Yilinga 16 - MUKANDA USANDU WA ZAMBI 1975

¹ Iye wahetele ku Ndervwe nawa ni Lisetra: umwe kambaji wapwileko, jina lienyi, Timoteu, mwana wa umwe pwo Ka-Yunda, mukwa kufuliela, alioze tato Ka-Ngresia.

² Amushindakenyene kuli mandumbu mu Lisetra ni Ikoniu.

³ Yono, Paulu wamuzangile kuya hamwe nenyi; mba yamwanda, yamupwisa ngalami, mumu hali A-Yunda waze apwile kuze: mumu o eswe anyingikine ngwo, Tato Ka-Ngresia.

⁴ Shimbu apalikile mu membo, aakunjikile ndongo jize te hapatula apostolo ni makulwana ku Yerusaleme, akajifunge.

⁵ Chocho yikungulwila yatakamine mu Ufulielo, yokele tangwa ha tangwa.

⁶ O apalikile ndusu mu chifuchi cha Fwijia ni Ngalashia, se Spiritu Musandu waakanjishile kanda ambujola lie liji mu Eshia;

⁷ mba muze akundakenyene ni Mishia, esekele kuya ku Mbitinia; alioze Spiritu ya Yesu kaatayijileko;

⁸ o nikuhiana Mishia, apalumukine ku Troa.

⁹ Usolwelo wasolokele kuli Paulu ha ufuku: kwapwile lunga wa ku Masendoniya, kanamana, nikuliumba kuli iye ngwenyi, Zauka, wize muno mu Masendoniya, ukatukwase.

¹⁰ Muze te hamona usolwelo, haze hene twafupile kukatuka mukuya ku Masendoniya, nikunyonga ngwetu, Zambi hatutambika kwambujola sango lipema kuli ayo.

¹¹ Kashika, nikukatuka ku Troa, twendele mu ulungu pundu ku Samotrashia, ni muze hikwacha twendele ku Neapole;

¹² katu ku kuze twayile ku Fwilipu, lienalio lie limbo linene lia chihanda chize cha chifuchi cha Masendoniya, ni njize A-Roma atungileko nawa: twanyongonwene mu limbo lize matangwa amwe.

¹³ Ha tangwa lia Sambata, twatuhukile haze lia chajilo cha limbo, nikuya ku sesa lia lwiji, kuze apwile nikuyaya mukulemba, twatwamine, twahanjikile kuli mapwo waze akungamineko.

¹⁴ Mba umwe pwo, jina lienyi Lindia, mukwa kutalikila mahina a ufungo, wa ku limbo lia Taiatira, mukwa kuwayila Zambi watuvwile: Mwene wazulwile mbunge yenyi kupanjika ku yuma yize ahanjikile Paulu.

¹⁵ Muze te hamupapachisa, ni akwa zuwo lienyi, waliumbile kuli yetu ngwenyi, Kachi unangumono wamwenemwene kuli Mwene, njilenu mu zuwo liami, nukatwamemo; mba watukokesele.

¹⁶ Shimbu mutuchiya kuma kwa kulembela, umwe mwanapwo ni Spiritu ya munanyi, watakanyine ni yetu, yoze wamwesene miata jenyi upite wunji ha kuhanjika munanyi.

¹⁷ Iye nikukaula kunyima ya Paulu ni yetu, wakololokele ngwenyi, Wano atu e ndungo ja Zambi mwe Chitunda, waze akunwambulwila jila ya ulamwino.

¹⁸ Chino wachilingile matangwa anji. Mba Paulu nikwivwa chikulikuli chikolo, yatewulukila, yamba kuli Spiritu ngwenyi, Ngunakwambe mu jina lia Yesu Kristu ngwami, Tuhuka muli iye. Iye watuhukile ola yize yene.

¹⁹ Alioze muze miata jenyi amwene kutalatala cha upite wo hichahwa, akwachile Paulu ni Saila, o aambulumwine ku chitanda kumeso ja akwa kuyula.

²⁰ Muze te haaneha kuli tupitau, ambile ngwo, Wano A-Yunda kakupikala chikolo limbo lietu.

²¹ Kakwambujola ndako jize kuchalitele ni shimbi yetu tujitambule, chipwe kujilinga, se tuli A-Roma.

²² Ni mbunga aakatukilile hamuwika; ni tupitau aatokwele mahina jo, yaamba aalambe ni mbwechi.

²³ Muze te haalamba chikolo, aambilile mu zuwo lia ususu, nikuhana shimbi kuli kalayi, akaafunge kanawa.

²⁴ Iye se hatambula shimbi yino, waambilile mu zuwo lia muchima nikuyika molu jo mu kuli.

²⁵ Alioze ha muchima ufuku Paulu ni Saila apwile nikulemba, nikwimba miaso kuli Zambi, ni funge aapanjikile;

²⁶ susumuku kwapwile minyiko yinene, ni fundamentu ja zuwo lia ususu janyikine, ni mapito eswe haze hene azulukile; ni makana ja eswe aechele.

²⁷ Kalayi, ha kukasumuka mu tulo twenyi, yamona mapito ja zuwo lia ususu a kwazulula, watomwene katana kenyi, wambile kulishiha, se kanashinginyeka ngwenyi, Funge hanomboka.

²⁸ Alioze Paulu wakololokele ngwenyi, Kanda ulilinga chipi, mumu yetu eswe muno mutuli.

²⁹ Iye wechile lutemo, wanjilile fuji, nikuchikima, wafulamanyine kumeso ja Paulu ni Saila,

³⁰ waanehene haze, wambile ngwenyi, Malunga, kuchi changutamba kulinga hanga angulamwine?

³¹ O ambile ngwo, Fuliela Mwene Yesu Kristu, mba kumakakulamwina, yena ni akwa zuwo lie.

³² O ahanjikile kuli iye liji lia Mwene, ni kuli waze eswe apwile mu zuwo lienyi.

³³ Iye waatwalile ola yize yene ya ufuku, wasanyishine mijiji yo; mba amupapachishile, iye ni akwa jiko lienyi eswe haze hene.

³⁴ Iye waakandwishile ku zuwo lienyi, waahele kulia, walikwijile hamwe ni akwa zuwo lienyi eswe, se hafuliela Zambi.

³⁵ Muze hikwacha, tupitau atumine sarjentu, ngwo, Tusula wano atu.

³⁶ Kalayi wambulwile maliji ano kuli Paulu, ngwenyi, Tupitau hatuma hanga tunutusule: kashika haliapwila tuhukenu kama, nukatuke ni sambukila.

³⁷ Alioze Paulu wambile kuli ayo ngwenyi, Kanatulambe kumeso ja atu eswe, kutushi chitela, yetu tuli A-Roma, hanaumbila mu zuwo lia ususu; ni haliapwila kanatumbila haze ku tenga, nyi? Ka wate; alioze eze ayo ene akatutwale haze.

³⁸ Sarjentu ambulwile maliji ano kuli tupitau: o evwile woma muze evwile ngwo, A-Roma;

³⁹ o ejile nikuliumba kuli ayo; ni muze te haaneha haze, alembele akatuke ku limbo.

⁴⁰ O atuhukile mu zuwo lia ususu, anjilile mu zuwo lia Lindia: mba muze te hamona mandumbu, aalembejekele, yakatuka.