Yilinga 7 - MUKANDA USANDU WA ZAMBI 1975

¹ Sasendote mukwa lutwe wambile ngwenyi, Yino yuma chocho yapwa, nyi?

² Eshetevau wambile ngwenyi, Mandumbu ni atata, ivwenu ngwami, Zambi ya uhenya wasolokele kuli kulwetu Apalahama, muze apwile mu Mesopotamia, shimbu kanda atwama mu Ha-rane,

³ wambile kuli iye ngwenyi, Katuka ku chifuchi che, ni kuli usoko we, ukaye ku chifuchi chize mungukakulweza.

⁴ Hohene wakatukile ku chifuchi cha A-Kaletea: watwamine mu Harane, ni muze te tato hafwa, Zambi wamututulwilileko ndo ku chifuchi chino, muno mwatwama yenu haliapwila:

⁵ alioze kamuhelemo chihinga nichimwe, chipwe haze masa chiliato chenyi, ka: hindu walakenyene kunwahacho akachipite iye mwene, ni munyachi wenyi kulutwe lienyi, shimbu te kanda apwa ni mwana.

⁶ Zambi wahanjikile Chichino ngwenyi, Munyachi we muukapwa njize mu chifuchi cha mbala, makaapwisa ndungo, makaalinga chipi, kulakaji awana a miaka.

⁷ Ni vungu lize kuli ayo makapwa mu undungo, mungukaapatwila, chocho ambile Zambi ngwenyi, Mba kulutwe lia chize kumakatuhuka akangulingile muma muno.

⁸ Iye wamuhele usendo wa ungalami: chocho Apalahama wasemene Izake, wamupwishile ngalami ha tangwa liamuchinake; Izake wasemene Yakomba, Yakomba wasemene kumi lia tulamba ni tulamba aali.

⁹ Tulamba, se evwilile ukwa José, amulanjishile ku Engitu: alioze Zambi wapwile hamwe nenyi.

¹⁰ Wamupulwile ku luyinda wenyi mweswe, wamuhele vumbi ni mana kumeso ja Falau, mwanangana wa Engitu: iye wamusele nguvulu helu lia Engitu ni helu lia zuwo lienyi lieswe.

¹¹ Achi, kwejile kapunga ha chifuchi cheswe cha Engitu ni Kanana, ni luyinda munene; ni tulamba twetu kawanyine kulia nichimwe.

¹² Alioze muze Yakomba evwile ngwo, Tiliku ku Engitu kuyili, watumine tulamba twetu hatangu.

¹³ Ha kuya kamuchiali, José Walinyingikishine kuli ayayo, mba asolwele munyachi wa José kuli Falau.

¹⁴ José watumine akatambike tato Yakomba akeze kuli iye, ni usoko wenyi eswe, makumi shimbiali a atu ni atu atano.

¹⁵ Yakomba wapalumukine ku Engitu; wafwile, iye ni tulamba twetu;

¹⁶ mba aatwalile ku Shekeme, aafunjile mu fuka lize alanjile Apalahama ni ndando ya mbongo kuli ana ja Hamore mu Shekeme.

¹⁷ Alioze shimbu mwaka wa chilakenyo muuchikundama, chize alakenyene Zambi kuli Apalahama, atu asemanganyine, okele mu Engitu.

¹⁸ Ndo mwanangana weka wasolokele mukuyula A-Engitu, yoze kanyingikine José.

¹⁹ Iye walingile ni kalimbavuli hali akwa munyachi wetu, walingile chipi kuli tulamba twetu, nikumbilisa haze ana-akemba jo hanga kechi kapwa ni mwono.

²⁰ Ha mwaka uze Mose wasemukine, wavumbile kuli Zambi; o amulelele tukweji atatu mu zuwo lia tato:

²¹ mba muze amumbilile, mwana Falau wa pwo wamwanjile, wamulelele hanga akapwe mwanenyi.

²² Mose wafumbiwile ni mana eswe a Engitu, wapwile mukwa tachi ha maliji jenyi ni yitanga yenyi.

²³ Muze apwile ni makumi awana a miaka pundu, chejile ku mbunge yenyi kumeneka usoko wenyi ana a Izalele.

²⁴ Iye, ha kumona umwe amulingile chipi, waakandunwine, wakalile yoze wamwene lamba, walambile Ka-Engitu.

²⁵ Iye washinginyekene ngwe usoko wenyi manyingika ngwo, Zambi maalamwina ku kwoko Henyi; alioze kachinyingikine.

²⁶ Ha tangwa likwo, wasolokele kuli ayo shimbu machizwela, wafupile kwawanyisa ni sambukila ngwenyi, Malunga, yenu nuli mandumbu; ika te nunalilingi chipi?

²⁷ Alioze yoze walingile chipi kuli mwenyembo wenyi, wamuchinjile ngwenyi, Iya wakupwishile mukwa kuyula ni sopi hali yetu?

²⁸ Unazange kungushiha ngwe unakashiha Ka-Engitu zau, nyi?

²⁹ Mba Mose wachinyine ha liji lino, wapwile njize mu chifuchi cha A-Mindiane, kuze wasemene ana aali a malunga.

³⁰ Muze makumi awana a miaka amanunukine, mungelo wa Mwene wasolokele kuli iye mu puya ya mulundu wa Sinai, mu mulengi wa kahia mu chiputa.

³¹ Muze Mose achimwene, wakomokene ha usolwelo: ni shimbu akundamine mukutala, liji lia Mwene liejile kuli iye,

³² ngwo, Zambi ya tulamba twe yami, Zambi ya Apalahama, ya Izake, ya Yakomba. Ni Mose wachikimine, kahamukineko kutala.

