Yishima 18 - MUKANDA USANDU WA ZAMBI 1975

¹ Yoze malihandununa kanafupu upale wenyi mwene; kakulitachika ni mana eswe angunu.

² Chihepuke kawahilile ni malinjekela; kanazange mbunge yenyi yilisolole wika.

³ Muze yingulungulu meza, kaleleso kaneza nawa; kumuwika ni sonyi kuneza sau.

⁴ Maliji a mu kanwa lia mutu kapwa ngwe meya asuku; kuuto ya mana kwapwa ngwe chitwetwe cha kupukumuka.

⁵ Kupwa ni katonde kuli chingulungulu kuchapemene; chipwe kuhisa mukwa ululi ha upatwilo.

⁶ Mivumbo ya chihepuke kuyakunjila mu kulitachika; kanwa lienyi kuliakulisanyikina mijiji.

⁷ Kanwa lia chihepuke kuliakumwonwona; mivumbo yenyi yapwa kambwila lia mwono wenyi.

⁸ Maliji a mukwa kalundanganyishi kapwa ngwe kakulia kayema, alioze kakunjila ndo muchima lia jimo.

⁹ Yoze wakwata milimo yenyi ni lwelia kapwa mwanakwo wa mukwa kwonwona.

¹⁰ Jina lia Yehova liapwa kaposhi mukolo; mukwa ululi machinyinamo mba mamufungila mwilu.

¹¹ Upite wa pichi wapwa kuli iye limbo lienyi likolo; mwene kakuumona ngwe chipanga chisuku.

¹² Shimbu kwonwona kanda chiheta mbunge ya mutu yakulizata; kulikehesa kuchakutetekela ulemu.

¹³ Yoze makumbulula shimbu kandevwa chikuma, chapwa uhepuke ni sonyi kuli iye.

¹⁴ Spiritu ya mutu kuyakumujikijisa mu kuyiza chenyi; alioze Spiritu ya kumakuna iya mayihasa?

¹⁵ Mbunge ya chikanyame kuyakuzuka yinyingi; twitwi lia mukwa mana kuliakufupa yinyingi.

¹⁶ Chawana cha mutu kuchakumusela jila; kuchakumuneha kumeso ja atu alemu.

¹⁷ Yoze mahanga kulisamba mamumona ngwe mukwa ululi, alioze mukwo meza nikumusopesa.

¹⁸ Chela kuchakuholesa kulitachika; kuyakuhandununa hakachi ka akwa ndundo.

¹⁹ Mukwenu nyi wamuvulumuna chikalu kuwana nenyi; kupupa limbo likolo chashi. Milonga yino yakala ngwe njalo ja mbonge.

²⁰ Jimo lia mutu mulikuta ni mihuko ya mu kanwa lienyi; mayuka ni kufumbuka cha mivumbo yenyi.

²¹ Kufwa ni mwono yatwama mu chiyulo cha limi; waze akulizanga makalia mihuko yalio.

²² Mweswe mawana pwo mawana chuma chipema, mazuka vumbi kuli Yehova.

²³ Yiswale kakulembelela alioze pichi kakukumbulula ni tachi.

²⁴ Yoze malizukila masepa anjianji malikokela kwonwona; alioze kwali sepa umwe wakulalaminya kuhiana yoze wasemuka nenyi.