Yilinga 22 - MUKANDA USANDU WA ZAMBI 1975

¹ Mandumbu ni atata, ivwenu haliapwila kulisambisa chami kuli yenu.

² Muze evwile te wahanjikile kuli ayo mu limi lia Hepreu, aholele kuhiana:

³ iye yamba ngwenyi, Yami nguli Ka-Yunda, nasemukine mu Tarsu, limbo lia mu Selishia, alioze nafumbiwile mu limbo lino ku yiliato ya Ngamaliele, nalongolokele nikulita ni cheseko cha pundu cha shimbi ya tulamba twetu, nikusela mbunge yami yeswe hali Zambi, ngwe yenu eswe nwakulinga tangwa lino.

⁴ Nahungumionene Jila yino ndo ku kufwa, nikwakasa, nikukunjika ku mazuwo ja ususu, ni malunga ni mapwo.

⁵ Chizechene ngwe sasendote mukwa lutwe, ni makulwana eswe kanangushindakenya: kuli ayo nawa natambwile mikanda kuli mandumbu, nayile wenyi ku Ndamaseku, mukuneha waze nawa apwileko a kukasa ku Yerusaleme, akaalambe.

⁶ Shimbu nendele mu wenyi nikukundama ku Ndamaseku, ngwe tangwa ha muchima, susumuku mwahenyene mwilu pangu linene ha kungujingilika.

⁷ Nalimbukile hashi, yingwivwa liji lia kwamba kuli yami ngwo, Saulu, Saulu, kuchi te unanguhungumiona?

⁸ Nakumbulwile ngwami, Mwene, yena iya? Iye wambile kuli yami ngwenyi, Yami Yesu, Ka-Nazare, yoze yena unamuhungumiona.

⁹ Alioze waze apwile hamwe ni yami, amwene lie pangu, azalile tò ni woma, alioze kevwile liji lia yoze wahanjikile ni yami.

¹⁰ Mba nambile ngwami, Kuchi mungulinga, Mwene? Mwene wambile kuli yami ngwenyi, Katuka, uye ku Ndamaseku; kuze kumakakwambuwila ha kutwala ku yuma yize yeswe hanakuselayo kulinga.

¹¹ Muze Chahashile kumona mumu ha uhenya wa pangu lize, yangutwala ku kwoko lia waze apwile hamwe ni yami, chocho nahetele ku Ndamaseku.

¹² Mba umwe Ananiya, mukwa kuwayila Zambi nikulita ni shimbi, mukwa Shindakenyo kuli A-Yunda eswe, atwamineko,

¹³ wejile kuli yami, nikumana hakamwihi, wambile kuli yami ngwenyi, Ndumbu Saulu, laula meso. Ha ola yize yene nalawile meso, namumwene.

¹⁴ Iye wambile ngwenyi, Zambi ya tulamba twetu hanakusela kunyingika upale wenyi, nikumona mukwa ululi, nikwivwa liji mu kanwa lienyi.

¹⁵ Mumu kumukapwa chela hali iye kuli atu eswe, ha chize hiwamona, ni chize hiwevwa.

¹⁶ Haliapwila, kuchi te unashimbula? Katuka, akupapachise, ukasane milonga ye shimbu muchitambika ha jina lia Mwene.

¹⁷ Chapwile muze te hinahiluka ku Yerusaleme, shimbu munguchilemba mu tembele, napwile ngwe mu tulo,

¹⁸ namumwene, kanambe kuli yami ngwenyi, Lipupwise, ukatuke nikawashi ku Yerusaleme, mumu kechi katambula Shindakenyo ye hali yami.

¹⁹ Nambile ngwami, Mwene, o kananyingika ngwe yami napwile nikuyika mu mazuwo ja ususu, nikulamba mu masunangonga waze eswe akufuliela yena.

²⁰ Muze amwangine manyinga ja chela che Eshetevau, yami nawa te ngunamanako, nikuchitayiza, nikufunga mazalo ja waze amushihile.

²¹ Iye wambile kuli yami ngwenyi, Yako: mumu mungukutuma kusuku kuli akwa mavungu.

²² O ahalakanyine ndo ku liji lino; alioze akololokele, ngwo, Chizenu yono mutu hano hashi: mumu katelele kutwama ni mwono.

²³ Shimbu machikololoka, nikumbila mazalo jo, nikwasa fufuta mu tetela,

²⁴ manjolo wambile amunjise mu mbonge, akamweseke ha kulamba ni shikote, hanga ase chinyingi ha chikuma chize akalumiokene chocho hali iye.

²⁵ Alioze shimbu machimukesa ni yikapa, Paulu wambile kuli kapitau, yoze wamanyineko ngwenyi, Kuchinate ni shimbi kulamba ni shikote mutu Ka-Roma shimbu kanda amusopesa, nyi?

²⁶ Muze kapitau achivwile, wayile akachambulule kuli manjolo ngwenyi, Kuchi unambe kulinga? Mumu yono mutu Ka-Roma.

²⁷ Manjolo wayile, wambile kuli iye ngwenyi, Ngwambulwile, yena uli Ka-Roma, nyi? Iye wambile ngwenyi, Ewa, nguli Ka-Roma.

²⁸ Manjolo wakumbulwile ngwenyi, Ha ndando yinene nazukile ulemu uno. Paulu wambile ngwenyi, Alioze yami nasemukine Ka-Roma.

²⁹ Haze hene waze ambile kumweseka, amuhichikile, manjolo wevwile woma nawa, muze asele chinyingi ngwo, Iye Ka-Roma, mumu ha kumukasa.

³⁰ Alioze muze hikwacha, se wazangile kunyingika pundu ha chize wasumiwine kuli A-Yunda, wamutuswile, wambile asasendote ni akwa kuyula eswe alikungulule, iye wapalumwishine Paulu, wamusele kumeso jo.