Yishima 17 - MUKANDA USANDU WA ZAMBI 1975

¹ Manda a shima hamwe ni kuhwima kanawaha kuhiana zuwo lia tò ni kulia hamwe ni ndombo.

² Ngamba wa mana mayula helu lia mwana yoze makolesa sonyi; kumakapwa ni chihanda cha chihinga hakachi ka enya zuwo.

³ Ndeho ya kupemesena prata ni lutengo wa kupemesena oru; alioze Yehova kakweseka mbunge.

⁴ Chihenge kakupanjika ku mivumbo ya ungulungulu; mukwa mahuza kakupanjika ku limi lia chihuki.

⁵ Wayunga chiswale wasaula Tangi yenyi; yoze mawahilila ha lamba lia mukwo kechi kasamba.

⁶ Ajikulu kapwa chipangula cha makulwana; uhenya wa ana, atato.

⁷ Maliji apema katelele chihepuke; chipwe mivumbo ya mahuza kuyatelele mwanangana.

⁸ Chindo chapwa ngwe diamante kuli yoze hachizuka; kweswako matalikisa mawaha.

⁹ Mukwa kufuka Utanguko kanafupu zango; alioze mukwa kutokwela ha chikuma kakuhandununa masepa apema.

¹⁰ Liji limuwika lia kukanjisa kuli mukwa malinjekela kuliakutwa kuhiana kulakaji lia mijiji muli chihepuke.

¹¹ Mutu mupi kakuzanga kukatukila akwo; kashika mamutumina mukeji wa uswi.

¹² Kutakana ni ursu yoze hamutambula anenyi chashi, kutakana ni chihepuke mu uhepuke wenyi chikalu.

¹³ Yoze makundulula yipi ha yipema, yipi kuyichi kukatuka ku zuwo lienyi.

¹⁴ Kuputuka cha ndombo chapwa ngwe muze majikula meya; kashika litwamine kuhamika shimbu kanda achiputuka kuzwela.

¹⁵ Yoze masambisa chingulungulu ni yoze mahisa mukwa ululi, eswe ni aali kapwa chizelwokeso kuli Yehova.

¹⁶ Ha chikuma chika mu kwoko lia chihepuke muli ndando ya kulanda mana, se keshi mbunge?

¹⁷ Sepa lia mutu kakuzanga matangwa eswe; yaya wasemukinyine kukwasa mu tangwa lia lamba.

¹⁸ Yoze keshi mbunge kakukwata moko ni kuhana chifungo kumeso ja mukwo.

¹⁹ Mweswe wazanga ndombo wazanga utanguko; yoze manangamisa pito lienyi kanafupu akamwonwone.

²⁰ Yoze kali ni mbunge ya kupiya keshi kuwana yipema; yoze kali ni limi lia uhenge malimbukila mu yuma yipi.

²¹ Mweswe masema chihepuke kanalikokela chinyengo; tato ya chihepuke keshi uwahililo.

²² Mbunge ya chiseke yapwa yitumbo yipema; alioze Spiritu yize yamakuka kuyakuumisa yifwaha.

²³ Chingulungulu kakuchiza chindo mu tulo akahengese majila ja upatwilo.

²⁴ Mana kapwa kumeso ja mukwa malinjekela; alioze meso ja chihepuke kakuya ndo ku masongo a hashi.

²⁵ Mwana wa uhepuke kapwa chinyengo kuli tato; kapwa usasu kuli naye wamusemene.

²⁶ Chikwo nawa, kulamba akwa ululi kuchapemene; chipwe kulamba alemu mumu ha ululi wo.

²⁷ Yoze matepulula maliji jenyi kali ni yinyingi; mukwa kuhwima mbunge kali ni malinjekela.

²⁸ Chipwe chihepuke, nyi mahola, mamumona ngwe mukwa mana; muze mapakika kanwa mamunyonga ngwo, Chikanyame.