Yishima 19 - MUKANDA USANDU WA ZAMBI 1975

¹ Chiswale yoze wakwenda ni kutuwika cha mbunge Wapema kuhiana chihepuke yoze wapiya ku mivumbo yenyi.

² Chikwo nawa kupwa ni mbunge kuyishi yinyingi kuchapemene; yoze wazomboka naye mapianguka.

³ Uhepuke wa mutu kuwakuhengesa ndako jenyi; mbunge yenyi kuyakulifwita ha kulimika ni Yehova.

⁴ Upite kuwakwokesa masepa; alioze chiswale kakuhandunuka kuli sepa lienyi.

⁵ Chela cha mahuza kechi kasamba; mukwa kuhanjika mahuza kechi kumupulula.

⁶ Anji mafupa vumbi lia chihanyi; atu eswe mazanga kupwa masepa a mukwa kuhana yawana.

⁷ Akwo eswe a chiswale keshi kumuzanga; mba masepa jenyi, cho kuchina! Kakwakaula ni maliji alioze haya lume!

⁸ Mukwa kuzuka mana kakuzanga mwono wenyi; yoze mafunga malinjekela mawana yuma yipema.

⁹ Chela cha mahuza kechi kasamba; mukwa kuhanjika mahuza manonga.

¹⁰ Kuyatelele chihepuke yuma yapema naye, chipwe ndungo akayule helu lia alemu.

¹¹ Malinjekela kakupwisa mutu makoke kutenuka; chapwa ulemu kuli iye kuzomboka Utanguko.

¹² Ufwatulo wa mwanangana wapwa ngwe kuhiohia cha ndumba; alioze vumbi lienyi liapwa ngwe mume ha mwambu.

¹³ Mwana chihepuke kapwa lamba lia tato; kutokwela cha pwo chapwa ngwe kusotwoka ndwe-ndwe-ndwe.

¹⁴ Mazuwo ni upite kakuyihinga kuli atato, alioze pwo wakanyama kuli Yehova akatuka.

¹⁵ Uleya kuwakutwala mutu ku tulo anji; mweswe keshi milimo mevwa zala.

¹⁶ Mukwa kumanununa shimbi kakutunga mwono wenyi mwene; alioze mweswe kasele mbunge yenyi ku ndako jenyi kumafwa.

¹⁷ Mukwa kuvwila keke yiswale kakuhana kuli Yehova; chitanga chenyi chipema mamukundululacho.

¹⁸ Fumba mwané shimbu kutalatala kuchili; alioze kanda usa mbunge ye ha kumushiha.

¹⁹ Mukwa ufwatulo wunji mambata mulonga wenyi; mumu chipwe wamupulula hindu Chakutamba kuchilinga cheka nawa.

²⁰ Panjika ku yiyulo, tambula kufumba, ukapwe ni mana ku songo lia mwono we.

²¹ Kutaka chinji chili mu mbunge ya mutu; alioze yiyulo ya Yehova yenayo muyikakola.

²² Chize atu kakuzanga muli mutu ngwo, Utu; chiswale Wapema kuhiana mukwa mahuza.

²³ Woma wa Yehova watwala ku mwono, yoze uli nawo matwama nikuyuka, kechi kumona yipi.

²⁴ Chileya machupika kwoko lienyi mu chenga, keshi kuzanga kulitwala ku kanwa lienyi.

²⁵ Lamba mukwa kulenya mba chizuzuke malilongesa kukanyama; kanjisa mukwa malinjekela mba yinyingi muyimulumbunuka.

²⁶ Yoze malinga ni tato ni uswi, hanji mahuma naye kapwa mwana wa kukolesa sonyi ni kuneha sau.

²⁷ Mwanami, litwamine kupanjika ku longeso lize lia kukupiangula ku maliji a yinyingi.

²⁸ Chela chitanganyanyi kakulenya upatwilo; kanwa lia chingulungulu kuliakumina uhenge.

²⁹ Kakululika upatwilo mumu hali akwa kulenya; kakululika mijiji ya kulamba manyima a yihepuke.