Yilinga 8 - MUKANDA USANDU WA ZAMBI 1975

¹ Saulu te kanatayiza kufwa chenyi. Ha tangwa lize kwakatukile yihungumiona yinene ha chikungulwila chize chapwile mu Yerusaleme; ni eswe amwanganyine mwamwa mu yifuchi ya Yundeya ni Samaria, alioze apostolo, ka.

² Akwa kuwayila afunjile Eshetevau, alilile mbimbi chikolo hali iye.

³ Alioze Saulu Wenyekene chikungulwila, nikunjila mu zuwo ni zuwo, nikumbulumuna malunga ni mapwo, waakunjikile ku zuwo lia ususu.

⁴ Waze kashika amwanganyine ayile kweswe nikwambujola lie liji.

⁵ Fwilipe wapalumukine ku limbo lia Samaria, wambujolele Kristu kuli ayo.

⁶ Mbunga apanjikile ni mbunge yimuwika ku yuma yize ahanjikile Fwilipe, nikwivwa nikumona yilayi yize alingile.

⁷ Mumu maspiritu a luchisa atuhukile muli anji a kuli waze apwile no, nikukololoka ni liji linene: ni akwa kalepa anji ni yilema aawukile.

⁸ Mwapwile uwahililo unene mu limbo lize.

⁹ Alioze kwapwile umwe lunga, jina lienyi Semone, yoze matangwa a kunyima mu limbo walingile ni tufutafuta, washimine vungu lia Samaria ngwenyi, Yami mutu munene:

¹⁰ o eswe amupanjikile chize kuli akepe ndo kuli anene, nikwamba ngwo, Yono mwe tachi wa Zambi, yoze anamuvuluka ngwo, Munene.

¹¹ O apanjikile kuli iye, mumu te ha shimbu linene waashimine ni tufutafuta twenyi.

¹² Alioze muze afulielele Fwilipe ha kwambujola sango lipema lia kutwala ku wanangana wa Zambi ni jina lia Yesu Kristu, aapapachishile, ni malunga ni mapwo.

¹³ Semone mwene wafulielele: ni muze te hamupapachisa, wanyongonwene ni Fwilipe; iye, ha kumona yipupu yize alingile, walishikishilile.

¹⁴ Muze apostolo waze apwile mu Yerusaleme evwile ngwo, A-Samaria hatambula liji lia Zambi, atumine kuli ayo Petulu ni Yoano;

¹⁵ wano, muze te hapalumuka, alembele hali ayo hanga atambule Spiritu Musandu:

¹⁶ mumu iye kanda achiza hali niumwe hakachi ko: alioze haapapachisa wika mu jina lia Mwene Yesu.

¹⁷ Hohene asayikile moko jo hali ayo, no atambwile Spiritu Musandu.

¹⁸ Achi, muze Semone amwene ngwe ahanyine Spiritu ha kusayika cha moko ja apostolo, wafupile kwaaha mbongo,

¹⁹ ngwenyi, Ngwehenu nawa chiyulo chino, hanga hali mweswe mungusayika moko jami akatambule Spiritu Musandu.

²⁰ Petulu wambile kuli iye ngwenyi, Prata je jikatoke hamwe ni yena, mumu hiwashinginyeka kuzuka chawana cha Zambi ni mbongo.

²¹ Kushi chihanda chipwe chipinji ha chuma chino: mumu mbunge ye kuyalulamine kumeso ja Zambi.

²² Likonyeke kashika ha uno uhuka we, uliumbe kuli Mwene kachi makukonekena kama chitaka cha mbunge ye.

²³ Mumu ngunakumono ngwe uli mu kasashisa ka usasu ni mu kana lia uhenge.

²⁴ Semone wakumbulwile ngwenyi, Ngulembelenu kuli Mwene, hanga nichimwe cha yuma yino hiwamba kuchichi keza hali yami.

²⁵ O kashika, muze te ha shindakenya chikolo, hahanjika liji lia Mwene, ahilukile ku Yerusaleme, nikwambujola sango lipema ku yihunda yinji ya A-Samaria.

²⁶ Alioze mungelo wa Mwene wahanjikile kuli Fwilipe ngwenyi, Katuka, uye ku Sule mu jila yize ya kukatuka ku Yerusaleme ya kupalumuka ku Ngeza: yenayo puya.

²⁷ Iye yakatuka, yaya: ni kumanyi, umwe unuku, Ka-Etiopia, wa chiyulo kushi lia Kandese, mwanangana wa A-Etiopia, iye wapwile ni chiyulo helu lia upite wenyi weswe, te heza mukuwayila ku Yerusaleme;

²⁸ machihiluka nikutwama mu temba lienyi, kanatange mukanda wa profeta Izaia.

²⁹ Spiritu wambile kuli Fwilipe ngwenyi, Kundama, uye ni temba lino.

³⁰ Fwilipe wazombokele kuli iye, wamuvwile kutanga mukanda wa profeta Izaia, wambile ngwenyi, Unanyingika chize unatange, nyi?

³¹ Iye wambile ngwenyi, Ngwe kuchi munguhasa shina umwe mangusongwela? Iye walembele Fwilipe anyine atwame nenyi.

³² Chihanda cha chisoneko chize atangile chapwile chino ngwo, Amutwalile ngwe panga ku Chishihilo; ngwe mwana-panga kumeso ja yoze wakumukamba mahola kulungunga kwenyi, chocho kapakwile kanwa lienyi.

³³ Ha kumulelesa, achijile upatwilo wenyi: mba iya makambulula chisemuko chenyi? Se mwono wenyi unasutuka hano hashi.

³⁴ Unuku wakumbulwile kuli Fwilipe, ngwenyi, Ngunakulembe ngwami, Hali iya profeta anambe chino, shina hali iye mwene nyi, shina hali umwe weka?

³⁵ Fwilipe Wapakwile kanwa lienyi, iye, nikuputuka ku chisoneko chino, wamwambulwilile sango lipema lia Yesu.

³⁶ Shimbu machiya mu jila, ahetele ku amwe meya, unuku yamba ngwenyi, Meya ano; chika chinangukwika kutambula upapachiso?

³⁷ Fwilipe wambile ngwenyi, Nyi Unafuliela ni mbunge ye yeswe, muchilita. Iye wakumbulwile ngwenyi, Ngunafuliela Yesu Kristu iye mwe Mwana Zambi.

³⁸ Iye wambile temba limane; apalumukine nikunjila mu meya, ni Fwilipe ni unuku, iye wamupapachishile.

³⁹ Muze atutukile mu meya, Spiritu ya Mwene wapindumwine Fwilipe; unuku kamumwene nawa, mumu wayile kwenyi nikuwahilila.

⁴⁰ Alioze Fwilipe amuwanyine ku Azote: iye nikupalika ndusu wambujolele sango lipema ku membo eswe ndo wahetele ku Sesarea.