Yilinga 27 - MUKANDA USANDU WA ZAMBI 1975

¹ Muze achipatwile ngwo, Mutwenda mu ulungu ku Italia, akunjikile Paulu ni amwe funge akwo kuli kapitau, jina lienyi Juliu, wa ku chihuji cha Angusetu.

² Mba nikunjila mu ulungu wa ku Andramitenu, uze te himuwenda ku membo a ku mbaka ya Eshia, twakatukile, Aristako Ka-Masendoniya wa ku Tesalonika wayile hamwe ni yetu.

³ Muze hikwacha twahetele ku Sendone: Juliu walwezele utu kuli Paulu wamutayijile kuya kuli tusendo twenyi, amuzumbule.

⁴ Mba katu ku kuze twendele kushi lia sali lize kulishi fuji, lia Saipuru, mumu fuji yalimikine ni yetu.

⁵ Muze te hitwenda ndusu kalunga-lwiji wa ku mbaka ja Selishia ni Pamafwilia, twahetele ku Mira, limbo lia mu Leshia.

⁶ Kuze kapitau wawanyine ulungu wa ku Alezandre himuuya ku Italia; iye watunjishilemo.

⁷ Muze te hitwenda makoke matangwa anji, twakundakenyene hindu chikalu ni Nindu, se fuji kuyatutayijile, twendele kushi lia sali lize kulishi fuji lia Kreta, nikukundakenya ni Salemone.

⁸ Mba, nikupalika hakamwihi hindu nikuhondangana, twahetele kuma anavulukako ngwo, Zuzu Jipema, hakamwihi nako kwapwile limbo lia Lasea.

⁹ Mba se shimbu linene hiliatoka, nikwendesa ulungu muchipwa cha Utoji se kulitwamina kulia hichapalika kulu, Paulu waashinjilile,

¹⁰ ngwenyi, Malunga, ngunamono kwendesa cha ulungu muchikapwa ni luyinda ni kufulwa chinji, hi cha yiteli wika ko ni ulungu, alioze cha mwono wetu nawa.

¹¹ Alioze kapitau wapanjikile kuli mukwa kusongwela ulungu ni mwenya ulungu, hi ku yuma yize ko ambile Paulu.

¹² Mumu zuzu yize kuyapemene mukutwamamo mwaka wa chishika, e anji ayulile kukatukako, kachi mahasa kama kuheta ku Fwenishia mukutwamako, kwenako zuzu ya Kreta yakutalikisa ku Chivumbuko cha tangwa ku tunda ni ku mwanda.

¹³ Muze fuji ya ku Sule yejile makoke, ashinginyekene ngwe hazuka upale wo, asosele ankora, endele mu ulungu nikusesesa ngenge ya Kreta.

¹⁴ Alioze kulutwe lia shimbu likepe, kakundukundu wa kuma kuze yoze anamuvuluka ngwo, Uru-akwilau walambile:

¹⁵ ni muze ulungu wakwachikile, kuwahashile kutalikisa ku fuji, twechele tukahungumuke kulutwe liayo.

¹⁶ Mba nikuhungumuka kushi lia sali lize kulishi fuji lia kamwe katungu, anakavuluka ngwo, Kalauta, mba twahasa kukolesa ulungu, hindu chikalu.

¹⁷ Muze te hausosa, alingile ni yuma ya kukwasa, nikuulanga ni mihipu; no evwile woma kuchina mahunguka ha masekeseke a ku Serete, ahulumwine lona lia kwendesa ulungu, chocho ahungumiokene.

¹⁸ Alioze kangonga nikupuputa chikolo hali yetu, muze hikwacha ambilile yiteli mu kalunga-lwiji.

¹⁹ Ha tangwa liamuchitatu ni moko jo ene ambilile yuma ya kwendesa ulungu.

²⁰ Chipwe tangwa chipwe matongonoshi kasolokele ha matangwa anji, kangonga munene wapwile hali yetu, ha kusula kutalatala cheswe cha ulamwino chatutokele.

