Yilinga 10 - MUKANDA USANDU WA ZAMBI 1975

¹ Kwapwile umwe lunga mu Sesarea, jina lienyi Koneliu, kapitau ka mukana wa maswalale uze anauvuluka ngwo, Wa Halia,

² mukwa kuwayila, iye mukwa kwivwa woma wa Zambi hamwe ni akwa zuwo lienyi eswe, iye wahanyine yawana kuli atu, waliumbile kuli Zambi matangwa eswe.

³ Ha ola yamuchilivwa ya mwalwa wamwene zwalala mu usolwelo, mungelo wa Zambi, kananjila kuli iye, nikwamba kuli iye ngwenyi, Koneliu.

⁴ Iye, nikumuhulikila meso, wa tò ni woma, wambile ngwenyi, Kuchi Mwene? Wambile kuli iye ngwenyi, Kulemba che ni kuhana che hichinazezuka ngwe Chiwulwiso kumeso ja Zambi.

⁵ Haliapwila tuma malunga ku Yopa, akasake Semone, jina likwo ngwo, Petulu:

⁶ kanamuzeke kuli umwe Semone mukwa kukotongola, yoze zuwo lienyi lili ku sesa lia kalunga-lwiji. Iye makwambulwila chize Chakutamba kulinga.

⁷ Muze mungelo yoze wahanjikile kuli iye hakatuka, watambikile aali a ku ngamba jenyi a mu zuwo, ni swalale mukwa kuwayila wa kuli waze amuvumbikile matangwa eswe.

⁸ Muze te hambulula yuma yeswe kuli ayo, waatumine ku Yopa.

⁹ Muze hikwacha shimbu wano apwile mu jila, machikundama ku limbo, Petulu wakandukile helu lia zuwo mukulemba, ngwe ha ola amuchisambano:

¹⁰ iye wevwile zala, wazangile kulia: alioze shimbu machilulika, wapwile ngwe mu tulo;

¹¹ iye yamona lilu linazuluka, ni chikwachilo chimwe chinahulumuka, ngwe hina linene, kanalisunwisa ku mbango jiwana hashi:

¹² muze mwapwile tushitu eswe, ni tututu a hashi, ni tujila a mwilu.

¹³ Liji liejile kuli iye ngwo, Katuka, Petulu; shiha, ulie.

¹⁴ Alioze Petulu wambile ngwenyi. Ka, hi chocho ko, Mwene, se Chalile nichimwe chipi hanji cha luchisa nilimwe tangwa.

¹⁵ Liji liejile kuli iye cheka nawa chisuho chamuchiali ngwo, Chize hanapemesa Zambi, kanda uchivuluka ngwe, Chipi.

¹⁶ Chino chapwile katatu: mba chikwachilo chasosewele haze hene mwilu.

¹⁷ Shimbu Petulu akakashanyine muli iye mwene, chize usolwelo uze amwene muulumbunuka, kumanyi, malunga waze atumiwine kuli Koneliu, te hahula ha zuwo lia Semone, amanyine ku chikolo,

¹⁸ atambikile, nikuhula kachi Semone, jina lienyi likwo Petulu, kanatwamako.

¹⁹ Shimbu Petulu azewile usolwelo, Spiritu wambile kuli iye ngwenyi, Tala, malunga atatu kanakufupu.

²⁰ Alioze katuka, upalumuke, uye hamwe no, kanda uyambashana nichimwe: mumu hingunaatumu.

²¹ Petulu wapalumukine kuli malunga, wambile ngwenyi, Yoze nunamufupu, yami: chika nunejila?

²² O ambile ngwo, Koneliu, kapitau, mukwa ululi, mukwa kwivwa woma wa Zambi, kakumushindakenya ku vungu lieswe lia A-Yunda, kanakamwambulwila kuli mungelo musandu kukusaka, wize ku zuwo lienyi, akevwe maliji kuli yena.

²³ Kashika waanjishile mu zuwo, waazekele. Mba muze hikwacha Petulu wakatukile akaye hamwe no, ni amwe a kuli mandumbu ku Yopa ayile hamwe nenyi.

²⁴ Muze hikwacha anjilile mu Sesarea. Koneliu machiatalatala, se hanakungulula usoko wenyi ni tusendo twenyi.

²⁵ Muze Petulu anjilile mu zuwo, Koneliu wamupatwijile, wafulamanyine ku molu jenyi, wamuwayilile.

