Yilinga 1 - MUKANDA USANDU WA ZAMBI 1975

¹ Yena Teofwilu, nasonekene mukanda utangu, ha kutwala ku yuma yize yeswe Yesu waputukile kulinga ni kulongesa nawa,

² ndo ku tangwa lize, amutambwile mwilu, muze te ku tachi ja Spiritu Musandu hahana shimbi kuli apostolo waze iye waatongwele:

³ kuli ayo nawa, walisolwele ni mwono ni yinyingi yinji, kulutwe lia lamba lienyi, nikumoneka kuli ayo makumi awana a matangwa, nikuhanjika yuma ya kutwala ku wanangana wa Zambi.

⁴ Iye, nikukunguluka hamwe no, waahele koki ngwenyi, Kanda nukakatuka ku Yerusaleme, alioze nukatwaminyine chilakenyo cha mwe Tata, chize ngwenyi, Nwevwile kuli yami:

⁵ mumu, Yoano chamwenemwene wapapachishile mu meya; alioze kumakanupapachisa muli Spiritu Musandu, kulutwe lia matangwa akepe.

⁶ O kashika, muze akungamine, amuhulile ngwo, Mwene, haliapwila muhilwisa wanangana kuli A-Izalele, nyi?

⁷ Iye wambile kuli ayo ngwenyi, Hi kuli yenu ko kunyingika mashimbu ni miaka, yize asele mwe Tata mu chiyulo chenyi mwene.

⁸ Alioze kumunukatambula tachi, muze Spiritu Musandu heza hali yenu: kumunukapwa yela jami, ni mu Yerusaleme, ni mweswe mu Yundeya, ni Samaria, ni ndo ku kasula-songo lia hashi.

⁹ Muze te hamba yino yuma, shimbu machitala, amupindumwine kwilu; ni lelwa liamutambwile, liamuswekele ku meso jo.

¹⁰ Shimbu machihulikila meso mwilu, shimbu Mwene machiya, kumanyi, malunga aali amanyine hakamwihi no, ni mahina atoma ja mukambo;

¹¹ aze nawa ambile ngwo, Malunga A-Ngalileya, kuchi te nunamana nikutala mwilu? Yono Yesu, hamuchiza kuli yenu amutambwile mwilu, chocho kumakeza chizechene ngwe hinwamumona nikuya mwilu.

¹² Hohene ahilukile ku Yerusaleme, ku mulundu uze Olevwe, uze uli hakamwihi ni Yerusaleme, wenyi wa Sambata kuhetako.

¹³ Muze te hanjila mu zuwo, akandukile ku chipatulo cha kwilu, muze atwamine; ni Petulu ni Tiangu, ni Yoano ni Andeleu, ni Fwilipe ni Tomase, ni Mbatolomeu ni Mateu, ni Tiangu, mwana Alfweu, ni Semone Zelote, ni Yundase, mwanakwo wa Tiangu.

¹⁴ Wano eswe anyongonwene ni mbunge yimuwika ni kulemba ni kuliumba, hamwe ni mapwo, ni Maria, naye ya Yesu, ni hamwe ni anakwo.

¹⁵ Ha matangwa aze, Petulu wamanyine mukachi ka mandumbu, (achi, mbunga ya atu a kukunguluka hamuwika apwile ngwe kulakaji ni makumi aali), wambile ngwenyi,

¹⁶ Mandumbu, chinatambe chisoneko chikamanunuke, chize ahanjikile Spiritu Musandu Shimbu-kanda, ku kanwa lia David, ha kutwala kuli Yundase, yoze wapwile kasongo kuli waze akwachile Yesu.

¹⁷ Mumu amwalwile hamwe ni yetu, neye wazukile chihanda cha uvumbiko uno.

¹⁸ (Achi yono walanjile munda ni kwononona cha uhenge wenyi; iye nikuholokela yololo hashi, wamengunukine mukachi, ni mijingwa yenyi yeswe yapusukile.

¹⁹ Mba waze eswe akutwama mu Yerusaleme achinyingikine; chocho avulukile munda uze mu limi lio ene ngwo, Akelendama. Unalumbunuka ngwo, Munda wa manyinga):

²⁰ mumu chinasonewa mu mukanda wa Masamu ngwo, Chihela chenyi chikapwe cha hululu, kanda akatwamamo niumwe; ni mukwo akatambule chitwamo chenyi.

²¹ Kashika, a kuli malunga waze endele hamwe ni yetu ha shimbu lize lieswe Mwene Yesu wapwile nikunjilanjila nikutuhwoka hakachi ketu,

²² putu ku upapachiso wa Yoano ndo ku tangwa lize amuchijile kuli yetu amutambule mwilu, chatamba umwe wa kuli wano akapwe chela hamwe ni yetu cha Uhindukilo wenyi.

²³ O akatwishile aali: José, yoze ngwo, Mbarsavwa, jina lienyi likwo Justo, ni Mataya.

²⁴ Mba alembele, ngwo, Mwene, mukwa kunyingika mbunge ja eswe, tulweze kama hakachi ka wano aali yoze hiunamutongola.

²⁵ Hanga atambule chihanda cha uvumbiko uno ni upostolo, kuze alimbukilile Yundase, hanga akaye kuma kwenyi mwene.

²⁶ Mba atele chela hali ayo; ni chela chaholokelele hali Mataya; o amwalwile hamwe ni apostolo kumi ni kashi.