Yilinga 3 - MUKANDA USANDU WA ZAMBI 1975

¹ Achi, Petulu ni Yoano akandukile hamuwika ku tembele ha ola ya kulemba, ye ola yamuchilivwa.

² Mba umwe lunga, chilema chize ku jimo lia naye, apwile nikumumbata, nikumusela tangwa ha tangwa ku chikolo cha tembele, jina liacho, Chipema, mukwita yawana kuli waze manjila mu tembele;

³ iye nikumona Petulu ni Yoano himanjila mu tembele, waechile yawana.

⁴ Petulu hamwe ni Yoano, wamuhulikilile meso, wambile kuli iye ngwenyi, Tala kuli yetu.

⁵ Iye watalile kuli ayo, nikushinginyeka ngwe matambula chimwe kuli ayo.

⁶ Petulu wambile ngwenyi, Prata ni oru chishi nayo; alioze chize nguli nacho ngunakwehe: mu jina lia Yesu Kristu Ka-Nazare, katuka, wende.

⁷ Mba yamukwata ku kwoko lia chindume, yamukatwisa; ni haze hene, yiliato yenyi ni tusendengele twenyi ajikijile.

⁸ Iye, nikunyangumuka wakatukile, waputukile kwenda, wanjilile hamwe no mu tembele, nikwenda, nikutumbuka, nikuhalisa Zambi.

⁹ Atu eswe amumwene, nikwenda, nikuhalisa Zambi:

¹⁰ mba amusele chinyingi ngwo, Yoze watwaminyinyine yawana ku chikolo Chipema cha tembele; o akomokene chikolo, alishikishilile kuhiana ha chize alingile kuli iye.

¹¹ Shimbu akwachile Petulu ni Yoano, atu eswe azombokele nikulikungulula kuli ayo mushi lia Senge jina lialio Lia Solomone, nikukomoka chikolo.

¹² Petulu ha kuchimona, wambile kuli atu ngwenyi, Yenu A-Izalele, kuchi te nunalishikishila ha chino? Hanji kuchi te nunatuhulikila meso ngwe ni tachi ja yetwene hanji uwayilo wa yetwene twamwendesanga?

¹³ Zambi ya Apalahama, ya Izake, ya Yakomba, Zambi ya akaka, hahana uhenya kuli Kavumbi kenyi Yesu; yoze yenu nwamukunjikile, nwalikalileye kumeso ja Pilatu, muze iye ambile kumutusula.

¹⁴ Alioze yenu nwalikalile mwe Musandu, kanda Mukwa ululi, nwechile akanwehe chingalwe.

¹⁵ Nwashihile mwe Kaputu ka mwono; yoze Zambi wamuhindwishile hakachi ka afu; ha chino yetu tuli yela.

¹⁶ Mba ku Ufulielo ku jina lienyi, jina lienyi hiunatakamisa yono nunamumono, nunamunyingika: ngwami, Ufulielo uze kuli iye hiunamwehe mujimba uno ungunu kumeso ja yenu eswe.

¹⁷ Haliapwila, mandumbu, ngunanyingika nwachilingile ni kwalajala, ngwe nawa akwa kuyula jenu;

¹⁸ alioze Zambi chocho hanamanununa chize ambulwile Shimbu-kanda ku makanwa ja aprofeta jenyi eswe ngwo, Kristu yenyi makevwa lamba.

¹⁹ Likonyekenu kashika, nyalumuke, hanga milonga yenu yikajimuke, ni chocho miaka ya kuhuzuluka yikeze ya kumeso ja Mwene;

²⁰ hanga akatume Yesu Kristu, yoze anutongweleleye Shimbu-kanda;

²¹ chatamba kumutambula mwilu ndo ku miaka ya kululikisa yuma yeswe, ha kutwala ku yize Zambi wahanjikile ku makanwa ja aprofeta jenyi asandu chize ku miakulwila.

²² Mose chamwenemwene wambile ngwenyi, Mwene Zambi yenu kumakasolola profeta kuli yenu wa kuli usoko wenu, wa kulifwa ni yami; iye nukamwivwe ha yu ma yeswe makamba kuli yenu.

²³ Mba kumuchikapwa, mutu mweswe kechi kevwa profeta yoze, kumakamwenyeka liakulu hakachi ka atu.

²⁴ Chamwenemwene aprofeta eswe, chize kuli Samuel ni waze akuhata kulutwe, waze eswe ahanjikile, ambulwile nawa matangwa ano.

²⁵ Yenu nuli ana ja aprofeta ni ja usendo uze Zambi wakwachile ni tulamba twetu, nikwamba kuli Apalahama ngwenyi, Mu munyachi we majimo eswe a hashi kumakawaha.

²⁶ Kuli yenu hatangu, Zambi, se hanasolola Kavumbi kenyi Yesu, wamutumine mukunuwahisa, ha kunukondolola mutu mweswe ku ungulungulu wenyi.