Yishima 12 - MUKANDA USANDU WA ZAMBI 1975

¹ Mweswe mazanga amufumbe kakuzanga yinyingi; alioze yoze keshi kuzanga kumukanjisa kapwa ngwe kashitu.

² Lunga mupema mawana vumbi kuli Yehova; alioze mukwa kutaka yipi mamuhisa.

³ Mutu keshi kukola ku ungulungulu; alioze chikota cha mukwa ululi kuchichi katukuka nilimwe tangwa.

⁴ Pwo wa kushishika kapwa ngwe chipangula kuli mukwo-lunga; alioze pwo yoze makolesa sonyi kapwa ngwe kupola mu yifwaha ya mukwo-lunga.

⁵ Manyonga a akwa ululi kakululama; alioze yiyulo ya yingulungulu kuyakwonga.

⁶ Maliji a yingulungulu atwala ku kujikinyina kumwanga manyinga; alioze kuhanjika cha akwa ululi muchikaapulula.

⁷ Nunguna yingulungulu, hikeshiko; alioze zuwo lia mukwa ululi kumulikakola.

⁸ Makachichimieka lunga nikulita ni mana jenyi; alioze makalelesa mukwa mbunge ya kupiya.

⁹ Yoze anamulelesa alioze kali ni ngamba kanawaha kuhiana yoze kakulilemesa hindu yakulia keshi nayo.

¹⁰ Mukwa ululi kakunyonga mwono wa chimuna chenyi; alioze keke ya yingulungulu yapwa uswi.

¹¹ Mukwa kulima minda yenyi makapwa ni kulia chinji; yoze makaula atu amokomoko keshi mbunge.

¹² Chingulungulu kakuzanga kambwila wa atu api; alioze chikota cha mukwa ululi chakwima.

¹³ Utanguko wa mivumbo wapwa kambwila kuli mutu mupi; alioze mukwa ululi makatuhuka mu lamba lienyi.

¹⁴ Ku mihuko ya kanwa lienyi mutu makayuka ni yipema; makakundulula kuli mutu mweswe yitanga ya moko jenyi.

¹⁵ Jila ya chihepuke yinapeme ku meso jenyi mwene; alioze mukwa mana kakupanjika ku yiyulo.

¹⁶ Utenu wa chihepuke kuwakumoneka washiwashi; alioze chikanyame kakusweka sonyi.

¹⁷ Yoze mahanjika umwenemwene masolola ululi; alioze chela cha mahuza kakusolola kwonga.

¹⁸ Kwali mukwa kuhanjika kalusulusu ngwe kutuwa cha katana; alioze limi lia mukwa mana kuliakuwuka.

¹⁹ Kanwa lia kuhanjika umwenemwene kumakalikolesa lia mutolo; alioze limi lia mahuza liapwa lia kashimbu wika.

²⁰ Waze akutaka yuma yipi kali ni kwonga mu mbunge jo; alioze akwa kuyula ni sambukila kali ni uwahililo.

²¹ Chuma chipi kuchichi kupwa kuli mukwa ululi; alioze yingulungulu kumakazala ni yipi.

²² Kanwa lia mahuza kuliapwa chizelwokeso kuli Yehova; alioze kakuwahilila ni akwa kulinga umwenemwene.

²³ Chikanyame kakusweka yinyingi; alioze mbunge ja yihepuke kujakwambujola uhepuke wo.

²⁴ Kwoko lia chipalakata kumulikayula; alioze chileya mamusa ku ungamba.

²⁵ Kulema mu mbunge ya mutu kuchakumuhongesa; alioze liji lipema kuliakumuwahisa.

²⁶ Mukwa ululi kakupwa kasongo kuli mukwo; alioze ndako ja chingulungulu kujakumuhengesa.

²⁷ Chileya keshi kwocha yifwo yize ashihanga mu maya; alioze yikumba yipema ya atu kuyapwa kuli chipalakata.

²⁸ Mu ndako ja ululi mwatwama mwono, ni mu majila jajo kumushi kufwa.