Yilinga 15 - MUKANDA USANDU WA ZAMBI 1975

¹ Mba amwe atu a kukatuka ku Yundeya apalumukine kuze, o alongesele mandumbu ngwo, Kunwahashile kulilamwina shina manupwisa ngalami nikulita ni ndako ya Mose.

² Muze te kashika Paulu ni Mbarnavwe halimika no chikolo, nikulihangujola no, atongwele Paulu ni Mbarnavwe, ni amwe akwo a kuli ayo, akanduke ku Yerusaleme kuli apostolo ni makulwana ha chihula chino.

³ Kashika, se chikungulwila aashinjikilile mu jila yo, apalikile ndusu mu chifuchi cha Fwenishia, ni cha Samaria, nikwambulula kwalumuka cha akwa mavungu; o evwishile mandumbu eswe uwahililo unene.

⁴ Muze te haheta ku Yerusaleme, akwa chikungulwila aasambililile hamwe ni apostolo ni makulwana, o ambulwile yuma yize yeswe Zambi walingile no.

⁵ Alioze kwakatukile amwe a ku mbunga ya A-Fwariseu, waze afulielele, ngwo, Chatamba kwapwisa ngalami, ni kwaamba akafunge shimbi ya Mose.

⁶ Mba apostolo ni makulwana akungulukile mukusopa chuma chino.

⁷ Muze te hikwapwa kulu mbandanga yinji, Petulu wakatukile, ngwenyi, Mandumbu, yenu nunanyingika, chize ku matangwa a kunyima, Zambi watongwele hakachi kenu, hanga akwa mavungu ku kanwa liami akevwe liji lia sango lipema, akafuliele.

⁸ Zambi, mukwa kunyingika mbunge, waashindakenyene, ni kwaaha Spiritu Musandu, chizechene ngwe kuli yetu nawa;

⁹ kapwishile kulipalikila hakachi ketu ni ayo, alioze wapemesene mbunge jo ku Ufulielo.

¹⁰ Haliapwila kashika, kuchi te nuneseka Zambi, mukusa kanga ha kota ya tumbaji, yize chipwe tulamba twetu, chipwe yetu, kutwahashile kumbata.

¹¹ Alioze tunafuliela makatulamwina ku vumbi lia Mwene Yesu, chizechene ngwe ayo nawa.

¹² Chizavu cheswe aholele kulungunga; o apanjikile kuli Mbarnavwe ni Paulu shimbu ambulwile ha kutwala ku yilayi ni yipekesa yize alingile Zambi hakachi ka akwa mavungu ku moko jo.

¹³ Muze te hahola, Tiangu wakumbulwile ngwenyi, Mandumbu, ngwivwenu:

¹⁴ Semone hanambulula ngwe Zambi hatangu watalile hali akwa mavungu mukuchiza mukachi ko munyachi ha jina lienyi.

¹⁵ Mba chino nawa chinalite ni maliji ja aprofeta; ngwe chinasonewa ngwo,

¹⁶ Kulutwe lia yino yuma mungukahiluka, mungukatungulula mbalaka ya David yize hiyinapuzuka; mungukatungulula yikulu yayo, mungukayimika:

¹⁷ hanga masalila ja atu akafupe Mwene, ni akwa mavungu eswe, waze hali ayo jina liami analivuluka, chocho anambe Mwene, yoze wakulinga yino yuma yeswe.

¹⁸ Zambi kananyingika yitanga yenyi yeswe chize ku miakulwila.

¹⁹ Kashika ngunapatula ngwami, Kanda tukapinjisa waze a kuli akwa mavungu matewulukila kuli Zambi;

²⁰ alioze tutume mukanda kuli ayo akasúle ku luchisa wa mahamba, ni ku utanji, ni kuli tushitu a kuhonda, ni ku manyinga.

²¹ Mumu Mose chize ku yisemuko ya shakulu, mu membo eswe kali ni waze akumwambujola, se kakumutanga mu masunangonga eswe ha masambata eswe.

²² Hohene chapemenene apostolo ni makulwana, hamwe ni chikungulwila cheswe, kutongola malunga hakachi ko, ni kwatuma ku Andiakia hamwe ni Paulu ni Mbarnavwe. Atumine Yunda, jina lienyi, Mbarsavwa, ni Saila, akwa lutwe hakachi ka mandumbu;

²³ o asonekene mukanda wa kutuma ku moko jo ngwo, Apostolo ni makulwana ni mandumbu, kuli mandumbu waze ali hakachi ka akwa mavungu ku Andiakia, ni Seria, ni Selishia, ngwetu, Muoyowenu.

²⁴ Mumu te hitunevu ngwo, Amwe a kukatuka kuli yetu, hananupikala ni maliji, nikulumbula mbunge jenu, ngwo, Chanutamba kupwa ngalami, nukatunge shimbi, alioze yetu kutwaahele poko niyimwe.

²⁵ Hichatupemena, se hitwalitesa ni mbunge yimuwika, kutongola malunga mukwatuma kuli yenu hamwe ni Mbarnavwe ni Paulu waze tunaazange chikolo.

²⁶ Atu aze hanasela mwono wo ku Utoji ha jina lia Mwene wetu Yesu Kristu.

²⁷ Yetu kashika, hitwatuma Yunda ni Saila, waze nawa kumakanwambulwila ni makanwa jo yuma yimuwika.

²⁸ Mumu hichapemena Spiritu Musandu, ni yetu, ngwetu, Kanda tunutwika chilemu kuhiana yino yuma Chanutamba kulinga:

²⁹ ngwetu, Nukasúle ku yuma yize hanayitambula ku mahamba, ni ku manyinga, ni kuli tushitu a kuhonda, ni ku utanji; nyi munulifunga ku yino yuma, munulinga kanawa. Twamenu kanawa.

³⁰ Kashika, muze aashikile, apalumukine ku Andiakia; ni muze te hakungulula chizavu, aakunjikile mukanda.

³¹ Mba muze te hautanga, awahililile ha kwivwa kulembejeka chize.

³² Ni Yunda ni Saila, se o nawa aprofeta, ashinjilile atu ni maliji anji, nikwatakamisa.

³³ Muze hatwama shimbu, mandumbu aashikile ni sambukila, ahilukile kuli waze aatumine.

³⁴ Alioze chapemenene Saila kutwamako.

³⁵ Ni Paulu ni Mbarnavwe anyongonwene mu Andiakia, nikulongesa nikwambujola sango lipema lia liji lia Mwene hamwe ni akwo anji nawa.

³⁶ Kulutwe lia matangwa amwe, Paulu wambile kuli Mbarnavwe ngwenyi, Tuhiluke, tukameneke mandumbu jetu mu membo eswe kuze twambujolele liji lia Mwene, tukatale chize anapu.

³⁷ Mbamavwe wazangile Yoano, jina lienyi likwo Marku, akaye hamwe no.

³⁸ Alioze Paulu kachinyongene chipema akaye hamwe no, yoze waehukile, nikuhiluka ku Pamafwila, kayile no ku milimo.

³⁹ Kwakatukile kashika kulihamika chinene, chocho alihandunwine umwe kuli mukwo, ni Mbarnavwe wayile ni Marku, akende mu ulungu ku Saipuru:

⁴⁰ alioze Paulu watongwele Saila, wakatukile, se mandumbu hamukunjika ku vumbi lia Mwene.

⁴¹ Iye wapalikile ndusu mu Seria ni Selishia, nikutakamisa yikungulwila.