²¹ Muze te hanapu shimbu linene ni zala, hohene Paulu wamanyine mukachi ko, ngwenyi, Yenu malunga, kachi nwangwononokenene, kachi kunwakatukile ku Kreta, ni luyinda yono ni kufulwa chino.

²² Haliapwila ngunanushinjila nuwahilile; mumu kukuchi kapwa kutokesa nichimwe cha mwono hakachi kenu, alioze cha ulungu wika.

²³ Mumu kamananga ku lumbu liami ufuku uno, mungelo wa Zambi, yoze wangupita, yoze nawa nakumulingila,

²⁴ ngwenyi, Paulu, kanda wivwa woma; Chakutamba kumana kumeso ja Sesare, ni chikwo nawa, Zambi hanakwehe waze eswe akwenda mu ulungu hamwe ni yena.

²⁵ Kashika Wahililenu, malunga, mumu ngunafuliela Zambi kumuchikapwa chizechene ngwe hanambe kuli yami.

²⁶ Alioze chatutamba kuhunguka ha ngenge ya limwe tungu.

²⁷ Muze ufuku wa kumi ni wamuchiwana wahetele, shimbu twapwile nikuhungumioka kweka ni kweka mu kalunga-lwiji wa ku Andriateku, ngwe ha muchima ufuku akwa kwendesa ulungu ashinginyekene ngwe anakundama ku chifuchi chimwe:

²⁸ o esekele ha mashima ja kalunga-lwiji, awanyine makumi awana a metro. Ayile kulutwe hakepe, esekele cheka nawa, awanyine makumi atatu a metro.

²⁹ Mba nikwivwa woma kuchina hanji mutuhunguka homa ha mawe, ambilile yikungo yiwana ya kumanyisa ulungu kunyima, alembele mwalwa usoloke.

³⁰ Shimbu akwa kwendesa ulungu afupile kuchina, se hahulumuna wato ha meya ni ulembekese, ngwe kachi himambata yikungo ya kumanyisa ulungu ku zulu lia ulungu.

³¹ Paulu wambile kuli kapitau ni maswalale ngwenyi, nyi wano kasalile mu ulungu, yenu kunwahashile kulilamwina.

³² Hohene maswalale atetele mihipu ya wato, awechele kuholokela mu meya.

³³ Shimbu mukuchipatwoka, Paulu waliumbile kuli ayo eswe alie ngwenyi, Lino tangwa kumi ni liamuchiwana nunatalatala ni zala, kunwalile nichimwe.

³⁴ Kashika ngunaliumbu kuli yenu, nulie: hanga nukahinduke: mumu lukambu niumwe kechi katoka ku mutwe wa niumwe wa yenu.

³⁵ Muze te hamba yino yuma, yanda mbolo, yasakwila kuli Zambi kumeso ja eswe; yayipatula, yaputuka kulia.

³⁶ Hohene o eswe ajikijile, alile.

³⁷ Yetu eswe, twapwile mu ulungu kulakaji aali, ni makumi shimbiali, ni atu asambano.

³⁸ Muze te hakuta, alelumwine ulungu, nikumbila tiliku mu meya.

³⁹ Muze hikwacha kanyingikine chifuchi: alioze amwene chikonja cha ngenge, chili ni zuzu, apalile kachi mahasa kuhungulaho ulungu.

⁴⁰ Mba, nikumbila yikungo yakumanyisa ulungu ayihichikile mu meya, haze hene nikujituia mihipu ya leme, nikusosa lona wa kulutwe atalikishile ku zuzu.

⁴¹ Alioze nikuheta muma muze mwatakanyine tulunga-lwiji aali, ahungwile ulungu hashi; zulu liakwachile hashi, liasakaminyine, alioze kunyima liamakukine ha kupupula cha mikanya.

⁴² Maswalale ambile ngwo, Tushihenu funge, kuchina umwe masányika haze akomboke.

⁴³ Alioze kapitau, nikuzanga kulamwina Paulu, waachijile ku upale wo; wambile waze ahashile kusányika alimbile hatangu mu meya, ahete hashi;

⁴⁴ ni akwo, amwe ha yipamba, ni akwo ha yuma yimwe ya ku ulungu. O chocho ewse ahetele kawape hashi.