Yishima 10 - MUKANDA USANDU WA ZAMBI 1975

¹ Yishima ya Solomone. Mwana wa mana kakuwahisa tato, alioze mwana chihepuke kapwa chinyengo kuli naye.

² Upite wa ungulungulu kuwafumbukile nichimwe, alioze ululi kuwakupulula mutu ku kufwa.

³ Yehova kechi kutayiza mukwa ululi kufwa ni zala, alioze kakuchinda solo lia chingulungulu.

⁴ Mweswe malinga ni kwoko lia uleya meza kuhona, alioze kwoko lia chipalakata kuliakwokesa upite.

⁵ Mweswe makungika ha mwaka wa mbuto iye mwana wa mana, alioze mweswe maya tulo ha mwaka wa kucha iye mwana wa kukolesa sonyi.

⁶ Yiwape yakupwila ha mutwe wa mukwa ululi, alioze kanwa lia chingulungulu kuliakufuka upupilo.

⁷ Kwiwuluka mukwa ululi kuwahacho, alioze jina lia chingulungulu kumulikapola.

⁸ Yoze uli ni mbunge ya mana matambula shimbi, alioze chihepuke mukwa kumbambula kumakalimbuka.

⁹ Yoze wakwenda ni kutuwika cha mbunge kakujikiza, alioze mukwa kuhengesa majila jenyi kumakamunyingika.

¹⁰ Yoze matenya ni liso mamwesa chinyengo, alioze chihepuke mukwa kumbambula kumakalimbuka.

¹¹ Kanwa lia mukwa ululi kuliapwa fuji lia mwono, alioze kanwa lia chingulungulu kulia kufuka upupilo.

¹² Kole kuyakuvundula ndombo, alioze zango kuliakufuka Utanguko weswe.

¹³ Mu mivumbo ya yoze uli ni malinjekela mawana mana, alioze ha nyima lia yoze keshi mbunge malamba ni mbwechi.

¹⁴ Akwa mana kakupachikila yinyingi, alioze kanwa lia chihepuke kuliakukoka kwonwona.

¹⁵ Upite wa pichi kuwapwa limbo likolo, alioze kwonwona cha chiswale we uswale wenyi.

¹⁶ Kuhondangana cha mukwa ululi chatwala ku mwono, alioze kufumbuka cha chingulungulu chatwala ku shili.

¹⁷ Yoze matayiza kumufumba kali mu jila ya mwono, alioze mweswe machina ha kumukanjisa kanapianguka.

¹⁸ Yoze masweka kole kali ni kanwa lia mahuza; mukwa kulamikiza iye chihepuke.

¹⁹ Nyi maliji hoka, Utanguko kuuchi kuhona; alioze mukwa kusúla ku kanwa lienyi kanalingi ni mana.

²⁰ Limi lia mukwa ululi liapwa ngwe prata yipema; alioze mbunge ya chingulungulu kuyafwika yikepe wika.

²¹ Mivumbo ya mukwa ululi kuyakulisa anji; alioze yihepuke kakufwa mumu keshi mbunge.

²² Chiwape cha Yehova kuchakupichisa, ni kechi kuwezako chinyengo.

²³ Kuli chihepuke ungulungulu wapwa ngwe kuheha; chocho nawa kuli mukwa malinjekela.

²⁴ Chize chingulungulu akuvwila woma muchimuwana; ni chize mukwa ululi mazanga mamwahacho.

²⁵ Muze chijimbi hapalika chingulungulu keshiko nawa; alioze mukwa ululi kapwa fundamentu ya mutolo.

²⁶ Chize yapwa vinagre ku mazo ni mwishi ku meso, chocho apwa chileya kuli waze mamutuma.

²⁷ Woma wa Yehova wakwokesa matangwa a mutu; alioze miaka ya chingulungulu kumuyikatepuluka.

²⁸ Kutalatala cha mukwa ululi muchipwa kuwaha; alioze kutalatala cha yingulungulu muchikatoka.

²⁹ Jila ya Yehova yapwa ngwe pembo kuli akwa ululi; alioze yapwa kwonwona kuli akwa kulinga uhenge.

³⁰ Mukwa ululi kechi kakokoloka nilimwe tangwa; alioze chingulungulu kechi katwama mu chifuchi.

³¹ Kanwa lia mukwa ululi kuliakusolola mana; alioze kumakateta limi lia kupiya.

³² Mivumbo ya mukwa ululi yinanyingika chize chapemena; alioze kanwa lia chingulungulu kuliakuhanjika cha kupiya.