Yilinga 9 - MUKANDA USANDU WA ZAMBI 1975

¹ Alioze Saulu hindu machihwilijela kwomisa nikushiha hali tumbaji twa Mwene, wayile kuli sasendote mukwa lutwe,

² wamwichile mikanda ya kuya ku Ndamaseku, ku masunangonga, kachi mawana amwe a ku Jila yino, apwe malunga, apwe mapwo, akaanehe a kukasa ku Yerusaleme.

³ Shimbu machenda mu wenyi, wakundamine ku Ndamaseku: susumuku mwahenyene pangu mwilu ha kumujingilika.

⁴ Iye walimbukile hashi, wevwile liji lia kwamba kuli iye ngwo, Saulu, Saulu, kuchi te wakunguhungumiona?

⁵ Iye wambile ngwenyi, Mwene, yena iya? Wakumbulwile ngwenyi, Yami Yesu, yoze wakumuhungumiona, chikalu hali yena kutwa yishindo ku musongolwela.

⁶ Iye, nikuchikima, nikulishikishila, wambile ngwenyi, Mwene, kuchi unazange yami ngulinge? Mwene wambile kuli iye ngwenyi, Katuka, uye, ukanjile mu limbo, makakwambulwila chize Chakutamba kulinga.

⁷ Alioze malunga waze endele hamwe nenyi amanyine ngwe tumama, se evwile liji, alioze kamwene niumwe.

⁸ Mba Saulu wakatukile hashi, alioze muze alawile meso jenyi, kamwene nichimwe. Kashika amusongwelele ku kwoko, amutwalile ku Ndamaseku.

⁹ Iye wapwile matangwa atatu keshi meso, kalileko, chipwe kanwineko.

¹⁰ Achi, kwapwile umwe kambaji mu Ndamaseku, jina lienyi Ananiya; Mwene wambile kuli iye mu usolwelo ngwenyi, Ananiya. Iye wambile ngwenyi, Mwene, yami uno.

¹¹ Mwene wambile kuli iye ngwenyi, Katuka, uye ku tapalo lize jina lialio, Lialulama, ukafupe mu zuwo lia Yundase umwe jina lienyi Saulu, wa ku Tarsu: mumu kanalembe;

¹² iye hanamono mu usolwelo lunga jina lienyi Ananiya kananjila, akasayike moko jenyi hali iye, hanga alaule meso.

¹³ Ananiya wakumbulwile ngwenyi, Mwene, hingunevu kuli anji ha kutwala kuli yono lunga, ngwe yipi yinji chikolo hanalingi kuli asandu je ku Yerusaleme:

¹⁴ ni kuno poko ali nayo ya kuli asasendote akwa lutwe ya kukasa waze eswe akutambika ha jina lie.

¹⁵ Alioze Mwene wambile kuli iye ngwenyi, Yako, mumu iye chikwachilo cha kutongola kuli yami, mukutwala jina liami kumeso ja akwa mavungu, ni mianangana, ni ana a Izalele:

¹⁶ mumu mungukamulweza lamba lize linji chamutamba kwivwa mumu ha jina liami.

¹⁷ Mba Ananiya wayile, wanjilile mu zuwo; nikusayika moko jenyi hali iye, wambile ngwenyi, Ndumbwami Saulu, Mwene Yesu, yoze wasolokele kuli yena mu jila yize wejilile, hanangutumu hanga ulaule meso, uzale tò ni Spiritu Musandu.

¹⁸ Haze hene yaholokele ku meso jenyi ngwe yihahi, iye walawile meso, wakatukile, amupapachishile.

¹⁹ Mba walile, walitakamishine. Saulu wapwile matangwa amwe hamwe ni tumbaji a mu Ndamaseku.

²⁰ Haze hene mu masunangonga wambujolele Yesu, ngwenyi, Iye mwe Mwana Zambi.

²¹ Ni waze eswe amuvwile alishikishilile, ngwo, Yono hi yoze ko wapukile mu Yerusaleme waze atambikile ha jina lino, nyi? Ni kuno wejile ha chikuma chino, hanga akaatwale a kukasa kuli asasendote akwa lutwe.

