Yilinga 2 - MUKANDA USANDU WA ZAMBI 1975

¹ Muze tangwa lia Pentekoste hiliaheta, o eswe apwile hamuwika ni mbunge yimuwika muma mumuwika.

² Susumuku kwakatukile mwilu lundunjila ngwe kutakumuka cha fuji ya tachi, chazalishile zuwo lieswe, muze atwamine.

³ Mba kwasolokele kuli ayo malimi a kupula, ngwe a kahia; o atwamine hali ayo eswe, umwe ni umwe.

⁴ O eswe azalile tò ni Spiritu Musandu, aputukile kuhanjika mu malimi eka, ngwe Spiritu waahele kuhanjika.

⁵ Achi, mwatwamine mu Yerusaleme A-Yunda, akwa kuwayila, a ku mavungu eswe mushi lia lilu.

⁶ Muze evwile liji lino, chizavu akungamine, o achingashanyine, mumu mutu ni mutu waavwile nikuhanjika mu limi lienyi mwene.

⁷ Eswe alishikishilile, akomokene, nikuliamba umwe kuli mukwo ni mukwo ngwo, Wano eswe anahanjika hi A-Ngalileya ko, nyi?

⁸ Ngwe kuchi yetu tunevu mutu ni mutu mu limi lienyi mwene, lize twasemukine nalio?

⁹ Ni A-Parto, ni A-Media, ni A-Elame, ni waze akutwama mu Mesopotamia, ni Yundeya, ni Kapandosea, ni Ponto, ni Eshia.

¹⁰ Ni Fwikia, ni Pamafwilia, ni Engitu, ni yihanda ya ku Pute, yize yakusulangana ni Sevwene, ni njize a ku Roma, ni A-Yunda, ni akwa kutayiza a ku mavungu,

¹¹ ni A-Krete ni A-Arabia, tunaevu nikuhanjika mu malimi ja yetwene yuma yinene ya Zambi.

¹² O eswe, alishikishilile nikukakashana chikolo, nikuliamba umwe kuli mukwo ni mukwo ngwo, Kuchi chinalumbunuka?

¹³ Akwo nikuchimbunguna ambile ngwo, Kanazala tò ni vinyu yiyema.

¹⁴ Alioze Petulu, nikukatuka hamwe ni kumi ni kashi wakololokele, nikwamba kuli ayo ngwenyi, Yenu A-Yunda, ni yenu eswe nwakutwama mu Yerusaleme, nyingikenu chino, panjikenu ku maliji jami.

¹⁵ Mumu wano kazengeweleko, ngwe yenu nunashinginyeka; mumu hapwa ola yamuchitatu lume ya mwalwa;

¹⁶ alioze chino hanachihanjika ku kanwa lia profeta Joele ngwenyi,

¹⁷ Kumuchikapwa ha matangwa a kusula, chocho anambe Zambi ngwenyi, Kumungukazukula Spiritu yami hali atu eswe; ni anenu a malunga ni anenu a mapwo kumakaprofeteza, ni akweze jenu kumakamona usolwelo, ni makulwana jenu kumakalota yilota:

¹⁸ ewa, ni chipwe hali ndungo jami a malunga ni hali ndungo jami a mapwo mungukazukwila Spiritu yami ha matangwa aze; no kumakaprofeteza;

¹⁹ mungukalweza yipekesa mwilu, ni yilayi hashi; manyinga, ni kahia, ni chishichishi cha mwishi:

²⁰ tangwa kumulikalumuka milima, ni kakweji kumakalumuka manyinga, shimbu tangwa lia Mwene kanda liza, tangwa lize linene ni liakusolola uhenya.

²¹ Mba kumuchikapwa, mweswawo matambika ha jina lia Mwene kumakamulamwina.

²² Yenu A-Izalele, ivwenu maliji ano: Yesu Ka-Nazare, lunga ashindakenyene kuli Zambi ni yipupu ni yipekesa, ni yilayi yize Zambi walingile ku kwoko lienyi mukachi kenu, chizechene ngwe nunanyingika yenwene;

²³ iye, se amukunjikile kushi nikulita ni upale ni chinyingi cha Zambi, yenu nikumukwata ni moko ja yingulungulu, hinunamuhachila ha kulusu, hinunamushihi;

²⁴ mwenawo Zambi hanamuhindwisa, nikukasulula yikola ya kufwa, mumu te kahashile kukwachika ni tachi jacho.

