Yishima 16 - MUKANDA USANDU WA ZAMBI 1975

¹ Kuhala cha mbunge chili kuli mutu; alioze kumbululo lia mu kanwa Unakatuka kuli Yehova.

² Ndako jeswe ja mutu jinapeme kumeso jenyi mwene; alioze Yehova kakupezalisa maspiritu.

³ Kunjika yilinga ye kuli Yehova mba kuhala che muchikakola.

⁴ Yuma yeswe Yehova hayitengela milimo yayo; ewa chipwe yingulungulu haasela tangwa lia yipi.

⁵ Mweswe mukwa kulengumuka mu mbunge kapwa chizelwokeso kuli Yehova; chipwe malikwata kwoko ni kwoko hindu kechi kasamba.

⁶ Utu wa zango ni umwenemwene kuyakufwetela uhenge; ku woma wa Yehova atu kakuchina yipi.

⁷ Muze ndako ja mutu jakuwahila Yehova, kakupwisa ni sambukila chipwe akwa kole jenyi.

⁸ Chikepe hamwe ni ululi chawaha kuhiana kufumbuka chinji hamwe ni uhenge.

⁹ Mbunge ya mutu kuyakuhala jila yenyi; alioze Yehova kakusongwela shimbo jenyi.

¹⁰ Chiyulo cha munanyi chili ku mivumbo ya mwanangana; kanwa lienyi kulichi kutangula upatwilo.

¹¹ Pezu ja ululi ni mbalansa ja ululi ja kuli Yehova; pezu jeswe ja mu njeke japwa chitanga chenyi.

¹² Chakuzelwokesa mianangana kulinga ungulungulu, mumu kakukolesa ngunja ni ululi.

¹³ Mianangana kakuwahilila ni mivumbo ya ululi; kakuzanga yoze mahanjika ni ululi.

¹⁴ Ufwatulo wa mwanangana wapwa ngwe mukeji wa ufwe; mukwa mana mamutomesa mbunge.

¹⁵ Mwono watwama mu pangu lia ku meso ja mwanangana; vumbi lienvi liapwa ngwe lelwa lia vula wa samakwasa.

¹⁶ Kuzuka mana chawaha kuhiana oru. Ewa kutongola malinjekela chawaha kuhiana prata.

¹⁷ Chikoka cha mukwa ululi chapwa kuchina yipi. Mweswe mafun ga jila yenyi kakutunga mwono wenyi.

¹⁸ Kulengumuka kuchakutetekela kunonga. Mbunge ya kulizata yatwala ku kulimbuka.

¹⁹ Kulikehesa hamwe ni yiswale chawaha kuhiana kulipangila upite ni akwa kulengumuka.

²⁰ Yoze mapanjika ku liji mawana yipema. Kawaha mweswe mafuliela Yehova.

²¹ Akwa mbunge ja mana maatongola ngwo, Yikanyame. Kuwaha cha mivumbo kuchakwokesa yinyingi.

²² Malinjekela kapwa ngwe fuji lia mwono kuli mwenyajo, alioze kufumba yihepuke chapwa uhepuke wo.

²³ Mbunge ya mukwa mana kuyakulongesa kanwa lienyi, kuyakuweza yinyingi ku mivumbo yenyi.

²⁴ Maliji a sambukila apwa ngwe chishila cha wuchi; kakuyemesa mbunge ni kuwuka yifwaha.

²⁵ Jila kuyili yize yapwa kuli mutu ngwe yinapeme; alioze songo liayo liapwa majila a kufwa.

²⁶ Zala ya mukwa kuhondangana kuyakumulingisa; kanwa lienyi kuliakumwitacho.

²⁷ Chingandangali kakutaka yipi. Mu mivumbo yenyi mwatwama kahia kakupapa.

²⁸ Mukwa kupiya kakuvundula ndombo; mukwa kalundanganyishi kakuhandununa masepa apema.

²⁹ Mukwa upupilo kakuzeza mwenyembo wenyi nikumutwala mu jila kuyapemene.

³⁰ Yoze majika meso jenyi chapwa cha kutaka yuma ya kupiya. Yoze mapakika mivumbo yenyi kakuneha yuma yipi.

³¹ Kambu jitoma japwa chipangula cha uhenya muze majiwana mu jila ya ululi.

³² Yoze keshi kutenuka kawashi wahiana akwa ndundo; yoze mayula Spiritu yenyi Wahiana yoze mapupa limbo.

³³ Ngombo kakuyisakula mu kondo, alioze kuchimanununa muchipwa cha Yehova.