²² Alioze Saulu wahianyine ni tachi, watupiekesele A-Yunda waze atwamine ku Ndamaseku, nikwasolwela yinyingi ngwenyi, Yono mwe Kristu.

²³ Muze matangwa anji amanunukine, A-Yunda atwamine punga akamushihe:

²⁴ alioze liji lia kujikinyina cho liahetele kuli Saulu. O alayile yajilo nawa, mwalwa ni ufuku hanga akamushihe.

²⁵ Alioze tumbaji amutwalile ha ufuku, amusunwishine ku chipanga, nikumuhulumuna hashi mu chiseke.

²⁶ Mba muze ahetele ku Yerusaleme, wesekele kulifutula kuli tumbaji; o eswe amuvwilile woma, se kamufulieleleko ngwe iye kambaji.

²⁷ Alioze Mbamavwe wamutwalile, wamunehene kuli apostolo, wambulwile kuli ayo ngwe hanamono Mwene mu jila, hanahanjika kuli iye, ni ngwe mu Ndamaseku hanahanjika ni hamu mu jina lia Yesu.

²⁸ Iye wapwile hamwe no, nikunjilanjila, nikutuhwoka mu Yerusaleme,

²⁹ nikuhanjika ni hamu mu jina lia Mwene Yesu, nikuhangulula A-Ngresia; alioze afupile kumushiha.

³⁰ Muze mandumbu achiselele chinyingi, amutwalile ku Sesarea, amutumine ku Tarsu.

³¹ Chocho chikungulwila mu Yundeya mweswe ni Ngalileya ni Samaria ahwimine, alikolezele; endele mu woma wa Mwene ni mu kulembejeka cha Spiritu Musandu, mba okele.

³² Petulu, shimbu mapalieka mu chifuchi, wapalumukine kuli asandu waze atwamine ku Lita.

³³ Kuze awanyine umwe lunga, jina lienyi Eneya, te hapomba miaka nake ha chalo chenyi, mumu wapwile mukwa kalepa.

³⁴ Petulu wambile kuli iye ngwenyi, Eneya, Yesu Kristu kanakuhindwisa: hinduka, wale chalo che. Haze hene wahindukile.

³⁵ Waze eswe atwamine ku Lita ni mu Sarone, amumwene, o atewulukilile kuli Mwene.

³⁶ Achi, kwapwile ku Yopa umwe kambaji, jina lienyi Tavwita, Unalumbunuka Kai: yono pwo wazalile tò ni yitanga yipema ni kuhana cha yawana yize alingile.

³⁷ Ha matangwa aze Wayijile, wafwile: ni muze hamusanyisa, amusele mu chipatulo cha kwilu.

³⁸ Se Lita chili hakamwihi ni Yopa, tumbaji se evwile ngwo, Petulu ko kwali, atumine malunga aali kuli iye nikumulemba ngwo, Kanda ulaluka kwiza kuli yetu.

³⁹ Petulu wakatukile, wayile hamwe no. Muze ahetele, amukandwishile ku chipatulo cha kwilu: ni twamishi ja mapwo amanyine hehi nenyi nikulila, nikulweza yikuto ni mahina aze aatongelele Kai, shimbu apwile hamwe no.

⁴⁰ Alioze Petulu Watuhwishile eswe, waliumbile makungunwa jenyi, walembele; iye, nikutewulukila ku mujimba, wambile ngwenyi, Tavwita, hinduka. Iye walawile meso, ni muze amwene Petulu Watwamine.

⁴¹ Iye wamuhele kwoko lienyi, wamuhindwishile; watambikile asandu ni twamishi ja mapwo, wamukunjikile kuli ayo ni mwono.

⁴² Mba achinyingikine ndusu mu Yopa mweswe, ni anji afulielele Mwene.

⁴³ Iye Watwamine matangwa anji mu Yopa hamwe ni umwe Semone mukwa kukotongola.