Yishima 14 - MUKANDA USANDU WA ZAMBI 1975

¹ Pwo mweswe wa mana kakutungisa zuwo lienyi; alioze chihepuke kakulipuzula ni moko jenyi.

² Yoze wakwenda ni ululi wenyi kali ni woma wa Yehova; alioze mukwa kupiya mu ndako jenyi kakumulelesa.

³ Mu kanwa lia chihepuke muli mbwechi ya kumulambila kulengumuka chenyi; alioze mivumbo ya akwa mana kumuyikaafunga.

⁴ Kuze kukushi ngombe, chililo muchipema; alioze ku tachi ja ngombe kuneza kufumbuka chinji.

⁵ Chela wamwenemwene kechi kuhanjika mahuza; alioze chela wa kwonga kakuhanjika mahuza.

⁶ Mukwa kulenya kakufupa mana hindu kaawanyine; alioze kuli mukwa malinjekela kuwana yinyingi chapwa chashi.

⁷ Yako kuli chihepuke, kuchi kuwana kuli iye mivumbo ya yinyingi.

⁸ Kuli chikanyame kunyingika jila yenyi chapwa mana; alioze uhepuke wa yihepuke wapwa wa kwonga.

⁹ Yihepuke kakulelesa uhie; alioze vumbi lili hakachi ka akwa ululi.

¹⁰ Mbunge kuyinanyingika kusasaminya chayo yene; chilambala kechi kuhasa kunyingika kuwaha chamo.

¹¹ Zuwo lia chingulungulu kumalinunguna; alioze mbalaka ya mukwa ululi kumuyikawaha.

¹² Jila kuyili yize yapwa kuli mutu ngwe yinapeme; alioze songo liayo liapwa majila a kufwa.

¹³ Mbunge chinyengo yikwete chipwe ha kuseha; songo lia chiseke kulemewa.

¹⁴ Mukwa kuhenga mu mbunge makalia mihuko ya ndako jenyi; mutu mupema makaliwahisa mwene.

¹⁵ Chizuzuke kakufuliela maliji eswe; alioze chikanyame kakutala kanawa ku kwenda chenyi.

¹⁶ Mukwa mana kakwivwa woma, kakuchina yipi; alioze chihepuke kakulilengela, keshi woma.

¹⁷ Mukwa kutenuka washi malinga ya uhepuke; mukwa kutaka yipi keshi kumuzanga.

¹⁸ Yizuzuke kakuhinga uhepuke; yikanyame kakwasela chipangula cha yinyingi.

¹⁹ Atu api kakuhetamina kumeso ja apema; yingulungulu kakuhetamina ku yikolo ya akwa ululi.

²⁰ Yiswale keshi kumuzanga chipwe kuli mwenyembo wenyi; alioze pichi kali ni masepa anji.

²¹ Mukwa kulelesa mwenyembo wenyi kanavulumuna; alioze kawaha yoze mavwila keke yiswale.

²² Akwa kutaka yipi te kapiangukile, nyi? Alioze utu wa zango ni umwenemwene muyikapwa kuli akwa kuhala yipema.

²³ Milimo yeswe kufumbuka yikwete; pande ja mivumbo jatwala ku uswale wika.

²⁴ Chipangula cha akwa mana, upite wo; alioze uhepuke wa yihepuke hi uhepuke wika.

²⁵ Chela wamwenemwene kakupulula mwono wa atu; alioze mukwa mahuza kakwonga.

²⁶ Mu woma wa Yehova muli kujikiza chinji, mba muchipwa uchinyino wa ana jenyi.

²⁷ Woma wa Yehova wapwa fuji lia mwono akakatuke ku makambwila a ufwe.

²⁸ Wunji wa atu wapwa uhenya wa mwanangana; alioze kuhona atu kuchakwonwona mwanangana.

²⁹ Yoze keshi kutenuka kawashi malinjekela anji akwete; alioze mukwa kulipupula kakulemesa uhepuke.

³⁰ Mbunge yingunu kuyakuhana mwono ku mujimba; alioze ukwa kuwakupolesa yifwaha.

³¹ Wapinjisa yiswale wasaula Tangi yenyi; alioze mukwa kuvwila keke yiswale kakumulemesa.

³² Mambila chingulungulu mu ungulungulu wenyi; alioze mukwa ululi kali ni kutalatala mu kufwa chenyi;

³³ Mana kahwimina mu mbunge ya mukwa malinjekela; alioze chize cha muchima lia yihepuke kuchakusoloka.

³⁴ Ululi kuwakunangamisa atu; alioze shili yapwa sau ku vungu heswaho.

³⁵ Vumbi ha mwanangana kuliapwa kuli kavumbi wa mana; alioze ufwatulo wenyi muupwa hali mukwa kumukolesa sonyi.