Usolwelo 6 - MUKANDA USANDU WA ZAMBI 1975

¹ Namwene muze mwe Mwana-panga apakwile chimwe cha ku yijikilo shimbiali, nevwile umwe wa kuli akwa mwono awana kanambe ni liji ngwe lia kukulunguza, ngwenyi, Tweya, utale.

² Namwene kavwalu mutoma, ni yoze watwamineho, kali ni uta wa kazenga; amuhele chipangula, iye watuhukile mukukumba, hanga akakumbe.

³ Muze apakwile Chijikilo chamuchiali, nevwile mukwa mwono wamuchiali kanambe ngwenyi, Tweya, utale.

⁴ Ni kavwalu mukwo muchila watuhukile: ahanyine kuli yoze watwamineho mukuchiza sambukila hashi, hanga akalishihe umwe ni mukwo ni mukwo; mba amuhele katana munene.

⁵ Muze apakwile Chijikilo chamuchitatu, nevwile mukwa mwono wamuchitatu ngwenyi, Tweya, utale, namwene kavwalu mulá; ni yoze watwamineho kali ni mbalansa mu kwoko lienyi.

⁶ Nevwile ngwe liji mukachi ka akwa mwono awana ngwo, Njongo ya tiliku ha lumbongo, ni njongo jitatu ja sevada ha lumbongo; kanda upinjisa maji ni vinyu.

⁷ Muze apakwile Chijikilo chamuchiwana, nevwile mukwa mwono wamuchiwana ngwenyi, Tweya, utale.

⁸ Namwene, kavwalu watomonoka: ni yoze watwamineho, jina lienyi, Kufwa; ni Heteze yakawile hamwe nenyi; aahele poko ha chihanda chimuwika cha ku yihanda yiwana ya hashi, mukushiha ni katana, ni kapunga, ni kufwa, ni kuli tushitu asasu a hashi.

⁹ Muze apakwile Chijikilo chamuchitano, namwene kushi lia chilumbilo alma ja waze aashihile ha liji lia Zambi ni ha Shindakenyo yize apwile nayo.

¹⁰ O akololokele ni liji linene ngwo, Ndo mwiji muka, Mwata musandu wamwenemwene, yena kushi kupatula, kushi kukala manyinga jetu hali akwa hashi?

¹¹ Mba ahanyine kuli ayo, umwe ni umwe, mahina a ngungu atoma; achambile kuli ayo ahwime shimbu likepe, ndo ndungoniakwo nawa ni mandumbu jo, waze maashiha chizechene ngwe ayo, mamanunuka.

¹² Namwene muze apakwile Chijikilo chamuchisambano, kwapwile minyiko yinene; ni tangwa lialumukine lilá ngwe chikeleyi chilá, ni kakweji mweswe walumukine ngwe manyinga.

¹³ Ni matongonoshi a mwilu aholokelele hashi, chizechene ngwe mukuyu muulukumuna makuyu jawo tulamafwi, muze muutukunga ku fuji yinene.

¹⁴ Ni lilu liatandulukile ngwe mukanda muze mauvunga; ni milundu yeswe ni matungu eswe yatutulukile kuma kwayo.

¹⁵ Ni mianangana ja hashi, ni mahando, ni amanjolo, ni pichi, ni yitakame, ni ndungo eswe, ni enya chifuchi eswe, aswamine mu yivwenge ni mu mawe a ku milundu.

¹⁶ O yamba ku milundu ni ku mawe ngwo, Holokelenu hali yetu, nutusweke ku meso ja yoze watwama ha ngunja, ni ku utenu wa mwe Mwana-panga.

¹⁷ Mumu tangwa linene lia utenu wenyi hilineza, mba iya mahasa kumana?