Yishima 22 - MUKANDA USANDU WA ZAMBI 1975

¹ Lufuma mupema unapeme kuhiana upite unene; vumbi lia zango liahiana prata hanji oru.

² Pichi ni yiswale Anakungulukila hamuwika; Yehova waatangile eswe.

³ Chikanyame malangikiza ye yipi maswama, alioze yizuzuke masenya kulutwe mba maalamba.

⁴ Upite ni ulemu ni mwono muyipwa kwononona cha waze malikehesa nikuvwila woma Yehova.

⁵ Mbimbo ni makambwila yatwama mu jila ya mukwa kupiya, alioze mweswe mafunga mwono wenyi mapwa kusuku ni yino yuma.

⁶ Fumba mwana mu jila yize chamutamba kuya, mba muze mapwa mukulwana kechi kuyihichika.

⁷ Pichi kakuyula chiswale ni mukwa kutambula mukuli mapwa ndungo ya mwenya mukuli

⁸ Mweswe makuwa uhenge makacha lamba, mba mbwechi ya utenu wenyi muyikahwa.

⁹ Yoze uli ni liso lia chihanyi mamuwahisa, mumu kakuhana kulia chenyi kuli yiswale.

¹⁰ Huma mukwa kulenya mba kulitachika muchinukatuka; ewa ndombo ni sonyi mujihwa.

¹¹ Yoze wazanga kupema cha mbunge, mwanangana mapwa sepa lienyi mumu ha vumbi lia mivumbo yenyi.

¹² Meso ja Yehova kakutunga mukwa yinyingi; alioze kakununguna maliji a mukwa mafwefwe.

¹³ Chileya kakwamba ngwenyi, Haze ndumba uliko, mangushiha mu tapalo.

¹⁴ Kanwa lia pwo weka yinapu ngwe wina usuku; malimbukilamo yoze Yehova kamuzangile.

¹⁵ Uhepuke unakashiwila mu mbunge ya mwana; alioze mbwechi ya kufumba muyiuhuma kusuku nenyi.

¹⁶ Yoze mapinjisa yiswale akaweze ku upite wenyi ni yoze kakuhana kuli pichi meza kuhona.

¹⁷ Tela matwi je wivwe maliji a mukwa mana; sela mbunge ye ku yinyingi yami,

¹⁸ mumu Chinapeme kuyifunga muchima lie nyi mukayikolesa hamuwika mu kanwa lie

¹⁹ Musono hinakunyingikisayo yena hanga ukajikijile Yehova.

²⁰ Hinakusonekena yuma yahiana kupema ya yiyulo ni yinyingi,

²¹ ukanyingike chize apwa a pundupundu maliji amwenemwene, ukahase kutwala maliji amwenemwene kuli waze makuhula.

²² Kanda wiya kuli chiswale mumu kapwa chiswale; kanda upinjisa mukwa kuyindama mu chikolo cha limbo,

²³ mumu Yehova mahanjikila chikuma cho, makapupa mwono wa waze eswe akwa kupupa.

²⁴ Kanda ulikata ni chitenu; kanda uliendela ni chifwatulo,

²⁵ kuchina hanji mulilongesa ndako jenyi, chikapwe kambwila ku mbunge ye.

²⁶ Kanda utwama ni waze akulikwatakwata ku moko chipwe waze akuhana yifungo ha mikuli.

²⁷ Nyi mbongo ja kufweta kushi najo akakutambule muhela we unapombo nyi?

²⁸ Kanda uchiza chinyingi chikulu cha njiza chize tulamba esekele.

²⁹ Unamono chipalakata ku milimo yenyi, nyi? Kumakamana kumeso ja mianangana; kechi kumana kumeso ja atu amokomoko.