Usolwelo 22 - MUKANDA USANDU WA ZAMBI 1975

¹ Mba wangulwezele lwiji wa meya a mwono, wa kutemuka ngwe kristale, kanatuhuka mu ngunja ya Zambi ni mwe Mwana-panga.

² Mukachi ka tapalo lialio, ni ha sali lino lia lwiji, ni ha sali lize, mutondo wa mwono wakwima kumi lia mihuko ni mihuka yiali, wakwima mihuko yawo kakweji ha kakweji: mafwo ja mutondo a kuwuka no mavungu.

³ Ni kukuchi kapwa nawa shingo; ni ngunja ya Zambi ni mwe Mwanapanga kumuyikapwamo: ni ndungo jenyi kumakamulingila.

⁴ O kumakamona meso jenyi; ni jina lienyi kumulikapwa ha mahuma jo.

⁵ Kukuchi kapwa nawa ufuku; o kafupile pangu lia ndeya, chipwe lia tangwa, ka; mumu Mwene Zambi kumakapanguka hali ayo; o kumakayula ndo ku miaka yeswe ya mutolo.

⁶ Iye wambile kuli yami ngwenyi, Maliji ano amwenemwene keshi mahuza: ni Mwene Zambi ya maspiritu ja aprofeta hanatumu mungelo wenyi mukulweza kuli ndungo jenyi chize chatamba kupwa nikawashi.

⁷ Talenu, nguneza nikawashi. Kawaha yoze mafunga maliji a uprofeto wa mukanda uno.

⁸ Ni yami Yoano nevwile, namwene yino yuma. Mba muze nevwile, namwene, nafulamanyine hanga nguwayile ku molu ja mungelo yoze wangulwezele yino yuma.

⁹ Iye yamba kuli yami ngwenyi, Kanda uchilinga: yami nguli ndungo-ni-mukwenu, ni ndungo-ni-mukwo ni mandumbu je, aprofeta, ni waze akufunga maliji a mukanda uno: wayila Zambi.

¹⁰ Iye yamba kuli yami ngwenyi, Kanda ujika ni Chijikilo maliji a uprofeto wa mukanda uno; mwaka uli hakamwihi.

¹¹ Ngwami, Yoze wakulinga uhenge, akalinge uhenge nawa; ni mukwa majilo, akalipwise mukwa majilo nawa; ni mukwa ululi, akalinge ululi nawa; ni musandu, akapwe musandu nawa.

¹² Talenu, nguneza nikawashi; ni kwononona chami chili hamwe ni yami, mukuhana kuli mweswe nikulita ngwe chitanga chenyi muchipwa.

¹³ Yami nguli mwe Alfwa, mwe Omega, mwe mutangu, mwe kasulasongo, we uputukilo, lie songo.

¹⁴ Kawaha waze akukosa mazalo jo ja ngungu, hanga akapwe ni chiyulo ku mutondo wa mwono, hanga akanjile ku yikolo mu limbo.

¹⁵ Haze atwama tuwa ni akwa kupanda, ni yitanji, ni yingalwe, ni akwa kukombelela mahamba, ni mweswawo wakufwila, wakutomba mahuza.

¹⁶ Yami Yesu hingunatumu mungelo wami mukushindakenya yino yuma kuli yenu mu yikungulwila. Yami nguli che chikota, mwe Mwana wa David, we mutumbu wa kutemuka.

¹⁷ Ni Spiritu ni ndungi kanambe ngwo, Tweya. Ni yoze mevwa ambe ngwenyi, Tweya. Ni yoze mevwa pwila eze: ni yoze mazanga atambule meya a mwono chawana.

¹⁸ Ngunashindakenya kuli mweswe mevwa maliji a uprofeto wa mukanda uno; ngwami, Kachi umwe maweza ku yino yuma, kachi Zambi makaweza kuli iye lamba lieka ni lieka, lize linasonewa mu mukanda uno.

¹⁹ Nyi kachi umwe machiza ku maliji a mukanda wa uprofeto uno, kachi Zambi makachiza chihanda chenyi ku mutondo wa mwono, ni mu limbo lisandu, ni ku yuma yize yinasonewa mu mukanda uno.

²⁰ Yoze wakushindakenya yino yuma kanambe ngwenyi, Ewa, nguneza nikawashi. Amene; tweya, Mwene Yesu.

²¹ Vumbi lia Mwene Yesu Kristu likapwe hamwe ni asandu eswe. Amene. Talentu ya oru — 59 kilos. Talentu ya prata — 44 kilos. Talentu ya unengu — 36 kilos. Efa—chisoka cha 30 kilos. Homere—ngwe 300 kilos. Hine—ngwe 6 litros. Mbate—efa — 35 litros. Kore—homere. Konkubina—Pwo umwe atwama nenyi aiioze kamumbachile. Virgem—Yoze kanda achilimona ni lunga.