Usolwelo 5 - MUKANDA USANDU WA ZAMBI 1975

¹ Namwene ha kwoko lia chindume lia yoze Watwamine ha ngunja mukanda unasonewa muchima ni hanyima, wa kujika chikolo ni yijikilo shimbiali.

² Namwene mungelo wa ngolo kanambujola ni liji linene ngwenyi, Iya unatela kupakula mukanda, ni kupatula yijikilo yawo?

³ Mba niumwe wahashile mwilu chipwe hashi, chipwe kushi lia hashi, kupakula mukanda, chipwe kutalamo.

⁴ Mba nalilile chikolo, mumu niumwe kamuwanyine watela kupakula mukanda ni kutalamo:

⁵ mba umwe wa kuli makulwana yamba kuli yami ngwenyi, Kanda ulila; tala, mwe Ndumba yoze wa ku vungu lia Yunda, chikota cha David, hanakumbu kupakula mukanda ni yijikilo yawo shimbiali.

⁶ Mba namwene mukachi ka ngunja ni akwa mwono awana, ni mukachi ka makulwana, mwana-panga kanamana ngwe hamushiha, kali ni mbinga shimbiali, ni meso shimbiali, eno maspiritu shimbiali a Zambi a kutumiwa hashi heswe.

⁷ Iye wayile, wawanjile ku kwoko lia chindume lia yoze watwamine ha ngunja.

⁸ Mba muze te handa mukanda, akwa mwono awana ni makumi aali a makulwana ni makulwana awana afulamanyine kumeso ja mwe Mwana-panga, mweswe ni kalialia ni misenge ya oru ya tò ni insensu, yenayo yilemba ya asandu.

⁹ O yemba mwaso waha, ngwo, Yena kuwatela kwanda mukanda, ni kupakula yijikilo yawo: mumu akushihile, walanjile kuli Zambi ni manyinga je, amwe a ku mavungu eswe, ni ku malimi eswe, ni kuli atu eswe, ni ku minyachi yeswe,

¹⁰ mba Waapwishile kuli Zambi yetu wanangana ni asasendote, o kumakayula hashi.

¹¹ Namwene, nevwile liji lia angelo anji ha kujingilika ngunja, ni akwa mwono awana ni makulwana; ni chize aalwile ngwo, Chihuji cha yihuji ni tununu twa tununu.

¹² Kanambe ni liji linene ngwo, Mwe Mwana-panga yoze hanamushihi katela kutambula tachi, ni upite, ni mana, ni ngolo, ni ulemu, ni uhenya, ni lufuma.

¹³ Ni yuma yeswe ya kutangiwa, yize yili mwilu, ni hano hashi, ni kushi lia hashi, ni mu kalunga-lwiji, ni yuma yize yeswe yilimo, naavwile ngwo, Lufuma, ni ulemu, ni uhenya, ni ndundo yikapwe kuli yoze watwama ha ngunja ni kuli mwe Mwana-panga ndo ku miaka yeswe ya mutolo.

¹⁴ Ni akwa mwono awana ambile ngwo, Amene; ni makulwana afulamanyine, awayilile.