Yishima 21 - MUKANDA USANDU WA ZAMBI 1975

¹ Mbunge ya mwanangana yapwa mu kwoko lia Yehova ngwe chitwetwe cha meya, kakuyitalikisa kweswako mazanga.

² Jila yeswe ya mutu yinapeme ku meso jenyi mwene, alioze Yehova kakupezalisa mbunge.

³ Kulinga ululi ni upatwilo wapemena Yehova kuhiana yitapo.

⁴ Meso a kulizata, ni mbunge ya kulengumuka, chipwe kulima cha yingulungulu, yeswe ya shili.

⁵ Manyonga a yipalakata atwala ku kulumbama wika; alioze manyonga a mukwa kulipupula atwala ku kuhona wika.

⁶ Kuzuka upite ni limi lia mahuza chapwa ngwe chishichishi chize chinahehuka; waze akuchifupa analikokela kufwa.

⁷ Upupilo wa yingulungulu muukaahungumuna mumu kasolo kulinga ni upatwilo.

⁸ Jila ya mukwa uhie kuyahengahenga, alioze yitanga ya mukwa kulinanga, ya ululi.

⁹ Kutwama ha mbango ya fulumba chinawaha kuhiana kutwama mu zuwo linene hamuwika ni pwo mukwa kulitachika.

¹⁰ Mbunge ya chingulungulu yakuzanga yuma yipi; keshi kuzanga mwenyembo wenyi.

¹¹ Muze malamba mukwa kulenya chizuzuke matambula mana. Muze mafumba mukwa mana matambula yinyingi.

¹² Mukwa ululi kakuzewula zuwo lia chingulungulu; chize akununguna yingulungulu nikwaonwona.

¹³ Muze yiswale mateta, mweswe majika matwi jenyi iye nawa mateta alioze kechi kumwivwa.

¹⁴ Chawana ku tenga chakuholesa utenu; chindo mu tulo kuchakuholesa ufwatulo wa tachi.

¹⁵ Kuli akwa ululi chapwa uwahililo kulinga upatwilo; alioze kuli akwa kulinga uhenge chapwa kwonwona.

¹⁶ Mweswe mahichika jila ya malinjekela mapomba mu chikungulwila cha afu.

¹⁷ Mweswe mazanga kuheha mapwa chiswale; yoze mazanga vinyu ni maji kechi kupwa pichi.

¹⁸ Chingulungulu mapwa ndando ya kukula mukwa ululi; mukwa mafwefwe masalakana mukwa ululi.

¹⁹ Kutwama mu chifuchi cha puya chinapeme kuhiana kutwama hamuwika ni pwo yoze wakulitachika ni utenu.

²⁰ Mu zuwo lia mukwa mana mwatwama maji ni upite wa ndando yinene, alioze chihepuke kakuchimbulungunya.

²¹ Mweswe makaula ululi ni utu wa zango mawana mwono, ni ululi, ni ulemu.

²² Mukwa mana makumba limbo lia akwa ndundo malelesa tachi ja Ufulielo wamo.

²³ Mweswe mafunga kanwa lienyi ni limi lienyi kanafungu mwono wenyi ku lamba.

²⁴ Mukwa kulengumuka, mukwa kulizata, jina lienyi ngwo, Mukwa kulenya; kakulinga mu kulivwimba cha kulengumuka.

²⁵ Usolo wa chileya kuwakumushiha; mumu moko jenyi kasolo kuhondangana.

²⁶ Kwali yoze wakwivwa chipululu chinji tangwa lieswe nganganga; alioze mukwa ululi kakuhanahana, keshi kumina.

²⁷ Chitapo cha yingulungulu chapwa chizelwokeso; alioze muze machineha ni manyonga a ungulungulu mba chahiana kupiha.

²⁸ Chela wa mahuza mafwa; alioze mukwa kwivwa mahanjika, kechi kumuhangulula.

²⁹ Chingulungulu kakukalisa meso jenyi; alioze mukwa ululi kakululikisa ndako jenyi jeswe.

³⁰ Mana a kulimika ni Yehova, hanji malinjekela, hanji yiyulo yakuhi.

³¹ Kakululika kavwalu ha tangwa lia jita, alioze kuwaha chinakatuka kuli Yehova.