Yishima 2 - MUKANDA USANDU WA ZAMBI 1975

¹ Mwanami, nyi mutambula maliji jami; nyi mupachikila shimbi jami,

² nyi musela matwi je ku mana, nyi muosa mbunge ye ku malinjekela;

³ ewa, nyi unalilila yinyingi nikukololokela malinjekela,

⁴ nyi muyifupa chizechene ngwe wakufupa prata; nyi muhengula ngwe upite wa kuhengeka unafupu;

⁵ mba muosa chinyingi we woma wa Yehova muwana chinyingi cha Zambi.

⁶ Mumu Yehova kakuhana mana. Ku kanwa lienyi kwakutuhuka yinyingi ni malinjekela.

⁷ Iye kakulumbamisa mana angunu hali mukwa ululi; kapwa lukepwe kuli waze akwenda ni kutuwika cha mbunge,

⁸ nikufunga majila a upatwilo a ululi. Iye kakuwahisa jila ya asandu jenyi.

⁹ Mba mukasa chinyingi ululi, ni upatwilo, ni kulita, ni jila yeswe yipema.

¹⁰ Mumu mana makanjila mu mbunge ye, ni yinyingi muyikapemena mbunge ye.

¹¹ Maseliekela makulayila, ni malinjekela makakufunga,

¹² nikukupulula ku ndako jipi ni kuli malunga a kupiya mu yihanjika yo,

¹³ te waze akumbila ndako ja ululi hanga akende mu majila ja milima.

¹⁴ O te kakuwahilila mukulinga yipi, kakusehejela mu kupiya cha yuma yipi,

¹⁵ akwa ndako ja uhenge, kapiya mu kwenda cho.

¹⁶ Chocho nawa mukalilamwina kuli pwo weka te kuli chilambala yoze kakupepieka ni maliji jenyi,

¹⁷ yoze wakwehuka sepa lia ukweze wenyi, ni kakuvulama usendo wa Zambi yenyi.

¹⁸ Zuwo lienyi kuliakushimbama ndo ku kufwa. Majila jenyi jakutwala kuli afu.

¹⁹ Hakachi ka waze akuya kuli iye niumwe meza nawa, chipwe kuhilukila jila ya mwono.

²⁰ Chocho mukenda mu majila ja malunga apema nikulifungila mu majila ja ululi.

²¹ Mumu akwa ululi makatungisa chifuchi; atu angunu kumakalindulukilamo.

²² Alioze yingulungulu makaateta mu chifuchi ni akwa mafwefwe makaatukulamo.