Yilinga 12 - MUKANDA USANDU WA ZAMBI 1975

¹ Ha mwaka uze mwanangana Heronde wakwachile amwe a kuli akwa chikungulwila mukwalinga chipi.

² Washihile ni katana Tiangu, yayo ya Yoano.

³ Ni muze amwene ngwe chapemenene A-Yunda, wawezele kukwata Petulu nawa. Chapwile ha matangwa a mbolo kuyishi futunwiso.

⁴ Ni muze te hamukwata, wamusele mu zuwo lia ususu, wamukunjikile ku mbunga jiwana ja maswalale amufunge; se wahalile kulutwe lia Chizomboka kumuneha haze kuli atu.

⁵ Kashika afungile Petulu mu zuwo lia ususu; alioze akwa chikungulwila amulembelele kuli Zambi ni mbunge yeswe.

⁶ Muze Heronde ambile kumuneha haze, ufuku uze wene Petulu wapwile mu tulo mukachi ka maswalale aali, wa kukasa ni malenge aali: ni tulayi kulutwe lia pito alayile zuwo lia ususu.

⁷ Kumanyi, mungelo wa Mwene wamanyine hehi nenyi, ni pangu liapangukile mu zuwo lia ususu: iye walambile Petulu ha lumbu lienyi, wamulawishile ngwenyi, Katuka nikawashi. Mba malenge jenyi echele moko jenyi.

⁸ Mungelo wambile kuli iye ngwenyi, Lijichike muya we, ukase haku je. Mba walingile chocho. Yamba kuli iye ngwenyi, Zala hina lie, ungukaule.

⁹ Mba watuhukile, wamukawile; kanyingikine ngwenyi, Chino chuma chamwenemwene, chize alinga mungelo, alioze washinginyekene ngwenyi, Usolwelo ngunamono.

¹⁰ Ni muze te hapalika tulayi atangu ni amuchiali, ahetele ku chajilo cha utale chize chatwala ku limbo, acho chene chazulukile kuli ayo, o atuhukile, nikupalika ndusu tapalo limuwika; ni haze hene mungelo wamuhichikile.

¹¹ Muze te Petulu halaula pundu, wambile ngwenyi, Haliapwila, ngunanyingika chamwenemwene Mwene hatuma mungelo wenyi mba hangupulula ku kwoko lia Heronde ni ku kulawoka cheswe cha atu ja A-Yunda.

¹² Muze te hazewula chuma chino, wayile ku zuwo lia Maria, naye ya Yoano, jina lienyi likwo, Marku; muze anji akungamine mukulemba.

¹³ Muze angongwelele ku pito, mwanapwo, jina lienyi Ronda, wayile mukutala;

¹⁴ muze anyingikine liji lia Petulu, ha uwahililo kazulwileko pito, alioze wanjilile fuji, akaambulwile ngwenyi, Petulu kanamana ku chikolo.

¹⁵ O ambile kuli iye ngwo, Unazaluka. Alioze walihalwile ngwenyi, Chamwenemwene. O ambile ngwo, Mwe mungelo wenyi.

¹⁶ Alioze Petulu wanyongonwene kungongwela; o muze te hazulula, amumwene mba alishikishilile.

¹⁷ Iye, nikulahula kuli ayo ni kwoko lienyi ahole, wambile kuli ayo ngwe Mwene wamunehene haze lia zuwo lia ususu. Wambile ngwenyi, Ambulula yino yuma kuli Tiangu ni kuli mandumbu. Iye wakatukile, wayile kweka.

¹⁸ Achi, cheswe kwachile kwapwile choji chinene hakachi ka maswalale, ha kutwala kuli Petulu.

¹⁹ Muze te Heronde hamufupa, kamuwanyineko, wasopesele tulayi, wambile aashihe. Iye wakatukile ku Yundeya, wapalumukine ku Sesarea, kwenako yatwama.

²⁰ Achi, Heronde wevwile chikolo ufwatulo kuli A-Teru ni A-Sendone: o ejile kuli iye ni mbunge yimuwika, se hakununa Mbelastu kafufuchi ka mwanangana, echile uwanyino, mumu chifuchi cho achilishile ku chifuchi cha mwanangana.

²¹ Mba ha tangwa lia kutongolo, Heronde wazalile hina lia mukambo lia mwanangana, Watwamine ha chitwamo cha upatwilo, akahanjike kuli ayo.

²² Atu akalumiokene ngwo, Liji lia zambi umwe, hi lia mutu ko.

²³ Haze hene mungelo wa Mwene wamulambile, mumu kachichimiekene Zambi; iye wafwile, wa kuliwa ni mavuno.

²⁴ Alioze liji lia Zambi liafumanyine; lialiwezele.

²⁵ Ni Mbarnavwe ni Saulu akatukile ku Yerusaleme, ahilukile, muze te hamanununa uvumbiko wo, nikuneha nawa hamwe no Yoano, jina lienyi likwo, Marku.