Usolwelo 7 - MUKANDA USANDU WA ZAMBI 1975

¹ Kulutwe lia chino, namwene angelo awana kanamana ku mbango jiwana ja hashi, kanakwata fuji jiwana ja hashi, hanga fuji niyimwe kuyichi kalamba hashi, chipwe ha kalunga-lwiji, chipwe ha mutondo umwe, ka.

² Namwene mungelo mukwo, kanazezuka ku chivumbuko cha tangwa, kali ni Chijikilo cha Zambi ya mwono: iye wakololokele ni liji linene kuli angelo awana, waze aahele mukupinjisa hashi ni kalunga-lwiji,

³ ngwenyi, Kanda nupinjisa hashi, chipwe kalunga-lwiji, chipwe mitondo, ndo nitwajika ni Chijikilo ndungo ja Zambi yetu, ha mahuma jo.

⁴ Mba nevwile chize alwile waze aajikile ni Chijikilo ngwo, Kulakaji lia tununu, ni makumi awana a tununu, ni tununu awana, aajikile a ku minyachi yeswe ya ana ja Izalele.

⁵ A ku munyachi wa Yunda ajikile kumi lia tununu ni tununu aali; a ku munyachi wa Rupene, kumi lia tununu ni tununu aali; a ku munyachi wa Ngate, kumi lia tununu ni tununu aali;

⁶ a ku munyachi wa Ashe, kumi lia tununu ni tununu aali; a ku munyachi wa Napatali, kumi lia tununu ni tununu aali; a ku munyachi wa Manase, kumi lia tununu ni tununu aali;

⁷ a ku munyachi wa Simeone, kumi lia tununu ni tununu aali; a ku munyachi wa Levi, kumi lia tununu ni tununu aali; a ku munyachi wa Isaka, kumi lia tununu ni tununu aali;

⁸ a ku munyachi wa Zapulone, kumi lia tununu ni tununu aali; a ku munyachi wa José, kumi lia tununu ni tununu aali; a ku munyachi wa Mbenjamine, kumi lia tununu ni tununu aali aajikile ni Chijikilo.

⁹ Kulutwe lia yino yuma, namwene, mbunga yinene, yize niumwe mahasa kwalula, a ku mavungu eswe, ni ku minyachi yeswe, ni kuli atu eswe, ni ku malimi eswe, kanamana kulutwe lia ngunja, ni kumeso ja mwe Mwana-panga, kanazala mahina a ngungu atoma, ni mitango ya mingaji mu moko jo;

¹⁰ o yakokoloka ni liji linene, ngwo, Ulamwino wa kuli Zambi yetu, yoze watwama ha ngunja, ni kuli mwe Mwana-panga.

¹¹ Ni angelo eswe amanyine ha kujingilika ngunja, ni makulwana ni akwa mwono awana; o afulamanyine kulutwe lia ngunja, awayilile Zambi,

¹² ngwo, Amene! Lufuma, ni uhenya, ni mana, ni kusakwila, ni ulemu, ni tachi, ni ngolo, yikapwe kuli Zambi yetu ndo ku miaka yeswe ya mutolo. Amene.

¹³ Mba umwe wa kuli makulwana wangukumbulwile, ngwenyi, Wano aya, anazala mahina a ngungu atoma, kulihi anakatuka?

¹⁴ Nambile kuli iye ngwami, Mwene wami, yena unanyingika. Iye wambile kuli yami ngwenyi, Waze anatuhuka mu luyinda munene, hanakoso mahina jo ja ngungu, hanaatomesa mu manyinga ja mwe Mwanapanga.

¹⁵ Kashika kwali kulutwe lia ngunja ya Zambi; kakumulingila mwalwa ni ufuku mu tembele yenyi: ni yoze watwama ha ngunja mazazulula mbalaka yenyi hali ayo.

¹⁶ O kechi kevwa zala nawa, chipwe kechi kevwa pwila nawa; chipwe tangwa kulichi kaatwila nichimwe, chipwe chivukuminya chimwe, ka:

¹⁷ Mumu mwe Mwana-panga yoze uli mukachi ka ngunja kumapwa kafunga ko, maasongwela ku mafuji ja meya a mwono: Zambi makusumuna masoji eswe ku meso jo.