Yishima 15 - MUKANDA USANDU WA ZAMBI 1975

¹ Kumbululo ha vumbi kuliakuchinda ufwatulo; ahoze liji lisasu kuliakusangumuna utenu.

² Limi ha mukwa mana kuliakuhanjika yinyingi kanawa; ahoze kanwa ha chihepuke kuliakulusuka uhepuke.

³ Meso a Yehova anamono kweswe nikutala chipi ni chipema.

⁴ Limi ha umbovu hapwa ngwe mutondo wa mwono; ahoze uhenge waho kuwakumakuna Spiritu.

⁵ Chihepuke kakulelesa longeso ha tato; ahoze yoze matá kumukanjisa malumuka chikanyame.

⁶ Mu zuwo ha mukwa ululi mwatwama upite wunji; ahoze mu kufumbuka cha chingulungulu muli kupinda.

⁷ Mivumbo ya mukwa mana kuyakuhana yinyingi; mbunge ya chihepuke, ka.

⁸ Chitapo cha chingulungulu chapwa chizelwokeso kuli Yehova; alioze kulemba cha mukwa ululi chamuwahila chinji.

⁹ Ndako ja chingulungulu japwa chizelwokeso kuli Yehova; alioze kakuzanga mukwa kukaula ululi.

¹⁰ Yoze mehuka jila mamona kufumba chimwe chikalu; yoze keshi kuzanga amukanjise kumafwa.

¹¹ Shiole ni ye Apandone yinamoneka kuli Yehova, mba mbunge ja ana a atu, ka?

¹² Mukwa kulenya keshi kuzanga yoze mamukanjisa. Kechi kulikundama ni mukwa mana.

¹³ Mbunge ya chiseke kuyakuwahisa mutu ku meso, alioze chinyengo mu mbunge kuchakushiha spiritu.

¹⁴ Mbunge ya mukwa malinjekela kuyakufupa yinyingi, alioze kanwa lia chihepuke kuliakulikuchisa ni uhepuke.

¹⁵ Matangwa eswe a mukwa lamba apwa api, alioze mbunge ya chiseke yapwa ngwe festa yize kuyishi kuhwa.

¹⁶ Chikehe hamuwika ni woma wa Yehova, chapema kuhiana upite wunji hamuwika ni lamba.

¹⁷ Kulia cha malamba kuze kwatwama zango, chapema kuhiana ngombe wa maji hamuwika ni kole.

¹⁸ Chifwatulo kakusangumuna kuhamika, alioze yoze keshi kutenuka fuji kakuholesa vunda.

¹⁹ Jila ya chileya yajika ni mbimbo, alioze jila ya mukwa ululi kuyakusoloka kanawa.

²⁰ Mwana wa mana kakuwahisa tato, alioze chihepuke kakulelesa naye.

²¹ Kuli yoze keshi mbunge uhepuke wapwa ngwe chiseke, alioze mukwa malinjekela kakwenda ni ululi.

²² Nyi kukushi chiyulo kuhala kuchichi kulumbunuka, alioze ku wunji wa akwa chiyulo kakuchikolesa.

²³ Lunga kakuwahilila ni kumbululo lia kanwa lienyi. Liji lia ha ola ya kulita, kuwahalio.

²⁴ Kuli mukwa mana jila ya mwono yapwa ya kukanduka hanga akahichike Shiole kushi.

²⁵ Yehova kakutukula zuwo lia mukwa kulengumuka, alioze kakukolesa njiza ya twamishi.

²⁶ Manyonga a mwe chingulungulu kapwa chizelwokeso kuli Yehova; alioze atu apema kakuhanjika maliji a sambukila.

²⁷ Mukwa chipululu kakupinjisa zuwo lienyi mwene; alioze yoze keshi kuzanga yawana matwama ni mwono.

²⁸ Mbunge ya mukwa ululi kuyakunyonga ha kumbululo; alioze kanwa lia chingulungulu kuliakulusukila yuma yipi.

²⁹ Yehova kapwa kusuku ni yingulungulu; alioze kakwivwa kulemba cha mukwa ululi.

³⁰ Pangu lia meso Hakuwahisa mbunge; lusango mupema kakuwahisa yifwaha.

³¹ Twitwi lia kupanjika ku kukanjisa cha mwono mulikatwama hakachi ka akwa mana.

³² Yoze malituna maliji a kumufumba hanalelesa mbunge yenyi mwene; alioze yoze mapanjika liji lia kumukanjisa mapwa ni mbunge.

³³ Woma wa Yehova wapwa kulongesa cha mana; kulikehesa kuchakutetekela ulemu.