Yilinga 25 - MUKANDA USANDU WA ZAMBI 1975

¹ Fesetu kashika, se wahetele ku chifuchi chenyi, kulutwe lia matangwa atatu wakatukile ku Serarea, wakandukile ku Yerusaleme.

² Asasendote akwa lutwe ni akwa lutwe ja A-Yunda asolwele kuli iye yuma yize asumine Paulu;

³ aliumbile kuli iye akamunehe ku Yerusaleme; kanamujikinyina mukumushiha mu jila.

⁴ Alioze Fesetu wakumbulwile ngwenyi, Ngunafungu Paulu ku Sesarea, ni yami mwene munguyako nikawashi.

⁵ Yamba ngwenyi, Kashika waze ni chiyulo hakachi kenu akapalumuke hamwe ni yami. Kachi muchipwa chuma chimwe cha kupiasuka muli yono lunga akamusume.

⁶ Muze te hatwama hakachi ko, kahianyine matangwa nake, hanji kumi, wapalumukine ku Sesarea; muze hikwacha Watwamine ha chitwamo cha upatwilo, wambile anehe Paulu.

⁷ Muze ahetele, A-Yunda waze apalumukine ku Yerusaleme amanyine ha kumujingilika, nikumusuma yitela yinji yikalu, yize kahashile kuyisolwela chinyingi:

⁸ Paulu ha kulisambisa, wambile ngwenyi, Chipwe shimbi ya A-Yunda, chipwe tembele, chipwe Sesare, chavulumwine nichimwe.

⁹ Alioze Fesetu, nikuzanga kuwahisa A-Yunda, wakumbulwile kuli Paulu ngwenyi, Mukakanduka ku Yerusaleme akakupatwileko kumeso jami ha yino yuma, nyi?

¹⁰ Alioze Paulu wambile ngwenyi, Ngunamana kulutwe lia chitwamo cha upatwilo wa Sesare, kuze chatamba angupatwile: kuli A-Yunda chalingile chipi nichimwe, chizechene ngwe yena mwene unanyingika kanawa.

¹¹ Kachi ngunakalinga chipi chimwe, kachi ngunakavulumuna chuma chimwe cha kutela kufwa, kachi chichi kuchina kufwa; alioze kachi kuchishiko nichimwe cha ku yuma yize anangusumu, niumwe mahasa kungwecha kuli ayo; ngunalikunjika kuli Sesare.

¹² Hohene Fesetu, muze te hahanjika ni akwa kuyula, wakumbulwile ngwenyi, Hiwalikunjika kuli Sesare: kuli Sesare kumukaya.

¹³ Muze matangwa amwe apalikile, mwanangana Akripa ni Mberenise ahetele ku Sesarea mukumeneka Fesetu.

¹⁴ Muze atwamineko matangwa anji, Fesetu wasele kumeso ja mwanangana yikuma yize ya kutwala kuli Paulu, ngwenyi, Kwali ku kuno umwe lunga amuhichikile funge kuli Fwelishia;

¹⁵ muze napwile mu Yerusaleme, asasendote akwa lutwe ni makulwana amusumine kuli yami, nikwita upatwilo hali iye.

¹⁶ Naakumbulwile ngwami, Hi ndako ya A-Roma ko kwecha mutu umwe, shimbu yoze unasumiwa kanda apwa ni waze akumusuma meso ni meso, akapwe ni mwaka upema wa kulisambisa ha kusuma chize anamusumu.

¹⁷ Muze kashika akungulukile kuno chashimbwileko, alioze muze hikwacha natwamine ha chitwamo cha upatwilo, nambile anehe yono lunga.

¹⁸ Muze akwa kumusuma amanyine, kamusumine chitela cha ungulungulu ngwe nanyongene;

¹⁹ alioze amupwile nayo yimwe yihula, ha yikuma ya kuwayila cho ene, ni hali umwe Yesu, wapwile mufu, yoze Paulu washindakenyene ngwenyi, Ni mwono ali.

²⁰ Yami, nikukakashana ngwe chize mungusopesa yino yuma, namuhulile kachi makanduka ku Yerusaleme, akamupatwileko ha yino yuma.

²¹ Alioze muze Paulu aliumbile akamufunge ku usopelo wa Angusetu, nambile akamufunge ndo mungumutuma kuli Sesare.

²² Akripa wambile kuli Fesetu ngwenyi, Ni yami nawa ngunazange kwivwa yono mutu. Iye wambile ngwenyi, Hamene mukamwivwa.

²³ Kashika, muze hikwacha ni Akripa ahetele, ni Mberenise, ni uhenya unene, anjilile mu zuwo lia kuvwila, hamwe ni manjolo ni akwa lutwe ja limbo, Fesetu wambile, anehe Paulu.

²⁴ Ni Fesetu wambile ngwenyi, Mwanangana Akripa, ni malunga eswe nuli muno hamwe ni yetu, nunamono yono mutu, hali iye chizavu cheswe cha A-Yunda angushinjikile, ku Yerusaleme ni ku kuno, nikukololoka hali iye, ngwo, Kuchamutambile kutwama ni mwono.

²⁵ Alioze nawanyine ngwe kalingile nichimwe cha kutela kufwa. Se iye mwene waukunjikile kuli Angusetu, napatwile kumutuma.

²⁶ Hali iye, chuma chimwe cha pundu chishi nacho cha kusoneka kuli mwene wami. Kashika hinamuneha kumeso jenu, nikuhiana chikolo kumeso je, mwanangana Akripa, hanga kulutwe lia kusopesa, ngukapwe ni chuma chimwe cha kusoneka.

²⁷ Mumu kuchichi kulumbunuka kutuma funge, kachi keshi kulweza yitela yize anamusumu nayo.