Yilinga 26 - MUKANDA USANDU WA ZAMBI 1975

¹ Ni Akripa wambile kuli Paulu ngwenyi, Kanakutayiza ulihanjikile yena mwene. Hohene Paulu wolwele kwoko lienyi, walisambishile ngwenyi,

² Ngunawaha, mwanangana Akripa, se mungulisambisa kumeso je tangwa lino ha yuma yize yeswe ngunasumiwa nayo kuli A-Yunda.

³ Kuhiana chikolo mumu te yena uli mukwa kunyingika ndako jeswe ni yihula yeswe ya A-Yunda: kashika ngunaliumbu kuli yenu, ungwivwe ni uhumikizo.

⁴ Ndako jami, chize ku ukweze wami, kwe ku uputukilo, japwile hakachi ka vungu liami mu Yerusaleme, A-Yunda eswe kanajinyingika;

⁵ o angunyingikine kunyima chize ku uputukilo wawo, kachi matá kushindakenya, ngwe nikulita ni mbunga ya kuzeyela chikolo ku uwayilo wetu, napwile Ka-Fwariseu.

⁶ Haliapwila ngunamana angupatwile mumu ha kutalatala cha chilakenyo chize alakenyene Zambi kuli tulamba twetu;

⁷ ku chilakenyo chino minyachi yetu kumi ni yiali, eswe lukombo nikulingila Zambi ni mbunge yeswe ufuku ni mwalwa, kakutalatala kuhetako, mba ha kutalatala chino ngunasumiwa kuli A-Yunda, mwanangana!

⁸ Kuchi te kunwahashile kufuliela ngwenu, Zambi mahasa kuhindwisa afu?

⁹ Yami chamwenemwene nashinginyekene changutamba kulinga yuma yinji ya kulimika ni jina lia Yesu Ka-Nazare.

¹⁰ Yize nawa nalingile mu Yerusaleme, ni yami mwene anji a kuli asandu naajilile mu mazuwo a ususu, se natambwile chiyulo kuli asasendote akwa lutwe, ni muze aashihile yami nachitayijile.

¹¹ Nikwalamba kanji mu masunangonga eswe, naashinjikile ashililike Zambi, mba ni ufwatulo kuhiana hali ayo, naahungumionene ndo ku membo a mu yifuchi ya tundaka.

¹² Alioze shimbu nayile mu wenyi ku Ndamaseku ni chiyulo ni poko ya kuli asasendote akwa lutwe.

¹³ Tangwa ha muchima, mwanangana, namwene mu jila pangu mwilu, liahiana kutemuka cha tangwa, nikutemuka ha kungujingilika yami ni waze endele hamuwika.

¹⁴ Muze yetu eswe twalimbukile hashi, nevwile liji lia kwamba kuli yami mu limi lia Hepreu ngwo, Saulu, Saulu, kuchi te unanguhungumiona? Chikalu hali yena kutwa chishindo ku musongolwela.

¹⁵ Nambile ngwami, Mwene, yena iya? Mwene wambile ngwenyi, Yami Yesu, yoze wakumuhungumiona.

¹⁶ Alioze katuka, umane ha molu je: mumu ha chino hinasoloka kuli yena, mukukutongola ukapwe kavumbi kami ni chela chami, ha yuma yize hiwangumonamo, ni ha yuma yize mungukasolokamo kuli yena;

¹⁷ mungukupulula kuli atu ni kuli akwa mavungu, kuli ayo haliapwila ngunakutumu.

¹⁸ Mukulawisa meso jo, hanga akatewuluke ku milima ndo ku pangu, ku tachi ja Satana ndo kuli Zambi, hanga akatambule ukonekeno wa milonga, ni chihinga hakachi ka waze hanaasela ku usandu ku Ufulielo kuli yami.

¹⁹ Kashika mwanangana Akripa, chakolemene ku usolwelo wa mwilu.

²⁰ Alioze nambujolele hatangu kuli waze mu Ndamaseku, ni mu Yerusaleme, ni ku chifuchi cheswe cha Yundeya, ni kuli akwa mavungu, ngwe chaatamba kulikonyeka, akatewulukile kuli Zambi, akalinge yitanga ya kulita ni kulikonyeka.

²¹ Mumu ha mukunda wa yino yuma A-Yunda angukwachile mu tembele, esekele kungushiha.

²² Se Zambi wangukwasa, hingunamana nikujikiza ndo ku tangwa lino, nikushindakenya kuli akepe ni anene, nikwamba nichimwe chuma chikwo shina yuma yize ambile aprofeta ni Mose ngwo, Kumuyiza;

²³ ngwe chize chatamba Kristu kumona lamba, ngwe chize iye hatangu ku Uhindukilo hakachi ka afu, mambujola pangu kuli atu ni mavungu.

²⁴ Shimbu machihanjika ha yino yuma ha kulisambisa chenyi, Fesetu yamba ni liji linene ngwenyi, Paulu, unazaluka; kulilongesa che chinji chinakuzalwisa.

²⁵ Alioze Paulu wambile ngwenyi, Chazalukile, Fesetu mulemu Wahiana; alioze ngunahanjika maliji a umwenemwene ni a mana.

²⁶ Mumu mwanangana unanyingika yino yuma, kuli yena nawa ngunahanjika mwazu: mumu ngunakunuka ngwami, Nichimwe cha yino yuma kuchaswamine kuli yena; mumu chino chuma kachilingile ku tenga.

²⁷ Mwanangana Akripa, Unafuliela aprofeta, nyi? Ngunanyingika Unafuliela.

²⁸ Akripa wambile kuli Paulu ngwenyi, Chikepe chinasala mba unangukununa kupwa mukwa Kristu.

²⁹ Paulu wambile ngwenyi, Nyi chikepe nyi chinji, ngunazange kuli Zambi, hi yena wika ko, alioze waze eswe anangwivu tangwa lino akapwe chizechene ngwe yami, alioze malenge ano, ka.

³⁰ Mwanangana wakatukile ni nguvulu ni Mberenise, ni waze atwamine hamwe no.

³¹ Muze te haya ku tenga alihanjikile umwe kuli mukwo ni mukwo ngwo, Yono mutu kalingile nichimwe cha kutela kufwa hanji malenge.

³² Akripa wambile kuli Fesetu ngwenyi, Kachi kalikunjikile kuli Sesare, kachi chatamba kumutusula.