu kanda ujikinyina zuwo lia mukwa ululi; kanda upupa muma mwenyi mwa kuhwimina.

¹⁶ Mumu mukwa ululi makalimbuka yisuho shimbiali hindu makatuka nawa; alioze yingulungulu kakwanunguna mu lamba.

¹⁷ Kanda uwahilila ha kulimbuka cha mukwa kole ye; mbunge ye kanda yiwaha muze mamununguna,

¹⁸ kuchina hanji Yehova machimona mba mevwa kupiha akatewulule utenu wenyi kuli iye.

¹⁹ Kanda ulifwita mumu hali akwa kulinga yipi; kanda uvwila ukwa yingulungulu,

²⁰ mumu mutu mupi kechi kupwa ni kwononona; makajima ndeya ya chingulungulu.

²¹ Mwanami, vwila woma Yehova ni mwe mwanangana; kanda uliendela ni waze akuzanga kwalumiona yuma,

²² mumu lamba lio mulikasoloka susumuku. Iya mahasa kunyingika chize monwona eswe aali?

²³ Yino nawa yambo ya mukwa mana. Kupwa ni katonde ha kupatula, kuchapemene.

²⁴ Mweswe mamba kuli chingulungulu ngwenyi, Uli mukwa ululi, atu mamutuka ni mavungu mamuvwila lwaji.

²⁵ Alioze mazanga mweswe mamwamba; makapwa ni chiwape chipema.

²⁶ Yoze mahana kumbululo lipema chapwa ngwe mbeju anahana ha mivumbo.

²⁷ Lulika milimo ye ya haze; lilulikila munda we mba kulutwe mutunga zuwo lie.

²⁸ Kanda upwa chela wa kuhisa mukwenu chitela chakuhi; kanda wonga ni mivumbo ye.

²⁹ Kanda wamba ngwe, Chize iye hangulinga, ni yami mungumulingacho, mungufweta mutu nikulita ni yitanga yenyi.

³⁰ Napalikile ku wande wa chileya; napalikile ku munda wa uva wa yoze keshi mbunge;

³¹ kumanyi weswe unajiki ni mingonga; heswe hanalale ni mazo-a-linoka, ni chipanga chawo cha mawe hichinapuzuka.

³² Mba natalile, nachizewile kanawa, namwene, nalilongesele.

³³ Tulo amwe akepe; kunongwoka hakehe; kulindakenya hakehe moko mu tulo;

³⁴ chocho uswale we muwiza ngwe chingumba; kuhona che muchiza ngwe kajita ni yitwa yenyi.