Yilinga 24 - MUKANDA USANDU WA ZAMBI 1975

¹ Kulutwe lia matangwa atano, sasendote mukwa lutwe Ananiya wapalumukine ni amwe makulwana, hamwe ni umwe mukwa kwahanjikila, jina lienyi iye, Tertulu; asolwele kuli nguvulu yuma yize asumine Paulu.

² Muze amutumbikile, Tertulu waputukile kumusuma ngwenyi, Twakuwaha ni sambukila yinji kuli yena, se ku mana je kakululika yuma yinji ha vungu lino,

³ yetu twakuchisambilila matangwa eswe kweswe, Fwelishia mulemu Wahiana, ni kusakwila cheswe.

⁴ Alioze hanga chichi kakulinda nawa, ngunaliumbu kuli yena, utwivwe kama hakepe ni umbovu we.

⁵ Mumu hitunawane yono lunga koki, mukwa kuvundula hakachi ka A-Yunda eswe mu yifuchi yeswe ya hashi, ni mukwa lutwe wa mbunga ya A-Nazereno:

⁶ iye nawa wesekele kujilula tembele, alioze twamukwachile, twazangile kumusopesa nikulita ni shimbi yetu.

⁷ Alioze manjolo Leshia nikutulumuka hali yetu, wamuchijile ni kupupula chinene ku moko jetu.

⁸ Nikwamba waze mamusuma, akaye kumeso je; ha kumusopesa yena mwene muhasa kusa chinyingi ha yino yuma yeswe tunamusumu.

⁹ Ni A-Yunda nawa alifutwile ni kusuma chino, nikutayiza ngwo, Chochene.

¹⁰ Muze nguvulu amulahwile ahanjike, Paulu wakumbulwile ngwenyi, Se ngunanyingika ngwe ha miaka yinji yena wapwa sopi ku vungu lino, ngunalisambisa ni kuwaha chahiana.

¹¹ Kumumona ngwe kuchahianyine kumi lia matangwa ni matangwa aali, hanga nakandukile mukuwayila ku Yerusaleme:

¹² chipwe mu tembele kanguwanyineko nikuhangulula ni mutu niumwe, chipwe nikuzungulwisa mbunga, chipwe mu masunangonga, chipwe mu limbo, ka.

¹³ Chipwe yinyingi ya yuma yize anangusumu nayo haliapwila, kahashile kuyisolola.

¹⁴ Alioze chino ngunatayiza kuli yena, ngwami, Nikulita ni Jila yize o anavuluka ngwo, Kuhandununa, chocho nakulingila Zambi ya tulamba twetu, nikufuliela yuma yize yeswe ya kulita ni shimbi, ni yize yinasonewa mu mikanda ya aprofeta;

¹⁵ nguli ni kutalatala kuli Zambi, chize ayo ene nawa kanachilawoka, ngwe kumukukapwa Uhindukilo wa eswe aali, ni akwa ululi ni yihenge.

¹⁶ Ha chikuma chino yami nawa nakulifumba, hanga ngukapwe ni mbunge yize kuyishi chitalingiso kumeso ja Zambi ni atu.

¹⁷ Achi, kulutwe lia miaka yinji nahetele mukuhana yawana ni milambu ku vungu liami:

¹⁸ hohene anguwanyine mukwa kulipemesa mu tembele, hi ni mbunga ko, chipwe ni vunda, ka: alioze amwe A-Yunda a ku Eshia,

¹⁹ waze chaatamba kusoloka kuno kumeso je, nikungusuma, kachi chuma chimwe anguli nacho.

²⁰ Shina wano ambe chitela chize awanyine muli yami, muze namanyine kumeso ja akwa kuyula,

²¹ shina ha liji lino limuwika nakololokele nikumana hakachi ko ngwami, Kanangusopesa kuli yenu tangwa lino ha kutwala ku Uhindukilo wa afu.

²² Fwelishia, nikunyingika pundu ha kutwala ku Jila yino, waashimbwishile, ngwenyi, Muze manjolo Leshia mapalumuka, mungukasopa chikuma chenu.

²³ Iye wambile kapitau akafunge Paulu, alioze amulweze vumbi, kanda akakwika niumwe wa kuli tusendo twenyi kumuvumbika.

²⁴ Kulutwe lia matangwa amwe, Fwelishia wahetele hamwe ni mukwo-pwo Ndrusela, iye Ka-Yunda, yasaka Paulu, yamwivwa ha kutwala ku Ufulielo muli Kristu Yesu.

²⁵ Shimbu ahanjikile kuli ayo ha kutwala ku ululi, ni kusúla, ni upatwilo uze muwizaho, Fwelishia wazalile tò ni woma, wakumbulwile ngwenyi, Yénu haliapwila; ni muze munguwana mwaka upema, mungukakutambika.

²⁶ Alioze wanyongene nawa hanji Paulu mamwaha mbongo: kashika nawa watumine kanji kanji, akalishimwinyine nenyi.

²⁷ Alioze muze miaka yiali yamanunukine, Porshiu Fesetu wasalakanyine Fwelishia; ni Fwelishia nikuzanga kuwahisa A-Yunda, wahichikile Paulu wa kukasa.