Yishima 23 - MUKANDA USANDU WA ZAMBI 1975

¹ Muze mutwama nikulia ni umwe mukwa kuyula, tala kanawa yoze uli kumeso je.

² Nyi uli mukwa kulia chinji, sako poko ku muliu we.

³ Kanda uzanga kulia chenyi chipema, se chapwa kulia cha kwonga.

⁴ Kanda ulikatalisa ha upite; litwamine ku mana ja yena mwene.

⁵ Musela meso je ku chuma chize kuchishiko, nyi? Mumu chamwenemwene upite wakulisokela mapulwa. Wapwa ngwe pupa yoze wakuhumuka kwilu.

⁶ Kanda utambula kulia cha yoze uli ni liso lipi; kanda uzanga kulia chenyi chipema.

⁷ Mumu chize akutaka mu mbunge yenyi, chocho apwa. Mamba ngwenyi, Liako; nwako, alioze mbunge yenyi kuyishiko kuli yena.

⁸ Koma kaze hiwalia muwiza kusaza, mba maliji je apema hatoka.

⁹ Kanda uhanjika mu matwi ja chihepuke, mumu malelesa mana a maliji je.

¹⁰ Kanda uchiza chinyingi chikulu cha njiza; kanda unjila mu minda ya shiwa,

¹¹ mumu mukwa kwakula tachi akwete, kumakasopa ni yena ha chikuma cho.

¹² Sela mbunge ye ku maliji a kukufumba, ni matwi je ku maliji a yinyingi.

¹³ Kanda ulitwamina kufumba mwana, mumu kechi kufwa ha kumulamba ni mbwechi.

¹⁴ Mumulamba ni mbwechi, mupulula mwono wenyi ku Shiole.

¹⁵ Mwanami, nyi mbunge ye muyipwa ni mana, mba mbunge yami muyipwa ni chiseke, mbunge yino ya yami.

¹⁶ Ewa, mbunge yami muyiwahilila muze kanwa lie mulihanjika yuma ya ululi.

¹⁷ Mu mbunge ye kanda uvwila ukwa akwa shili, alioze pwako yena ni woma wa Yehova tangwa lieswe nganganga.

¹⁸ Mumu chamwenemwene kwononona kuchili; kutalatala che kechi kuchiteta.

¹⁹ Mwanami, panjika, ukapwe ni mana, ukasongwele mbunge ye mu jila.

²⁰ Kanda utwama hakachi ka akwa kunwa, hanji yipulutu ya yifwo.

²¹ Mumu mukwa kuzengewa ni chipulutu meza kupwa yiswale; kunongwoka muchikajika mutu ni yipuzu.

²² Panjika kuli tatenu yoze wakusemene; kanda ulelesa noko muze mapwa kashinakaji.

²³ Landa umwenemwene, kanda uulanjisa; chipwe mana, ni lufumbo, ni malinjekela.

²⁴ Tato wa mukwa ululi mawahilila chikolo; mweswe masema mwana wa mana mazukako uwahililo.

²⁵ Tatenu ni noko akawahe; pwo yoze wakusemene akawahilile.

²⁶ Mwanami ngwehe mbunge ye; meso je akawahilile mu majila jami.

²⁷ Mumu chikoi kapila musuku; pwo weka iye wumbu wa kulipola.

²⁸ Ewa kakujikinyina ngwe chingumba; kakwokesa akwa mafwefwe hakachi ka atu.

²⁹ Akwa lamba aya? Akwa chinyengo aya? Akwa kulitachika aya? Akwa kunenganyana aya? Akwa yilonda keshi yitela aya? Akwa kuchila meso aya?

³⁰ Ngwami waze akutwama shimbu ku vinyu; waze akuya kufupa vinyu ya kuchinga.

³¹ Kanda utala ku vinyu shimbu yinachili; muze yinalejima mu musenge; muze yinayeme ha kuyinwa.

³² Ku songo muyisuma ngwe kapela; muyisumana ngwe yenge.

³³ Meso je mamona yikomokeso; mbunge ye muyihanjika yuma ya kupiya.

³⁴ Muopwa ngwe yoze kanapombo hakachi ka kalunga-lwiji; ngwe yoze kanapombo ha songo lia nguji lia wato.

³⁵ Muamba ngwe, Hangulamba alioze cha-lemanyine; hangufufula alioze chachivwile. Tangwa lika mungulaula? Munguyifupa cheka nawa.