Yilinga 21 - MUKANDA USANDU WA ZAMBI 1975

¹ Muze te hitwalihandununa no, twendele mu ulungu, tukapatule pundu ku Koshe, ni tangwa likwo twahetele ku Rotese, katu ku kuze twahetele ku Patara:

² se twawanyine ulungu wa kuzauka mu sali ku Fwenishia, twanjilile, tukaye.

³ Muze hitwamona chifuchi cha Saipuru, nikuchihichika ku chimeso chetu, twendele ndo ku Seria, twahetele ku Teru; mumu kuze ulungu te himalongolola yiteli yawo.

⁴ Ni se twawanyine tumbaji, twasalileko matangwa shimbiali: waze ambile kuli Paulu ku tachi ja Spiritu ngwo, Kanda ukakanduka ku Yerusaleme.

⁵ Alioze muze te hitwatwama matangwa, twakatukile, twayile mu wenyi wetu; o eswe ni akwo-mapwo ni ana, atushinjikilile ndo haze lia limbo, mba nikuliumba makungunwa ha ngenge ya kalunga twalembele, twalishikile umwe ni mukwo ni mukwo;

⁶ twanjilile mu ulungu alioze o ahilukile ku mahio.

⁷ Muze te hitwamanununa jila ya kukatuka ku Teru, twahetele ku Tolemaise. Muze twamenekene mandumbu twatwamine tangwa limuwika hamwe no,

⁸ tangwa likwo twakatukile, twahetele ku Sesarea; twanjilile mu zuwo lia Fwilipe, mukwa kwambujola sango lipema, iye wapwile umwe wa kuli e shimbiali, mba twatwamine hamwe nenyi.

⁹ Achi, yono wapwile ni anenyi a mapwo awana, waze kanda aya ulo, akwa kuprofeteza.

¹⁰ Shimbu twatwamineko matangwa amwe, kwakatukile ku Yundeya umwe profeta, jina lienyi Angavu.

¹¹ Iye yeza kuli yetu, yanda muya wa Paulu, yalikasa moko jenyi ni molu jenyi mwene, yamba ngwenyi, Chocho anambe Spiritu Musandu ngwenyi, Chocho A-Yunda a mu Yerusaleme kumakasa mwenya muya uno, kumamukunjika ku moko ja akwa mavungu.

¹² Muze twevwile yino yuma, ni yetu ni enyembo, twaliumbile kuli iye, kanda akakanduka ku Yerusaleme.

¹³ Alioze Paulu wakumbulwile ngwenyi, Kuchi nunalingi, nikulila, nikushiha mbunge yami? Mumu ngunahase hi kukashiwa wika ko, alioze kufwa nawa ku Yerusaleme ha jina lia Mwene Yesu.

¹⁴ Muze katayileko, twaholele, ngwetu, Upale wa Mwene ukalingiwe.

¹⁵ Kulutwe lia matangwa ano, twakashile yuma yetu, twakandukile ku Yerusaleme.

¹⁶ Mba amwe a kuli tumbaji a ku Sesarea ayile hamwe ni yetu, nikutwala hamwe no umwe Nasone wa ku Saipuru, kambaji mukulu, yoze matuzeka.

¹⁷ Muze twahetele ku Yerusaleme, mandumbu atusambililile.

¹⁸ Mba ha tangwa likwo, Paulu wayile hamwe ni yetu kuli Tiangu; ni makulwana eswe apwileko.

¹⁹ Muze te haameneka, wambulwile chimwe ha chimwe yuma yize alingile Zambi hakachi ka akwa mavungu ku uvumbiko wenyi.

²⁰ O muze achivwile, achichimiekene Zambi; ambile kuli iye ngwo, Unamono, ndumbu, ngwe yizavu yipwa haha kuyili ya A-Yunda waze hanafuliela; ni eswe kakusela mbunge jo ku shimbi:

²¹ hanaambulwila ha kutwala kuli yena, ngwe wakulongesa A-Yunda eswe hakachi ka akwa mavungu kwehuka Mose, nikwakanjisa kupwisa ngalami ana jo, nikwakanjisa kwenda nikulita ni ndako ja A-Yunda.