²⁵ Mumu David yamba ha kutwala kuli iye ngwenyi, Namwene mwe Mwene kumeso jami matangwa eswe; mumu iye kwali ku kwoko liami lia chindume, hanga chichi kakokoloka;

²⁶ kashika, mbunge yami yevwile chiseke, ni limi liami lialikwijile; ewa, musunya wami nawa kumuukahwima ni kutalatala:

²⁷ mumu yena kuchi kahichika alma yami mu Heteze, chipwe kuchi katayiza Musandu we kumona kupola.

²⁸ Yena hiunangunyingikisa majila ja mwono; mukanguzalisa ni chiseke kumeso je.

²⁹ Mandumbu, ngutayizenu kama, nguhanjike kuli yenu ha kutwala kuli kalamba David, ngwami, Hanafu hanamufundu nawa, ni fuka lienyi hamwe ni yetu lili ndo musono.

³⁰ Kashika, se iye wapwile profeta, kananyingika ngwe Zambi walishingile kulu kuli iye ni shingo ngwo, Wa kuli ana jenya makatwamisa umwe ha ngunja yenyi;

³¹ iye nikumona Shimbu-kanda, wahanjikile ha Uhindukilo wa mwe Kristu, ngwo, Kahichikile alma yenyi mu Heteze, chipwe musunya wenyi kuwamwene kupola.

³² Yono Yesu, Zambi hanamuhindwisa, hali iye yetu eswe tuli yela.

³³ Kashika se hanamunangamisa ku kwoko lia chindume lia Zambi, ni se hanatambula kuli mwe Tata chilakenyo cha Spiritu Musandu, hanazukula chino, nunamono, nunevu haliapwila.

³⁴ Mumu David kazezukile mu malilu; hindu iye kanambe ngwenyi, Mwe Mwene wambile kuli Mwene wami ngwenyi, Twama ku kwoko liami lia chindume,

³⁵ ndo mungusa akwa kole je chitwamo cha yiliato ye.

³⁶ Kashika, akwa zuwo lieswe lia Izalele anyingike chamwenemwene ngwo, Yono Yesu, nwamuhachilile ha kulusu, Zambi hanamupwisa ni Mwene ni Kristu.

³⁷ Achi, muze evwile chino alichokele mu mbunge, o ambile kuli Petulu ni apostolo ngwo, Mandumbu, kuchi mutulinga?

³⁸ Petulu wambile kuli ayo ngwenyi, Likonyekenu, anupapachise mutu ni mutu wa kuli yenu mu jina lia Yesu Kristu, ha ukonekeno wa milonga; mba kumunukatambula chawana cha Spiritu Musandu.

³⁹ Mumu kuli yenu chilakenyo kuchili, ni kuli ana jenu, ni kuli waze atwama kusuku, ni kuli waze eswe mwe Mwene Zambi yetu makatambika kuli iye.

⁴⁰ Iye ni maliji anji akwo washindakenyene chikolo, waashinjilile ngwenyi, Lilamwinenu ku chisemuko chino cha uhenge.

⁴¹ Hohene waze atambwile liji lienyi kanawa, aapapachishile, awezele kuli ayo ha tangwa lize liene ngwe tununu atatu a atu.

⁴² O anyongonwene mu longeso lia apostolo, nikuliendela, ni upatwilo wa mbolo, ni kulemba.

⁴³ Ni woma wejile hali atu eswe, ni yipekesa ni yilayi yinji ayilingile ku moko ja apostolo.

⁴⁴ Ni waze eswe afulielele apwile hamuwika, apwile ni yuma yeswe hamuwika.

⁴⁵ O alanjishile upite wo ni yikumba yo, ayanyinyine kuli eswe, nikulita ngwe mutu ni mutu wahonene.

⁴⁶ O, tangwa ha tangwa, nikunyongo nona ni mbunge yimuwika mu tembele, nikupatula mbolo ku zuwo ni zuwo, alile kulia cho ni uwahililo ni kutuwika cha mbunge,

⁴⁷ nikuhalisa Zambi, nikuwana vumbi kumeso ja atu eswe. Mba Mwene wawezele ku chikungulwila tangwa ha tangwa waze apwile nikulilamwina.