²⁶ Alioze Petulu wamukatwishile ngwenyi, Katuka; yami nawa nguli mutu.

²⁷ Iye wanjilile nikulishimwinya nenyi, wawanyine anji akungamine:

²⁸ wambile kuli ayo ngwenyi, Yenu nunanyingika ngwe kuchalitele hali Ka-Yunda kulifutula, hanji kuliendela ni umwe wa ku vungu likwo, alioze Zambi hanangulweza ngwenyi, Kanda uvuluka niumwe mupi hanji wa luchisa:

²⁹ kashika yingwiza nikuhamika nichimwe, muze unakangusaka. Ngunahula kashika kuchi te nwangusaka.

³⁰ Koneliu wambile ngwenyi, Matangwa awana kunyima, napwile nikulitwamina kulia ndo ku ola yino; ha ola yamuchilivwa, ngunalembe mu zuwo liami; kumanyi, lunga unamana kumeso jami ni hina lia mukambo lia kulejima.

³¹ Yamba ngwenyi, Koneliu, hanapanjika ku kulemba che, ni kuhana che hichinazezuka ngwe Chiwulwiso kumeso ja Zambi.

³² Kashika tuma ku Yopa, Ukasake Semone, jina lienyi likwo Petulu; kanamuzeke mu zuwo lia Semone mukwa kukotongola ku sesa lia kalunga-lwiji, iye muze meza makahanjika ni yena.

³³ Haze hene kashika ngunakatuma kuli yena; ni wakalakala hiweza. Haliapwila kashika, yetu eswe kuno kutuli kumeso ja Zambi, mukwivwa yuma yize yeswe hanakwambe kuli Mwene.

³⁴ Mba Petulu Wapakwile kanwa lienyi, wambile ngwenyi, Chamwenemwene ngunamono Zambi keshi katonde:

³⁵ alioze mu mavungu eswe yoze wakumuvwila woma, wakulinga ululi, kakupemena kuli iye.

³⁶ Liji lize watumine kuli ana a Izalele, nikwambujola sambukila muli Yesu Kristu; (iye Mwene wa eswe),

³⁷ Liji lize nunanyingika yenwene ngwami, Lize liafumanyine ndusu mu Yundeya mweswe, nikuputuka ku Ngalileya, chize ku upapachiso uze ambujolele Yoano;

³⁸ ngwami, Yesu wa ku Nazare, ngwe amuwayishile ni maji kuli Zambi ni Spiritu Musandu ni tachi: iye wendele nikulinga yipema, nikuhindwisa waze eswe aamwesene lamba kuli Ndiapu; mumu Zambi wapwile hamwe nenyi.

³⁹ Yetu tuli yela ja yuma yize yeswe alingile, ni mu chifuchi cha A-Yunda, ni mu Yerusaleme; iye amushihile, nikumuzezeleka ha mutondo.

⁴⁰ Alioze Zambi wamuhindwishile ha tangwa liamuchitatu, wamusolwele pundu;

⁴¹ hi kuli atu eswe ko, alioze kuli yela waze Zambi waatongwele kushi, yetu twalile, twanwine hamwe nenyi muze te hahinduka hakachi ka afu.

⁴² Iye watuhele shimbi mukwambujola kuli atu, nikushindakenya chikolo ngwetu, Yono hanamusela kuli Zambi Sopi ya a mwono ni afu.

⁴³ Kuli iye aprofeta eswe kakushindakenya ngwo, Ku jina lienyi mweswawo mamufuliela makatambula ukonekeno wa milonga.

⁴⁴ Shimbu Petulu machihanjika maliji ano, Spiritu Musandu wejile hali waze eswe evwile lie liji.

⁴⁵ Akwa kufuliela a ku ungalami, alishikishilile, waze eswe ejile hamwe ni Petulu, mumu hali akwa mavungu nawa chawana cha Spiritu Musandu chazukukile.

⁴⁶ Mumu aevwile nikuhanjika mu malimi nikuchichimieka Zambi. Hohene Petulu wakumbulwile ngwenyi,

⁴⁷ Umwe mahasa kutukanjisa meya ha kupapachisa wano se hatambula Spiritu Musandu chizechene ngwe yetu nawa, nyi?

⁴⁸ Iye waambile atambule upapachiso mu jina lia Yesu Kristu. Hohene amulembele atwame matangwa amwe.