²² Kuchi muchipwa kashika? Makevwa ngwo, Heza.

²³ Linga kashika chize tunambe kuli yena: ngwetu, Malunga awana tuli no, waze chilakenyo ali nacho;

²⁴ uatwale, ukalipemese hamwe no, ukaafwetele kongo lio, hanga akatewule mitwe yo: mba eswe makanyingika umwenemwene wakuhi niumwe ha yize aambulwilile ha kutwala kuli yena, alioze yena mwene wakwenda nikululika nikufunga shimbi.

²⁵ Alioze ha kutwala kuli akwa mavungu waze hanafuliela, twatumine mukanda, nikupatula ngwetu, Akalifunge ku yuma yize hanayitambula ku mahamba, ni ku manyinga, ni ku tushitu a kuhonda, ni ku utanji.

²⁶ Hohene Paulu watwalile e malunga, ni ha tangwa likwo, ha kulipemesa hamwe no, wanjilile mu tembele, nikusolola ngwe kumanunuka cha matangwa a kupemesa, ndo malambula chitapo hali ayo eswe mutu ni mutu.

²⁷ Muze te matangwa shimbiali himamanunuka, A-Yunda a ku Eshia, muze amumwene mu tembele, avundwile mbunga yeswe, o amukwachile,

²⁸ akololokele ngwo, A-Izalele, tukwasenu: mwe mutu yono kakulongesa atu eswe kweswe kulimika ni e atu, ni je shimbi, ni zuwo lino; chikwo nawa, hananjisa A-Ngresia nawa mu tembele, hanachishi muma muno, musandu.

²⁹ Mumu amwene kulu Trofwimu, Ka-Efwesu, hamwe nenyi mu limbo, iye ashinginyekene ngwe Paulu hamunjisa mu tembele.

³⁰ Limbo lieswe liapwile ni Chizungozungo, atu akungulukile; akwachile Paulu, amumbulumwine haze lia tembele; haze hene ajilile mapito.

³¹ Shimbu afupile kumushiha, liji liahetele kuli manjolo wa chihuji cheswe, ngwo, Limbo lieswe lia Yerusaleme linazunguluka.

³² Hohene watwalile hamwe nenyi maswalale ni tupitau, wapalumukine fuji kuli ayo: o muze amwene manjolo ni maswalale alitwaminyine kulamba Paulu.

³³ Hohene manjolo wakundamine, wamukwachile, wambile amukase ni malenge aali; iye wahulile jina lienyi, ni chize alinga,

³⁴ alioze amwe akalumiokene chuma chimwe, amwe akalumiokene chuma cheka hakachi ka mbunga: muze kahashile kunyingika pundu mumu ha vunda, wambile amunjise mu mbonge.

³⁵ Muze ahetele ku ndondelo, amumbachile kuli maswalale mumu ha kupupula cha mbunga.

³⁶ Mumu chizavu cha atu akawile nikukololoka ngwo, Muchizenuko.

³⁷ Alioze shimbu te himamunjisa mu mbonge, Paulu yamba kuli manjolo ngwenyi, Ngutayize kama ngwambe chuma chimwe kuli yena. Iye wambile ngwenyi, Yena unahanjika Ngresia, nyi?

³⁸ Yena hi uli Ka-Engitu ko yoze kunyima lia matangwa ano wavundwile atu, watwalile haze mu puya tununu awana a malunga yingalwe, nyi?

³⁹ Alioze Paulu wambile ngwenyi, Yami nguli Ka-Yunda wa ku Tarsu, mwenya limbo lilemu lia mu Selishia; ngunaliumbu kuli yena, ngutayize kama nguhanjike kuli atu.

⁴⁰ Muze te hamutayiza, Paulu, nikumana ha ndondelo, walahwile ni kwoko lienyi kuli atu; o muze te hahola kulu, wahanjikile kuli ayo mu limi lia Hepreu, ngwenyi,