Yilinga 23 - MUKANDA USANDU WA ZAMBI 1975

¹ Paulu, wahulikilile meso kuli akwa kuyula, wambile ngwenyi, Mandumbu, hingunende ni mbunge yeswe yipema kumeso ja Zambi ndo ku tangwa lino.

² Alioze sasendote mukwa lutwe Ananiya wambile waze amanyine hehi nenyi amulambe ku kanwa.

³ Hohene Paulu wambile kuli iye ngwenyi, Zambi kumakakulamba, yena unapu ngwe yishimi ya kutomesa ni pemba; yena kumanyi, unatwama ukangusopese nikulita ni shimbi, mba nikutangula shimbi unambe angulambe, nyi?

⁴ Waze amanyineko ambile ngwo, Unatuku sasendote mukwa lutwe wa Zambi, nyi?

⁵ Paulu wambile ngwenyi, Chanyingikine ngwami, Iye sasendote mukwa lutwe; mumu chinasonewa ngwo, Kanda ukahanjika chipi hali mukwa kuyula atu je.

⁶ Alioze muze Paulu anyingikine ngwenyi, Chihanda chimwe chapwile cha A-Satuseu ni chikwo cha A-Fwariseu, wakololokele mukachi ka akwa kuyula ngwenyi, Mandumbu, yami nguli Kar-Fwariseu, mwana Ka-Fwariseu: kanangusopesa ha kutwala ku kutalatala cha Uhindukilo wa afu.

⁷ Muze te hamba chino, kwapwile Chizungozungo hakachi ka A-Fwariseu ni A-Satuseu; chizavu ahandunukine.

⁸ Mumu A-Satuseu kakwamba ngwo, Uhindukilo wakuhi niumwe, chipwe mungelo, chipwe Spiritu, ka; alioze A-Fwariseu kakutayiza yino yeswe.

⁹ Kwapwile zungo linene: mba amwe akwa kusonyeka a kuli A-Fwariseu akatukile nikulihangulula chikolo, ngwo, Kutwawanyine yipi muli yono mutu: kachi Spiritu hanahanjika kuli iye, hanji mungelo, kanda tulitachika ni Zambi.

¹⁰ Muze Chizungozungo chinene chavundukile, manjolo, nikwivwa woma kuchina matanwona Paulu yihanda, wambile mbunga ya maswalale apalumuke, akamuchize ni tachi mukachi ko, akamunjise mu mbonge.

¹¹ Alioze ufuku uze, Mwene wamanyine hehi nenyi, wambile ngwenyi, Hamuka chikolo, Paulu; mumu chizechene ngwe hiunashindakenya ha kutwala kuli yami ku Yerusaleme, chocho Chakutamba kushindakenya ku Roma nawa.

¹² Muze hikwacha amwe a kuli A-Yunda atwahile nikulishinga ngwo, Kutuchi kulia chipwe kunwa ndo hitwashiha Paulu.

¹³ Ahianyine makumi awana waze alishingile.

¹⁴ O ayile kuli asasendote akwa lutwe ni akwa kuyula, nikwamba ngwo, Yetu hitunalishingi ni shingo linene, ngwetu, Kutuchi kapanjika kulia nichimwe ndo hitwashiha Paulu.

¹⁵ Haliapwila kashika yenu, ni akwa kuyula, ambululenu kuli manjolo hanga hamene akamupalumwise kuli yenu, ngwe munusela chinyingi pundu ha kutwala kuli iye; ni yetu tunazange kumushiha shimbu kanda akundama.

¹⁶ Alioze mwihwa wa Paulu, wevwile ha kujikinyina cho, iye wayile, wanjilile mu mbonge, wambulwile kuli Paulu.

¹⁷ Paulu watambikile umwe wa kuli tupitau, wambile ngwenyi, Twalenu mukweze yono kuli manjolo; mumu chuma chimwe ali nacho kumwambulwila.

¹⁸ Kashika wamutambwile, wamutwalile kuli manjolo, iye yamba ngwenyi, Funge Paulu kangutambika, kangulembela kutwala yono mukweze kuli yena, iye chuma chimwe ali nacho kukwambulwila.

¹⁹ Manjolo wamukwachile ku kwoko, amutwale ku tenga ukawo, wamuhulile ngwenyi, Chika uli nacho kungwambulwila?

²⁰ Iye wambile ngwenyi, A-Yunda hanalitesa kukulembela hanga hamene ukapalumwise Paulu kuli akwa kuyula, ngwe mahula pundu yuma yenyi.

²¹ Kanda uatayiza kashika; mumu makumi awana a kuli malunga aze anamujikinyina, waze hanalishingi ngwo, Kutuchi kulia chipwe kutuchi kunwa ndo hitwamushiha; haliapwila kanalulika nikutala chilakenyo cha yena.

²² Manjolo kashika washikile ni mukweze nikumwaha koki ngwenyi, Kanda uhanjika kuli niumwe ngwe hiwasolola yino yuma kuli yami.

²³ Iye watambikile aali a kuli tupitau eze kuli iye, wambile ngwenyi, Lulikenu kulakaji aali a maswalale, hanga akaye ndo ku Sesarea, ni makumi shimbiali a akwa tuvwalu, ni kulakaji aali a akwa makunga ha ola yamuchitatu ya ufuku:

²⁴ iye waambile alulike yimbulu, hanga akatwamiseho Paulu, mukumumbata kawape ndusu kuli nguvulu Fwelishia.

²⁵ Wasonekene mukanda ngwe chino ngwenyi,

²⁶ Yami Kelautiu Leshia kuli nguvulu Fwelishia mulemu Wahiana, Vulie!

²⁷ Yono lunga kanakamukwata kuli A-Yunda, kanakamba kumushiha; muze ngunakatulumuka hali ayo ni mbunga ya maswalale, ngunakamupulula, se ngunakasa chinyingi iye Ka-Roma.

²⁸ Mba nikuzanga kunyingika chitela chize amusumine, ngunakamupalumwisa kuli akwa kuyula jo.

²⁹ Ngunakamuwana kusumiwa ha yihula ya shimbi yo; alioze kasumiwineko ha chimwe cha kutela kufwa hanji malenge.

³⁰ Muze hachisolola kuli yami ngwe mukukapwa utwahe wa A-Yunda hali yono lunga, hohene namutumine kuli yena, nikuhana shimbi nawa kuli waze akumusuma, akambe kumeso je yuma yize amuli nayo. Muoyowenu!

³¹ Kashika maswalale, nikulita ni chize aambile, atwalile Paulu, amunehene ha ufuku ku Andepatri.

³² Mba muze hikwacha ahichikile akwa tuvwalu kuya hamwe nenyi, o ahilukile ku mbonge:

³³ wano, muze ahetele ku Sesarea, akunjikile mukanda kuli nguvulu, atumbikile Paulu nawa kumeso jenyi.

³⁴ Muze te nguvulu hautanga, wahulile chifuchi chize anakatuka; muze anyingikine wakatukile ku Selishia,

³⁵ wambile ngwenyi, Mungukakwivwa muze waze akukusuma maheta: iye wambile akamutunge mu palasiu ya Heronde.