Yilinga 14 - MUKANDA USANDU WA ZAMBI 1975

¹ Chapwile mu Ikoniu, anjilile hamuwika mu sunangonga ya A-Yunda, chocho ahanjikile mba chizavu chinene cha A-Yunda ni A-Ngresia afulielele.

² Alioze A-Yunda waze kononokene avundwile akwa mavungu nikwalumbula ha kutwala kuli mandumbu.

³ Anyongonweneko kashika shimbu linene, nikuhanjika ni hamu muli Mwene, mwenawo washindakenyene ku liji lia vumbi lienyi se atayijile yilayi ni yipekesa akayilinge ku moko jo.

⁴ Alioze chizavu cha mu limbo ahandunukine; mba amwe apwile hamwe ni A-Yunda, ni akwo apwile hamwe ni apostolo.

⁵ Mba muze aakatukilile, ni akwa mavungu, ni A-Yunda, ni akwa kuyula jo, mukwalinga chipi nikwaasa mawe,

⁶ o ha kuchinyingika achinyinyine ku membo ja Laikoneya, ni Lisetra, ni Ndervwe, ni chifuchi cha kujingilika:

⁷ kuze ambujolele sango lipema.

⁸ Ku Lisetra kwatwamine umwe lunga wakokolokele ku molu jenyi, chilema chize ku jimo lia naye, kendele nilimwe tangwa.

⁹ Yono wevwile Paulu kuhanjika: mwenawo wamuhulikilile meso, wamumwene ngwe kali ni Ufulielo amuhindwise.

¹⁰ Wambile ni liji linene ngwenyi, Katukako, umane kachichi ha molu je: iye wanyangumukine, wendele.

¹¹ Alioze muze mbunga amwene chize alingile Paulu, akololokele mu limi lia Laikoneya ngwo, Mazambi hanahulumuka kuli yetu ni kulifwa cha atu.

¹² O alukile Mbarnavwe ngwo, Yupita; alukile Paulu ngwo, Merkuriu, mumu iye wapwile mukwa lutwe kuhanjika.

¹³ Sasendote wa Yupita, yoze tembele yenyi yapwile kulutwe lia limbo, wanehene ngombe ni yipangula ku yikolo, iye wafupile kulambula chitapo hamuwika ni mbunga.

¹⁴ Alioze muze apostolo, Mbarnavwe ni Paulu, achivwile, asonyene mahina jo, o atuhukile fuji, ayile hakachi ka mbunga nikukololoka ngwo,

¹⁵ Malunga, kuchi te nunalingi yino yuma? Yetu tuli atu chimuwika ngwe yenu, tunanwambulwila sango lipema, ngwetu, Chanutamba kwehuka yuma yino ya kuseka, nukatewulukile kuli Zambi ya mwono, yoze watangile lilu ni hashi ni kalunga-lwiji, ni yuma yize yeswe yilimo:

¹⁶ iye ha yisemuko yize hiyinapalika Watayijile mavungu eswe kwenda mu majila jo ene.

¹⁷ Hindu kalihichikile iye mwene keshi chela, te walingile yipema, wanuhele vula wa mwilu ni tukweji a kwima mihuko, nikuzalisa mbunge jenu ni kulia ni chiseke.

¹⁸ O nikwamba yino yuma hindu chapwile chikalu kuchinda mbunga kwalambula chitapo.

¹⁹ Alioze kwejile A-Yunda a ku Andiakia ni Ikoniu, o nikukununa mbunga, ashile mawe Paulu, amumbulumwine haze lia limbo, nikushinginyeka ngwo, Hanafu.

²⁰ Alioze shimbu tumbaji amanyine ha kumujingilika, wakatukile, wanjilile mu limbo; ni muze hikwacha wayile hamwe ni Mbarnavwe ku Ndervwe.

²¹ Muze te hambulula sango lipema ku limbo lize, ni muze te hatayisa tumbaji anji, ahilukile ku Lisetra ni Ikoniu ni Andiakia.

²² Nikutakamisa tumbaji, nikwashinjila kunyongonona mu Ufulielo, ngwo, Ku luyinda munji chatutamba kunjila mu wanangana wa Zambi.

²³ Mba muze te haatongwela makulwana mu yikungulwila yeswe, nikulemba, nikulitwamina kulia, aakunjikile kuli Mwene, yoze te hanamufuliela.

²⁴ O apalikile ndusu mu Piseteya, ahetele ku Pamafwilia.

²⁵ Muze te hahanjika liji mu Peleje, apalumukine ku Atalia.

²⁶ Kuze endele mu ulungu ku Andiakia, kuze aakuajikile kulu ku vumbi lia Zambi ha milimo yize te hayimanununa.

²⁷ Muze te haheta, hakungulula akwa chikungulwila, ambulwile kuli ayo yuma yize yeswe Zambi walingile no, ngwe wazulwile pito lia Ufulielo kuli akwa mavungu.

²⁸ O atwamineko shimbu linene hamwe ni tumbaji.