Yishima 1 - MUKANDA USANDU WA ZAMBI 1975

¹ Yishima ya Solomone, mwana wa David, mwanangana wa Izalele.

² Ayisonekene hanga malunga akanyingike mana ni kufumba; hanga akase chinyingi maliji a malinjekela;

³ akalilongese mana, ni ululi, ni upatwilo, ni kulita;

⁴ hanga akalongese yizuzuke akakanyame akalongese akweze yinyingi ni maseliekela.

⁵ Mukwa mana nawa kumevwa mba maweza ku yinyingi yenyi ni mukwa malinjekela maliwezela ulangaji,

⁶ ha kunyingika chishima ni ulumbunwiso wacho, maliji a akwa mana ni yijimbikilo yo.

⁷ Woma wa Yehova we uputukilo wa yinyingi, ahoze yihepuke kakulelesa mana ni kufumba.

⁸ Mwanami, panjika ku kufumba cha tatenu; kanda ulituna longeso ha noko;

⁹ mumu kumuyikapwa chipangula cha vumbi cha ha mutwe we ni malenge a uhenya a ha kota ye.

¹⁰ Mwanami, nyi yivulumunyi makuzeza kanda utá.

¹¹ Nyi mamba ngwo, Tweya ni yetu tukatwaminyine kumwanga manyinga, tukajikinyine waze keshi chitela;

¹² tukaamine a mwono ngwe Shiole, tukaamine a muwundu ngwe waze akupalumuka ku jondo.

¹³ Mutukawana yikumba yeswe ya ndando yinene, mutukazalisa mazuwo jetu ni upite wa kupupa.

¹⁴ Kashika ngwo, Ulifutule ni yetu, mutukapwa ni ngonga yimuwika.

¹⁵ Mwanami kanda ukendela jila yimuwika no, kanda ukasa kulu lie mu majila jo,

¹⁶ mumu molu jo kakutambuka ku yipi, kakulipupwisa kumwanga manyinga.

¹⁷ Mumu kutela wanda kwe kumeso ja kajila chamokomoko.

¹⁸ Ahoze wano kakutwaminyina manyinga jo ene, kakujikinyina kulishiha ene.

¹⁹ Chocho japwa majila ja waze akufupa upite wa upupilo; kuwakushihisa enyawo.

²⁰ Mana kakukololoka mu matapalo, kakutambika mu yitanda.

²¹ Kakukololoka mu malindalinda, ku unjililo wa yikolo ya limbo, ngwenyi,

²² Enu yizuzuke, ndo mwiji muka munuzanga uzuzuke? Ndo mwiji muka akwa kulenya mawahilila ni kulenya cho? Ndo mwiji muka yihepuke mavwila kole yinyingi?

²³ Muze mungunukanjisa, hialumukenu. Mungusolola kuli yenu manyonga jami. Mungununyingikisa maliji jami.

²⁴ Mumu hingunasanyika ni yenu kunusolo kupanjika, hingunolola moko jami alioze niumwe katayile.

²⁵ Hinunalengulula yiyulo yami yeswe; kunwazangile kukanjisa chami nichimwe.

²⁶ Kashika ni yami nawa mungukaseha ha luyinda wenu; mungukakekuna muze woma wenu muwiza.

²⁷ Muze woma muunulamba ngwe kangonga; muze luyinda wenu makeza ngwe chijimbi; muze lamba ni huli muliza hali yenu.

²⁸ Mba makangusanyika, alioze yami chichi kukumbulula; mukangufupa chimenemene alioze kuchi kanguwana.

²⁹ O te kazangile yinyingi; katongwele woma wa Yehova.

³⁰ Katayile yiyulo yami; alelesele kukanjisa chami cheswe.

³¹ Kashika kumakalia mihuko ya kwenda cho. Kumakakuta ni yitaka yo ene.

³² Mumu yizuzuke kakufwa mumu ha kumba nyima; yihepuke kakulionwona ni kusehejela cho.

³³ Alioze mweswawo mangwivwa matwama kanawa; kumakahwima ni woma wa yipi wakuhi.