Yilinga 5 - MUKANDA USANDU WA ZAMBI 1975

¹ Alioze umwe lunga jina lienyi Ananiya, hamwe ni mukwo-pwo Safira, walanjishile upite umwe,

² mba waswekele chihanda cha ndando, mukwo-pwo nawa kanachinyingika, wanehene chimwe chihanda, wachitumbikile ku yiliato ya apostolo.

³ Alioze Petulu wambile ngwenyi, Ananiya, kuchi te Satana hanazalisa mbunge ye kuhanjika mahuza kuli Spiritu Musandu, ukasweke chihanda cha ndando ya munda?

⁴ Shimbu kanda uulanjisa, kuwapwile niwe, nyi? Ni muze hiwaulanda, kuwapwile mu chiyulo che, nyi? Ngwe kuchi hiunase chuma chino mu mbunge ye? Kwahanjikile mahuza kuli atu, alioze kuli Zambi.

⁵ Ananiya ha kwivwa maliji ano, walimbukile hashi, wafwile; ni woma wunji wejile hali waze eswe achivwile.

⁶ Akweze yakatuka, yamuvunga, yamumbata haze, yamufunda.

⁷ Kwapwile ngwe shimbu lia ola jitatu kulutwe, muze mukwo-pwo anjilile, se kanyingikine chize chapwile.

⁸ Petulu wakumbulwile kuli iye ngwenyi, Ngwambulwile kachi nwatanjishile munda ha ndando yinganji? Iye wambile ngwenyi, Ewa, ha ndando yize yene.

⁹ Alioze Petulu wambile kuli iye ngwenyi, Kuchi te hinunalikundu kweseka Spiritu ya Mwene? Tata, yiliato ya waze afundanga mukwenu-lunga ku chikolo yili, no kumakakumbata haze.

¹⁰ Iye walimbukile haze hene ku yiliato yenyi, wafwile. Akweze anjilile yamuwana hanafu, yamumbata haze, yamufunda ku lumbu lia mukwo-lunga.

¹¹ Ni woma wunji wejile ha chikungulwila cheswe, ni hali waze eswe evwile yino yuma.

¹² Mba ku moko ja apostolo alingile yilayi yinji ni yipekesa hakachi ka atu: o apwile ni mbunge yimuwika mu Senge lia Solomone.

¹³ Alioze a kuli akwo niumwe wahamukine kulinunga no: alioze atu aachichimiekene;

¹⁴ ni akwa kufuliela, yizavu ya malunga ni mapwo, aawezele kuli Mwene:

¹⁵ chocho anehene mieji ku mikwakwa, aasele ha miu ni yisalo, hanga chipwe Chizulie wika cha Petulu, ha kupalika, chikazutamine kama amwe a kuli ayo.

¹⁶ Ni chizavu nawa cha ku membo a kujingilika Yerusaleme akungamine, nikuneha mieji ni waze aapinjishile kuli maspiritu a luchisa, o aawukile eswe.

¹⁷ Alioze sasendote mukwa lutwe wakatukile, ni waze eswe apwile hamwe nenyi, (te mbunga ya A-Satuseu), te kanazala tò ni ukwa.

¹⁸ Akwachile apostolo, aasele mu zuwo lia ususu.

¹⁹ Alioze ha ufuku mungelo wa Mwene wazulwile mapito ja zuwo lia ususu, Waatwalile haze, wambile ngwenyi,

²⁰ Yénu, nukamane mu tembele, nukahanjike kuli atu maliji eswe a mwono uno.

²¹ O muze achivwile, anjilile ha kucha mu tembele, nikulongesa. Alioze sasendote mukwa lutwe wahetele ni waze apwile hamwe nenyi, atambikile akwa kuyula ni makulwana eswe a ana a Izalele alikungulule, atumine ku zuwo lia ususu, akaanehe.

