Yilinga 28 - MUKANDA USANDU WA ZAMBI 1975

¹ Muze te hatulamwina, hohene twasele chinyingi jina lia tungu ngwo, Melita.

² Enyaho atulwezele utu wunji: mumu awikile kahia, atutambwile eswe, mumu ha vula yoze te unanoko, ni mumu ha chishika.

³ Alioze muze te Paulu hakunga jimwe tete, wajisele ha kahia, chihili watuhukile mu kavumia, wakwachile kwoko lienyi.

⁴ Muze enyembo amwene kashitu musasu kanasukama ku kwoko lienyi, aliambile umwe kuli mukwo ni mukwo ngwo, Yono lunga chingalwe wate, chipwe hamulamwina ku kalungalwiji, hindu chiyulo cha mwilu kuchamutayijile kutwama ni mwono.

⁵ Alioze wakukumwine kashitu mu kahia, kevwile yikola niyimwe.

⁶ Atalile ngwe majimba, hanji malimbuka hashi susumuku, akafwe: alioze muze te hatalatala ha shimbu linene, kamwene chipi nichimwe kuli iye, alikonyekene nikwamba ngwo, Yono kumanyi, zambi umwe.

⁷ Achi, mu chifuchi cha kusulangana, kwapwile chijima cha mukwa lutwe wa mu tungu, jina lienyi Pupiliu; watusambililile, watuzuinbwile matangwa atatu, ni kulikata chipema.

⁸ Tato ya Pupiliu te kanapombo ni kachiki nikulokoka mu jimo: kuli iye Paulu wanjilile, walembele, nikusayika moko jenyi hali iye, wamuhindwishile.

⁹ Alioze muze alingile chino, akwo nawa waze apwile ni misongo mu tungu yeza, yaawuka.

¹⁰ O nawa atulemesene ni ulemu wunji; ni ha kukatuka chetu, atuhele mianu.

¹¹ Kulutwe lia tukweji atatu, twakatukile nikwenda mu ulungu uze watwamine mwaka wa chishika mu tungu, wa ku Alezandre, uze chinyingi chawo chapwile Mapasa.

¹² Mba nikuheta ku Serakusa, twasalileko matangwa atatu.

¹³ Twakatukile kuze nikujinga, twahetele ku Rejiu: ni kulutwe lia tangwa limuwika, fuji yalumukine ku Sule, ni ha tangwa liamuchiali twahetele ku Puteolu;

¹⁴ kuze se twawanyine mandumbu, aze aliumbile kuli yetu tutwame hamwe no matangwa shimbiali: chocho twahetele ku Roma.

¹⁵ Kuze mandumbu muze atuvwile, ejile nikutupatwiza ndo ku yitanda ya Apiu ni ku mazuwo atatu a kuzeka ngeji; muze Paulu aamwene waze, wasakwilile Zambi, wajikijile.

¹⁶ Muze twahetele ku Roma, kapitau wakunjikile funge kuli jenerale ya chilombo cha maswalale; alioze atayijile Paulu kutwama ukawenyi hamwe ni swalale yoze wamufungile.

¹⁷ Kulutwe lia matangwa atatu Paulu watambikile waze apwile akwa lutwe a kuli A-Yunda, alikungulule. Muze akungamine, wambile kuli ayo ngwenyi, Yami, mandumbu, chipwe chalingile nichimwe cha kulimika ni atu, hanji ni ndako ja tulamba, hindu ku Yerusaleme amukunjikile funge ku moko ja A-Roma:

¹⁸ o, muze te hangusopesa, azangile kungwecha, mumu kumwapwile chitela cha kufwa nichimwe muli yami.

¹⁹ Alioze muze A-Yunda ahamikine, nalikunjikile kuli Sesare; kuchapwile ngwe nguli ni chimwe cha kusuma nacho vungu liami, ka.

²⁰ Kashika ha chikuma chino hinanutambika nwize kuli yami, ngunumone, nguhanjike ni yenu: mumu ha kutalatala cha akwa Izalele ngunakashiwa ni lenge lino.

²¹ O ambile kuli iye ngwo, Hali yetu, kutwatambwile mikanda ya ku Yundeya ha kutwala kuli yena, chipwe niumwe wa kuli mandumbu waze ahetele, kambulwile ungulungulu niumwe hali yena, hanji kuchivuluka.

²² Alioze tunachinyongo chipema kwivwa kuli yena chize unashinginyeka; mumu ha mbunga yino tunanyingika kweswe kakuhanjika yuma ya kulimika no.

²³ Mba se amuselele tangwa, anji ejile kuli iye ku zuwo lia kuzeka ngeji; kuli ayo washindunwine nikushindakenya ha wanangana wa Zambi, nikwakununa ha kutwala kuli Yesu, ku shimbi ya Mose, ni ku mikanda ya aprofeta, chize ku chimene ndo ku chingoloshi.

²⁴ Mba amwe akunukine ha yuma yize ambile, alioze akwo kafulielele.

²⁵ Muze kalitayile hakachi ko, akatukile; muze te Paulu hahanjika liji limuwika ngwenyi, Kanawa wahanjikile Spiritu Musandu kuli tulamba twenu ku kanwa iia profeta Izaia ngwenyi,

²⁶ Yako kuli atu ano, ukambe ngwe, Kwivwa kumunukevwa, alioze kunuchi kanyingika nichimwe; mba kutala, kumunukatala, alioze kunuchi kamona;

²⁷ Mumu mbunge ja atu ano hijinaleme, o hajika ku matwi jo, hafuka meso jo; kuchina hanji mamona ni meso jo, hanji mevwa ni matwi jo, hanji manyingika ni mbunge jo, akalumuke ngukaahindwise.

²⁸ Nyingikenu kashika ulamwino uno wa Zambi hiunatumiwa kuli akwa mavungu: o nawa kumakevwa.

²⁹ Iye se wambile chino, A-Yunda akatukile nikulihangujola chikolo hakachi ko.

³⁰ Alioze Paulu watwamine miaka yiali ya muwundu mu zuwo lienyi mwene, watambwile kanawa waze eswe anjilile kuli iye.

³¹ Ambujolele wanangana wa Zambi, nikulongesa yuma ya kutwala kuli Mwene Yesu Kristu ni hamu lieswe, kukwapwile chikwiko nichimwe.