Yishima 13 - MUKANDA USANDU WA ZAMBI 1975

¹ Mwana wa mana kakwivwa kufumba cha tato; alioze mukwa kulenya keshi kwivwa kukanjisa.

² Mutu malia yipema ku mihuko ya kanwa lienyi; alioze mbunge ya mukwa mafwefwe muyikalia upupilo.

³ Yoze malayila kanwa lienyi mafunga mwono wenyi; alioze yoze mapakula chikolo mivumbo yenyi kumakanwonwona.

⁴ Mbunge ya chileya kuyakuzanga, hindu keshi nichimwe; alioze mbunge ya chipalakata kumuyikatoha.

⁵ Mukwa ululi keshi kuzanga mahuza; alioze chingulungulu kapwa chizelwokeso ni kakulikokela sonyi.

⁶ Ululi kuwakufunga mukwa ululi mu jila; alioze ungulungulu kuwakununguna mukwa shili.

⁷ Kwali yoze kakulipwisa pichi, hindu keshi nichimwe; kwali yoze kakulipwisa chiswale, hindu kali ni upite unene.

⁸ Ndando ya kukula mwono wa mutu upite wenyi; alioze chiswale keshi kwivwa kukanjisa.

⁹ Lutemo wa mukwa ululi kakuwahilila; alioze ndeya ya chingulungulu kumakayijimisa.

¹⁰ Ku kulengumuka wika kuneza kulitachika; alioze mana kwali kuli mukwa kulongoloka.

¹¹ Upite wa kutambula ku milimo ya kulifuza muukatepuluka; alioze yoze kakupita ku kuhondangana chenyi kumakaliwezela.

¹² Kutalatala chize kuchishi kumoneka ku-chakuhongesa mbunge; alioze ha kumona chize tunazange chapwa ngwe mutondo wa mwono.

¹³ Mukwa kulelesa lie liji kumakalionwona; alioze makalambula kwononona yoze wakwivwa woma wa shimbi.

¹⁴ Longeso lia mukwa mana liapwa ngwe fuji lia mwono; mutu akakatuke ku makambwila a kufwa.

¹⁵ Malinjekela apema kakuneha vumbi; alioze jila ya akwa mafwefwe yikalu.

¹⁶ Chikanyame mweswe kakulinga ni chinyingi; alioze chihepuke kakusolola uhepuke.

¹⁷ Mukeji wa ungulungulu kakulimbukila mu yipi; alioze kanganda wa kushishika kapwa kuhinduka.

¹⁸ Yoze katayile amufumbe makamona uswale ni sonyi; alioze kumakalemesa yoze matá muze mamukanjisa.

¹⁹ Kumanununa chize kanazange chapemena mbunge ya mutu; alioze chapihila yihepuke kukatuka ku yipi.

²⁰ Nyi muwenda ni akwa mana ni yena nawa muopwa ni mana; alioze mweswe malikata ni yihepuke kumakevwa kusasaminya.

²¹ Yipi kuyakukaula akwa shili; alioze mukwa ululi makamwononona ni yipema.

²² Mutu mupema kakuhichika chihinga kuli ana ja ana jenyi; alioze mukwa shili kakutulika upite hali mukwa ululi.

²³ Kulia chinji chili mu ulimi wa chiswale; alioze kuchili chize kakuchonwona mumu ha uhenge.

²⁴ Yoze matepulula mbwechi yenyi kakuvwila kole mwanenyi; alioze yoze wamuzanga mamufumba kanawa.

²⁵ Mukwa ululi kakulia ndo kuyukisa mbunge yenyi; alioze jimo lia chingulungulu mulikahona.