³³ Mwene wambile kuli iye ngwenyi, Zula haku je ku molu je: mumu homa hano unamana hasandu.

³⁴ Yami chamwenemwene hingunamono yihungumiona yize akumona atu jami, waze ali mu Engitu, hingunevu mikuma yo, hingunahulumuka mukwapulula. Haliapwila tweya, mungukutuma ku Engitu.

³⁵ Yono Mose, alitunyineye, ngwo, Iya wakupwishile mukwa kuyula, sopi? Zambi wamutumine ngwe mukwa kuyula ni mukwa kukula ni kwoko lia mungelo yoze wasolokele kuli iye mu chiputa.

³⁶ Yono Waachijileko nikulinga yipekesa ni yilayi mu chifuchi cha Engitu, ni mu Kalunga-lwiji Muchila, ni mu puya makumi awana a miaka.

³⁷ Mose yoze wambile kuli ana a Izalele ngwenyi, Zambi kumakasolola profeta kuli yenu wa kuli usoko wenu, wa kulifwa ni yami; iye nukamwivwe.

³⁸ Yono wapwile mu chikungulwila mu puya, hamwe ni mungelo yoze wahanjikile kuli iye ha mulundu wa Sinai, ni hamwe ni tulamba twetu: iye watambwile maliji a mwono hanga akatweho:

³⁹ kuli iye tulamba twetu katayile kwononoka, alioze amuchinjile kuli ayo, atewulukilile kunyima mu mbunge jo ku Engitu.

⁴⁰ Ambile kuli Arone ngwo, Tutangilenu mazambi, waze matutetekela: se hali yono Mose, watuchijile ku chifuchi cha Engitu, kutwanyingikine chize chinamuwane.

⁴¹ Atangile mwana-ngombe ha matangwa aze, alambwile chitapo ku hamba, evwile chiseke ha chitanga cha moko jo.

⁴² Alioze Zambi wombile nyima, waechelele kulingila chizavu cha mwilu, ngwe chinasonewa mu mukanda wa aprofeta ngwo, Yenu akwa zuwo lia Izalele, nwangulambwile yitapo ni milambu makumi awana a miaka mu puya, nyi?

⁴³ Ewa, nwanjile mbalaka ya Moloko, ni lutongonoshi wa zambi yenu Refwame, tuponya aze nwaatangilemuk wakombelela: kumungukanututulwila kuze-kanda lia Babilonia.

⁴⁴ Tulamba twetu apwile ni mbalaka ya Shindakenyo mu puya, chizechene ngwe yoze wahanjikile kuli Mose, wahanyine shimbi, ngwo, Akachihinge nikulita ni cheseko chize hamona kulu.

⁴⁵ Yize nawa tulamba twetu ayitambwile waze atetekelele, ayinehene hamwe ni Yoshua muze anjilile mukupita chifuchi cha akwa mavungu, waze Zambi Watuhwishile kumeso ja tulamba twetu ndo ku matangwa ja David.

⁴⁶ Iye wawanyine vumbi kumeso ja Zambi, wechile akawane mbalaka hali Zambi ya Yakomba.

⁴⁷ Alioze Solomone wamutungilile zuwo.

⁴⁸ Hindu mwe Chitunda keshi kutwama mu matembele a kutunga ni moko; ngwe anambe profeta ngwenyi,

⁴⁹ Ngunja yami lie lilu, ni hashi hanapu chitwamo cha yiliato yami: Zuwo lika mukangutungila? Chocho anambe Mwene ngwenyi: Hanji mulihi muma mwa uhwimino wami?

⁵⁰ Kwoko liami kuliatangile yino yuma yeswe, nyi?

⁵¹ Yenu nwakukala ni pami, nuli yilima ku mbunge ni ku matwi, yenu matangwa eswe nwakulinjika ni Spiritu Musandu; chizechene ngwe tulamba twenu, chocho ni yenu nawa nwakulinga.

⁵² Iya hakachi ka aprofeta, tulamba twenu kamuhungumioneneko? O hanashihi waze ambulwile Shimbu-kanda ha kutwala ku kwiza cha Mukwa Ululi; kuli iye yenu nunapu haliapwila akwa kuhandukulula ni yingalwe.

⁵³ Yenu nwatambwile shimbi, yize ayihanyine ku kwoko lia angelo, alioze kunwayifungileko!

⁵⁴ Achi, muze evwile yino yuma, alichokele mu mbunge, alikopwele ku mazo hali iye.

⁵⁵ Alioze iye, kanazala tò ni Spiritu Musandu, wahulikilile mwilu, wamwene uhenya wa Zambi, ni Yesu kanamana ku chindume cha Zambi.

⁵⁶ Mba wambile ngwenyi, Talenu, ngunamono malilu kanazuluka, ni mwe Mwana Mutu kanamana ku chindume cha Zambi.

⁵⁷ Alioze akololokele ni liji linene, ajikile matwi jo, alundumukine hali iye ni mbunge yimuwika;

⁵⁸ amumbilile haze lia limbo, amwashile mawe; ni yela atumbikile mazalo jo ku molu ja umwe mukweze, jina lienyi, Saulu.

⁵⁹ O ashile mawe Eshetevau, iye te kanakololoka ngwenyi, Mwene Yesu, tambula kama Spiritu yami.

⁶⁰ Mba waliumbile makungunwa, wakololokele ni liji linene ngwenyi, Mwene, kanda uatwika mulonga uno. Muze te hamba chino wayile tulo.