²² Alioze tupita waze ayile, kaawanyine mu zuwo lia ususu; o ahilukile, aambulwilile

²³ ngwo, Twawananga zuwo lia ususu lia kwajila kanawa, ni tulayi kanamana haze ku mapito: alioze muze twazululanga, kutwawanyinemo niumwe.

²⁴ Muze kapitau ka tembele ni asasendote akwa lutwe evwile maliji ano, akakashanyine chikolo hali ayo te chize chuma chino muchiza kupwa.

²⁵ Mba umwe wejile, wambulwile kuli ayo ngwenyi, Kumanyi, malunga waze nunakaasa mu zuwo lia ususu, mwali mu tembele, kanamana nikulongesa atu.

²⁶ Hohene kapitau wayile hamwe ni tupita, waanehene, alioze kaalambile; mumu evwile woma wa atu kuchina maasa mawe.

²⁷ Muze te haaneha, aasele kumeso ja akwa kuyula. Ni sasendote mukwa lutwe waahulile ngwenyi,

²⁸ Tunakanwaha koki ngwetu, Kanda nukalongesa mu jina lino: ni kumanyi, hinunazalisa Yerusaleme ni longeso lienu, nunafupu kuneha manyinga ja yono mutu hali yetu.

²⁹ Alioze Petulu ni apostolo aakumbulwile, ngwo, Chatutamba kwononoka kuli Zambi, hi kuli atu ko.

³⁰ Zambi ya tulamba twetu wahindwishile Yesu, yoze nwashihile ha kumuzezeleka ha mutondo.

³¹ Iye Zambi wamunangamishine ku kwoko lienyi lia chindume akapwe Kaputu kanda Chilamwina, mukuhana kuli akwa Izalele kulikonyeka ni ukonekeno wa milonga.

³² Ni yetu tuli yela ja yino yuma; ni Spiritu Musandu nawa, yoze Zambi hanahana kuli waze akumwononokena.

³³ Alioze, muze evwile chino, alichokele mu mbunge, azangile kwashiha.

³⁴ Alioze kwakatukile hakachi ka akwa kuyula umwe Ka-Fwariseu, jina lienyi Ngamaliele, longeshi ya shimbi, walemene kuli atu eswe, wambile atuhwise apostolo haze hakepe.

³⁵ Iye wambile kuli ayo ngwenyi, Malunga a Izalele, keyelenu kuli yenwene ha kutwala ku chize nunambe kulinga kuli wano atu;

³⁶ mumu kushi kwakatukile Teunda, kanambe ngwenyi, Yami munene; kuli iye atu amwe ngwe kulakaji awana alinungine: amushihile; ni waze eswe amwononokenene amwanganyine, apwile amokomoko.

³⁷ Kulutwe lia iye kwakatukile Yundase, Ka-Ngalileya, ha matangwa a kusoneka atu, wakokele atu anji kunyima yenyi: iye nawa watokele; ni waze eswe amwononokenene amwanganyine.

³⁸ Haliapwila ngunambe kuli yenu ngwami, Litwaminenu kuli wano atu, aechenu ukawo: mumu kachi chiyulo chino hanji chitanga chino chinakatuka kuli atu, makachonwona:

³⁹ alioze kachi chinakatuka kuli Zambi, kunuchi kahasa kuchonwona; kuchina hanji manuwana nunalitachika ni Zambi.

⁴⁰ O yatá kuli iye: ni muze te hatambika apostolo, aalambile, aahele koki ngwo, Kanda nukahanjika mu jina lia Yesu, mba aechele kuya.

⁴¹ O kashika akatukile kumeso ja akwa kuyula, nikuwahilila se Zambi aanyongene akwa kutela kusauka ha lie Jina.

⁴² Mba tangwa ha tangwa, mu tembele ni ku zuwo ni zuwo, kalitwaminyineko kulongesa, nikwambujola sango lipema ngwo, Yesu iye mwe Kristu.