Usolwelo 4 - MUKANDA USANDU WA ZAMBI 1975

¹ Kulutwe lia yino yuma namwene, kumanyi, pito lia kwazulula mwilu, ni liji litangu lize nevwile ngwe chitavwi linahanjika ni yami ngwo, Zezuka, wize kuno, mungukulweza yuma yize chatamba kupwa kulutwe lia yino yuma.

² Haze hene napwile mu Spiritu: ni kumanyi, ngunja ayisele mwilu, ni ha ngunja umwe kanatwama.

³ Yoze watwamineho kalifwa ni liwe lia jasepe, ni sartiu: ni kongolo ha kujingilika ngunja, kalifwa ni esmeralda.

⁴ Ha kujingilika ngunja makumi aali a ngunja ni ngunja jiwana: ni ha ngunja makumi aali a makulwana ni makulwana awana kanatwama, kanazala mazalo atoma; ni ha mitwe yo yipangula ya oru.

⁵ Mu ngunja mwatuhuka mihenyo ni maliji ni kukulunguza; ni temo shimbiali ja kahia ja kuyila kulutwe lia ngunja, jenajo maspiritu shimbiali a Zambi;

⁶ Kulutwe lia ngunja ngwe Chitende cha katalilo chalifwa ni kristale. Ni mukachi ka ngunja, ni ha kujingilika ngunja, akwa mwono awana a tò ni meso kulutwe ni kunyima.

⁷ Mukwa mwono mutangu kalifwa ni ndumba, ni mukwa mwono wamuchiali kalifwa ni mwanangombe, ni mukwa mwono wamuchitatu kali ni meso ngwe ja mutu, ni mukwa mwono wamuchiwana kalifwa ni pupa wa kuhumuka.

⁸ Akwa mwono awana, akwete umwe ni umwe mapulwa asambano, kanazala tò ni meso ha kujingilika ni muchima: o keshi kuhwima mwalwa ni ufuku, kakwamba ngwo, Musandu, musandu, musandu, Mwene Zambi ya Ndundo-Jeswe, yoze wapwile, kwali, meza kupwa.

⁹ Muze akwa mwono machichimieka, nikulemesa, nikusakwila yoze watwama ha ngunja, yoze mukwa mwono ndo ku miaka yeswe ya mutolo,

¹⁰ makumi aali a makulwana ni makulwana awana mafulamana kumeso ja yoze mukwa mwono ndo ku miaka yeswe ya mutolo, mambila yipangula yo kulutwe lia ngunja, ngwo,

¹¹ Yena kuwatela, Mwene wetu kanda Zambi yetu, kutambula uhenya ni ulemu ni tachi, mumu yena watangile yuma yeswe, ni mumu ha upale we yapwile, yatangiwile.