Yilinga 17 - MUKANDA USANDU WA ZAMBI 1975

¹ Achi, muze te hapalika ndusu mu Amafwipoli ni Apoloneya, ahetele ku Tesalonika, kuze kwapwile sunangonga ya A-Yunda:

² Paulu nikulita ni ndako yenyi, wanjilile mukachi ko, ni ha masambata atatu wahanjikile kuli ayo ku yisoneko.

³ Nikulumbununa pundu nikulweza ngwe chatamba Kristu kwivwa lamba, nikuhinduka hakachi ka afu; ngwenyi, Yono Yesu ngunanwambulwilayo, iye mwe Kristu.

⁴ Mba amwe akunukine, alifutwile hamuwika ni Paulu ni Saila, a kuli A-Ngresia akwa kuwayila chizavu chinene, ni anji a kuli mapwo akwa lutwe.

⁵ Alioze A-Yunda, nikwivwa ukwa, akungulwile amwe yingulungulu a ku yitanda, nikukunga mbunga, anehene vunda mu limbo; nikupupa zuwo lia Yasone, afupile kwaneha haze kuli atu;

⁶ muze kaawanyineko, ambulumwine Yasone ni amwe mandumbu kumeso ja akwa kuyula limbo, nikukololoka ngwo, Wano hanalumuna yifuchi yeswe ya hashi, haneza kuno nawa;

⁷ Yasone hanaatambula, ni wano eswe kakulimika ni shimbi ja Sesare, ngwo, Kwali mwanangana mukwo, iye Yesu.

⁸ Ni mbunga ni akwa kuyula limbo muze evwile yino yuma, alipikalile.

⁹ Muze te hatambula chifungo kuli Yasone, ni kuli akwo, aatuswile.

¹⁰ Mandumbu haze hene atumine Paulu ni Saila ha ufuku ku Mberia: o muze ahetele, anjilile mu sunangonga ya A-Yunda.

¹¹ Wano apemene kuhiana hi waze ko a mu Tesalonika, se atambwile liji ni mbunge yeswe, nikuhengula mu yisoneko tangwa ha tangwa akamone kachi yino yuma yapwile chocho.

¹² Kashika anji a kuli ayo afulielele; ni a kuli mapwo A-Ngresia alemu, ni anji a kuli malunga.

¹³ Alioze muze A-Yunda a ku Tesalonika anyingikine ngwo, Liji lia Zambi aliambujolele kuli Paulu ku Mberia, ayileko nawa, nikuvundula nikupinjisa mbunga.

¹⁴ Hohene mandumbu atumine Paulu mu jila ya kuya ku kalunga-lwiji: ni Saila ni Timoteu asalileko.

¹⁵ Alioze waze atwalile Paulu, amuhetesele ndo ku Atene, o se hatambula shimbi hali Saila ni Timoteu eze kuli iye nikawashi, akatukile.

¹⁶ Alioze shimbu Paulu aatachile mu Atene, Spiritu yenyi yakasumukine muli iye, ha kumona limbo lia tò ni mahamba.

¹⁷ Kashika wahanjikile mu sunangonga kuli A-Yunda ni akwa kuwayila, ni mu yitanda tangwa ha tangwa kuli waze apwileko.

¹⁸ Alioze amwe a kuli akwa mana jo, A-Epikuria ni A-Stoiku atakanyine nenyi, ambile ngwo, Yono mukwa kumbambula kuchi mamba? Akwo ambile ngwo, Kanasoloka ngwe mukwa kwambujola mazambi ja yilambala; mumu wapwile nikwambujola sango lipema lia Yesu ni Uhindukilo.

¹⁹ O yamukwata, yamutwala ku mulundu wa Mare, ngwo, Mutuhasa kunyingika longeso lino liaha unahanjika yena, nyi?

²⁰ Mumu unaneha yimwe yuma yakututungumwisa: tunazange kashika kunyingika chize yino yuma muyilumbunuka.

²¹ (Achi, A-Atene eswe ni ngeji kalingile chuma cheka shina kwambujola ni kwivwavwa chuma chimwe chaha.)

²² Mba Paulu yamana ha mulundu wa Mare, yamba ngwenyi, Yenu A-Atene, ha yuma yeswe ngunamono yenu nwahiana uwayilo.

²³ Mumu shimbu napalikile, natalile ha makombelelo jenu, nawanyine chilumbilo ni chisoneko chino ngwo, Kuli Zambi Yoze Kutwamunyingikine. Yoze kashika nwakuwayila ha kwalajala, iye ngunamwambujola kuli yenu.

²⁴ Zambi yoze watangile hashi ni yuma yeswe yiliho, iye se kapwa Mwenya lilu ni hashi, keshi kutwama mu matembele a kutangiwa ni moko;

²⁵ chipwe keshi kumulingila ni moko ja atu ngwe anahono chuma chimwe, se iye mwene kakuhana kuli eswe mwono, ni mwiku, ni yuma yeswe;

²⁶ iye watangile ku manyinga amuwika mavungu eswe a atu mukutwama ha kuzazuluka cheswe cha hashi, se afunjikile miaka yo yize waselele kushi, ni manjiza ja yihela yo:

²⁷ hanga akafupe Zambi, kachi akapapate kama hali iye, akamuwane, hindu katwamine kusuku ni mweswe wa kuli yetu;

²⁸ mumu Muli iye, tuli ni mwono, muli iye twakwenda, muli iye tuli ni kupwa chetu; nikulita ngwe chipwe amwe a kuli akwenu akwa kutomba miaso hanambe ngwo, Mumu yetu tuli ana jenyi nawa.

²⁹ Se kashika tuli ana a Zambi, kuchatutambile kushinginyeka ngwe Uzambi unalifu ni oru, hanji prata, hanji liwe, kaponya wa kwola ni ulangaji ni chishinginyeka cha atu.

³⁰ Miaka ya kwalajala kashika Zambi walihumikijine nayo; alioze haliapwila kakwamba atu eswe kweswe alikonyeke.

³¹ Mumu te hanasela tangwa muze makapatwila akwa yifuchi yeswe ya hashi mu ululi kuli yoze lunga hanamuselacho; ha chino hanahana chinyingi kuli atu eswe, se hanamuhindwisa hakachi ka afu.

³² O muze evwile ha Uhindukilo wa afu, amwe achimbungwine; ni akwo ambile ngwo, Mutukakwivwa ha chino tangwa likwo.

³³ Chocho Paulu watuhukile mukachi ko.

³⁴ Alioze amwe malunga alifutwile nenyi, afulielele: hakachi ko nawa, apwile Ndioniseu wa ku mulundu wa Mare, ni pwo, jina lienyi Ndamari, ni akwo hamwe no.