Yilinga 20 - MUKANDA USANDU WA ZAMBI 1975

¹ Muze te zungo hiliahola, Paulu watambikile tumbaji kuli iye, waashinjilile maliji, washikile no, wakatukile mukuya ku Masendoniya.

² Ni muze te hapalika ndusu mu yihanda yize, nikwashinjila ni maliji anji, wahetele ku Ngresia.

³ Muze te hahwisako tukweji atatu, ni A-Yunda afupile kumutwaha shimbu ambile kwenda mu ulungu ku Seria, wapwile ni mbunge ya kuhilukila ndusu mu Masendoniya.

⁴ Wano ayile hamwe nenyi ndo ku Eshia ngwo, Sopatere wa ku Mberea, mwana Pairu; ni a kuli A-Tesalonika ngwo, Aristako, ni Sengundu; ni Ngayu wa ku Ndervwe, ni Timoteu; ni akwa Eshia ngwo, Techiku ni Trofwimu.

⁵ Alioze wano te hatetekela, atutwaminyinyine ku Troa.

⁶ Alioze yetu twendele mu ulungu ku Fwilipu kulutwe lia matangwa a mbolo kuyishi futunwiso. Kulutwe lia matangwa atano twahetele kuli ayo ku Troa; twatwamineko matangwa shimbiali.

⁷ Ha tangwa litangu lia semana, muze twakungulukile mukupalula mbolo, Paulu wahanjikile kuli ayo, se muze mukucha wahalile kukatuka; iye watwalile maliji jenyi ndo ha muchima ufuku.

⁸ Ni temo jinji japwile mu chipatulo cha kwilu muze twakungulukilile.

⁹ Mba umwe mukweze, jina lienyi, Utecho, Watwamine ha kapenda, wazembelele tulo anji; shimbu Paulu ahanjikile hindu chipinji chisuku chikolo, tulo amukumbile, iye waholokele ku chipatula chamuchitatu cha kwilu, yamuzundula hanafu kulu.

¹⁰ Paulu wapalumukine, wahetamine hali iye, wamuzundwile mu moko jenyi, wambile ngwenyi, Kanda nupinda; mumu mwono wenyi muuli muli iye.

¹¹ Muze te hakanduka kwilu, yapalula mbolo, yalia, yalishimwinya no shimbu ndo kwapatwokele ngwangwangwa, chocho wakatukile.

¹² Mwe mukweze amutwalile ku mahienyi ni mwono, o alilembejekele chinji hali iye.

¹³ Yetu, nikutetekela ku ulungu, twakatukile nikwendamo ku Asone, se tunanyongo kuhitula Paulu; mumu chocho atushikile, mumu iye kanazange kwenda hashi.

¹⁴ Muze atuwanyine ku Asone, twamuhitwile mu ulungu, twahetele ku Mitelene.

¹⁵ Katu ku kuze, twahetele muze hikwacha kuze kwatalanganyi ni Chiu; mba muze hikwacha twahetele ku Samoso, ni se twatwamine ku Trojiliu, muze hikwacha twahetele ku Miletu.

¹⁶ Mumu Paulu te hahala kuhiana Efwesu, hanga kechi katwama shimbu mu Eshia; mumu walipupwishile, hanga kachi mahasa, akahete ku Yerusaleme ha tangwa lia Pentekoste.

¹⁷ Ku Miletu watumine ku Efwesu, watambikile makulwana a chikungulwila eze kuli iye.

¹⁸ Muze heza, wambile kuli ayo ngwenyi, Nunanyingika yenwene, chize ku tangwa litangu nahetele ku Eshia, ngwe chize napwile hamwe ni yenu shimbu lieswe,

¹⁹ nalingilile Mwene ni mbunge yeswe ya kulikehesa, ni masoji anji, ni yeseko yize yanguwanyine ni utwahe wa A-Yunda;

²⁰ ngwe chalitwaminyine kunwambulwila chize cheswe chakunufumbula, nikunulongesa hakachi ka mbunga ya atu, ni ku zuwo ni zuwo nawa,

²¹ nashindakenyene chikolo kuli A-Yunda ni A-Ngresia kulikonyeka kuli Zambi, ni Ufulielo muli Mwene Yesu Kristu.

²² Haliapwila, talenu, ngunayi wa kukasa mu Spiritu ku Yerusaleme, Chanyingikine yuma yize muyikanguwanako:

²³ shina Spiritu Musandu kakungushindakenya chikolo mu membo eswe, ngwenyi, Malenge ni luyinda yinakutwaminyina.

²⁴ Alioze chishi kunyonga mwono wami ngwe chuma chilemu kuli yami mwene, hanga ngukamanunune jila yami ni uwahililo, ni uvumbiko uze natambwile kuli Mwene Yesu, kushindakenya chikolo sango lipema lia vumbi lia Zambi.

²⁵ Haliapwila, ngunanyingika, yenu eswe, hakachi kenu nendanganyine nikwambujola wanangana wa Zambi, kunuchi kamona meso jami nawa.

²⁶ Kashika ngunashindakenya kuli yenu tangwa lino, ngwami, Ngunasambe ku manyinga ja atu eswe.

²⁷ Mumu chalitwaminyine kwambujola kuli yenu mana eswe a Zambi.

²⁸ Keyelenu kuli yenwene, ni ku mbunga yeswe ya mapanga, yize Spiritu Musandu hananuse tulayi, mukufunga chikungulwila cha Zambi, chize azukile ni manyinga jenyi mwene.

²⁹ Mumu ngunanyingika muze hinaya yami, tungunga asasu makanjila hakachi kenu, waze kechi kavwila keke mbunga ya mapanga.

³⁰ Hakachi ka yenwene nawa kumakasoloka malunga akwa kuhanjika yuma ya kupiya, mukukoka tumbaji kunyima yo.

³¹ Kashika lenu, iwulukenu ngwe ha miaka yitatu, ufuku ni mwalwa, chalitwaminyine kukanyamisa mweswe wa kuli yenu ni masoji.

³² Haliapwila ngunanukunjika kuli Zambi, ni ku liji lia vumbi lienyi, lize Unahase kunukolesa, nikunwaha chihinga hakachi ka waze hanaasela ku usandu.

³³ Chevwile kuzo ha prata ja niumwe, hanji oru, hanji mahina, ka.

³⁴ Nunanyingika yenwene ngwe moko ano alingile nikungumwesa chize nahonene, ni chize ahonene waze apwile hamwe ni yami.

³⁵ Mu yuma yeswe nanuhele cheseko, ngwe nikukilikita chocho, Chanutamba kukwasa akwa ulelu, nikwiwuluka maliji a Mwene Yesu, iye mwene wambile ngwenyi, Chinawaha kutambula alioze Shinaho kuhana.

³⁶ Muze te hamba yino yuma, waliumbile makungunwa, walembele hamwe no eswe.

³⁷ O eswe alilile chikolo, nikukangayika Paulu mu moko jo amumbejele chikolo.

³⁸ Evwile chinyengo kuhiana chikolo ha maliji aze ambile ngwenyi, Kunuchi kamona meso jami nawa. O amushinjikilile ndo ku ulungu.