Usolwelo 21 - MUKANDA USANDU WA ZAMBI 1975

¹ Mba namwene lilu liaha ni hashi haha; mumu lilu litangu ni hashi hatangu hiyinahu; ni kalunga-lwiji keshiho nawa.

² Namwene limbo lisandu, Yerusaleme yaha, yinahulumuka mwilu ya kuli Zambi, kuyinalulika hali mukwo-lunga ngwe ndungi wa kuhenyesa.

³ Nevwile liji linene lia kukatuka mwilu ngwo, Talenu, zuwo lia Zambi lili hamwe ni atu, iye kumakatwama hamwe no, o makapwa atu jenyi, ni Zambi mwene makapwa hamwe no, Zambi yo.

⁴ Iye makakusumuna masoji eswe ku meso jo; ni kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.

⁵ Ni yoze watwama ha ngunja wambile ngwenyi, Talenu, ngunatange yuma yeswe yaha. Iye yamba kuli yami ngwenyi, Soneka: mumu yino yuma yamwenemwene kuyishi mahuza.

⁶ Iye yamba kuli yami ngwenyi, Hiyinamanunuka! Yami nguli mwe Alfwa ni mwe Omega, we uputukilo, ni lie songo. Mungukahana kuli yoze mevwa pwila ku fuji lia meya a mwono, chawana.

⁷ Yoze makumba makahinga yino yuma; ni yami mungukapwa Zambi yenyi, iye makapwa mwanami.

⁸ Alioze hali akwa mwongo, ni waze keshi kufuliela, ni akwa kuzelwokesa, ni yingalwe, ni yitanji, ni akwa kupanda, ni akwa kukombelela mahamba, ni akwa mahuza eswe, chihanda cho kumuchikapwa mu Chitende chize cha kuyila ni kahia ni fundanga, chenacho che kufwa chamuchiali.

⁹ Mba umwe wa kuli angelo shimbiali waze apwile ni misenge shimbiali, yinazala ni lamba shimbiali lia kusula, wakundamine akahanjike kuli yami, ngwenyi, Tweya kuno, mungukulweza ndungi, pwo lia mwe Mwanapanga.

¹⁰ Iye wangumbachile mu Spiritu ku mulundu unene, usuku, wangulwezele limbo lisandu, Yerusaleme, linahulumuka mwilu lia kuli Zambi.

¹¹ Lili ni uhenya wa Zambi: pangu lialio liakulifwa ni liwe lilemu liahiana, ngwe liwe lia jasepe, ngwe kristale.

¹² Lili ni chipanga chinene chisuku kwilu; chize chili ni kumi lia yikolo ni yikolo yiali, ni ku yikolo, kumi lia angelo ni angelo aali; ni majina a kusonekaho, wano kumi lia mavungu ni mavungu aali a Izalele.

¹³ Ku Chivumbuko yikolo yitatu; ni ku Norte yikolo yitatu; ni ku Sule yikolo yitatu; ni ku Chitokelo yikolo yitatu.

¹⁴ Ni chipanga cha limbo chapwile ni kumi lia fundamentu ni fundamentu jiali, ni kumi lia majina ni majina aali a kusonekaho, majina ja kumi lia apostolo ni apostolo aali a mwe Mwana-panga.

¹⁵ Ni yoze wahanjikile ni yami, wapwile ni lumbungu wa oru ngwe cheseko, hanga akeseke limbo ni yikolo yalio, ni chipanga chalio.

¹⁶ Ni limbo kuliapwa lia mbango jiwana, ni usuhe walio chizechene ngwe utohe walio; iye wesekele limbo ni lumbungu ngwo, Tununu aali a kilometro ni kulakaji atano a kilometro: ni usuhe walio ni utohe walio ni usuku walio kwilu unalite.

¹⁷ Iye wesekele chipanga chalio ngwo, Kulakaji lia mbandu ni makumi awana a mbandu, ni mbandu jiwana, cheseko cha mutu, te cha mungelo.

¹⁸ Atungile chipanga chalio ni jasepe: ni limbo liapwile ni oru yipema ngwe katalilo mupema.

¹⁹ Fundamentu ja chipanga cha limbo jahenyene ni milali yeswe yeka ni yeka ya mawe alemu: fundamentu yitangu, jasepe; yamuchiali, safwira; yamuchitatu, kaseletoniya, yamuchiwana, esmeralda;

²⁰ yamuchitano, sarndonishe; yamuchisambano, sartiu; yamuchishimbiali, krisolita; yamuchinake, mberilu; yamuchilivwa, topajiu; yamuchikumi, krisoprasu; kumi ni kashi, jasendu; kumi ni yamuchiali, ametita.

²¹ Ni kumi lia yikolo ni yikolo yiali, kumi lia kakanga ni kakanga mwali; yikolo yeswe, chimwe ni chimwe chapwile kakanga umuwika; ni tapalo lia limbo, oru yipema ngwe katalilo mutoma.

²² Chamwenemo tembele niyimwe: mumu Mwene Zambi ya Ndundo-Jeswe, ni mwe Mwana-panga, ye tembele yalio.

²³ Limbo kuliafupile tangwa, chipwe kakweji kupangukamo, ka; mumu uhenya wa Zambi hiunalipangulula, ni ndeya yalio, mwe Mwana-panga.

²⁴ Ni mavungu kumakenda mu pangu lialio, ni mianangana a hashi makanehamo uhenya wo.

²⁵ Kechi kajila yajilo yalio nichimwe ha mwalwa (mumu ufuku kuuchi kapwamo).

²⁶ O kumakanehamo uhenya ni ulemu wa mavungu.

²⁷ Ni chuma cha luchisa, chipwe yoze wakulinga chizelwokeso, chipwe yoze wamutomba mahuza, kechi kanjilamo nichimwe: aiioze waze wika anaasoneka mu mukanda wa mwono wa mwe Mwana-panga.