Yilinga 6 - MUKANDA USANDU WA ZAMBI 1975

¹ Achi, ha matangwa aze, tumbaji se hoka, kwapwile kulinyenyeta cha A-Ngresia hali A-Hepreu, mumu ahungwile twamishi jo a mapwo ha kupangila cha tangwa ha tangwa.

² Kashika kumi ni aali atambikile chizavu cha tumbaji kuli ayo, ambile ngwo, Kuchapemenene yetu tuhichike liji lia Zambi, tukavumbike ku mesa.

³ Kashika mandumbu, fupenu hakachi kenu malunga shimbiali, akwa Shindakenyo, a tò ni Spiritu Musandu ni mana, aze mutwasela ku milimo yino.

⁴ Alioze yetu mutunyongonona kulemba ni ku uvumbiko wa liji.

⁵ Liji lino Kapemenene chizavu cheswe: mba atongwele Eshetevau, lunga wa tò ni Ufulielo ni Spiritu Musandu, ni Fwilipe, ni Prokoru, ni Nikanore, ni Timau, ni Parmena, ni Nikolau, mukwa kutayiza wa ku Andiakia;

⁶ waze aasele kumeso ja apostolo: mba muze te halemba, asayikile moko jo hali ayo.

⁷ Mba liji lia Zambi liafumanyine; tumbaji okele kuhiana mu Yerusaleme; mbunga yinene ya asasendote ononokene ku Ufulielo.

⁸ Mba Eshetevau, wa tò ni vumbi ni tachi, walingile yipekesa ni yilayi yinene hakachi ka atu.

⁹ Alioze kwakatukile amwe akwa sunangonga yize ya Libertino, ni amwe a kuli A-Serene, ni a kuli A-Alezandre, ni a kuli akwa Selishia, ni a ku Eshia, mukuhangulula ni Eshetevau.

¹⁰ O kahashile kulimika ni mana ni Spiritu yoze wahanjikile nenyi.

¹¹ Hohene akapwile amwe malunga akashindakenye mahuza, waze ambile ngwo, Hitunamwivu nikuhanjika maliji a kushililika Mose ni Zambi.

¹² O avundwile atu, ni makulwana, ni akwa kusonyeka, yalundumuka hali iye, yamukwata, yamuneha kumeso ja akwa kuyula.

¹³ Asele yela ja mahuza, waze ambile ngwo, Yono mutu keshi kulitwamina kuhanjika maliji a kulimika ni kuma kuno kusandu, ni ye shimbi.

¹⁴ Mumu twamuvwile nikwamba ngwenyi, Yono Yesu Ka-Nazare kumakonwona kuma kuno, iye kumakalumuna ndako jize atukunjikile Mose.

¹⁵ Ni waze eswe atwamine mukuyula, ha kumuhulikila meso amwene meso jenyi ngwe ku meso ja mungelo.