Usolwelo 2 - MUKANDA USANDU WA ZAMBI 1975

¹ Kuli mungelo wa chikungulwila cha ku Efwesu Soneka ngwe, Yino yuma kanambe yoze wakukwata matongonoshi shimbiali mu kwoko lienyi lia chindume, yoze wakwenda mukachi ka yikwachilo shimbiali ya ndeya ya oru, ngwenyi,

² Ngunanyingika yitanga ye, ni kukilikita che, ni kunyongonona che, kwahashile kutayiza atu api, hiuneseka waze alitayilile kupwa apostolo, ni hi apostolo ko, hiunaawane akwa mahuza;

³ ni chize wakunyongonona, ni chize wevwile lamba mumu ha jina liami, ni chize kwevwile yikatalo.

⁴ Alioze chino ngukuli nacho ngwami, Hiunahichika zango lie litangu.

⁵ Iwuluka kashika kuze hiunaholoka, Ulikonyeke, ulinge yitanga yitangu; nyi ka, mungwiza kuli yena, munguchiza chikwachilo che cha ndeya ku chihela chacho, shina mulikonyeka.

⁶ Alioze chino uli nacho, wakupihilila ni yitanga ya A-Nikoleta, yize ni yami nawa nakupihilila nayo.

⁷ Yoze uli ni matwi, evwe chize anambe Spiritu ku yikungulwila. Kuli yoze makumba, mungukamwaha mukulia ku mutondo wa mwono uze uli mu Paraisu ya Zambi.

⁸ Kuli mungelo wa chikungulwila cha ku Semina Soneka ngwe, Yino yuma kanambe mwe mutangu, mwe kasula-songo, yoze wapwile mufu wahindukile ni mwono cheka nawa, ngwenyi,

⁹ Ngunanyingika luyinda we, ni uswale we; (alioze yena uli pichi); ni kutuka cha waze akwamba ngwo, Yetu tuli A-Yunda, aiioze hi A-Yunda ko, aiioze kapwa sunangonga ya Satana.

¹⁰ Kanda ukevwa woma wa yuma yize munuyivwila lamba: Ndiapu mambila amwe a kuli yenu mu zuwo lia ususu, hanga akanweseke, mba munukapwa ni luyinda kumi lia matangwa. Pwako mukwa jika ndo ku kufwa, mba mungukakwaha chipangula cha mwono.

¹¹ Yoze uli ni matwi, evwe chize anambe Spiritu ku yikungulwila. Yoze makumba kechi kalemana nichimwe ku kufwa chamuchiali.

¹² Ni kuli mungelo wa chikungulwila cha ku Perekamu Soneka ngwe, Yino yuma kanambe yoze uli ni katana wa mukwale kanambuka, ngwenyi,

¹³ Ngunanyingika kuze yena watwama, kuze ngunja ya Satana yili; ni yena wakulalaminya ku jina liami, kwalikalile Ufulielo wami, chipwe ha matangwa ja Andipa, chela chami wa jika, yoze amushihile hakachi kenu, kuze atwama Satana.

¹⁴ Alioze yuma yikehe ngukuli nayo, mumu uli no koko waze akulalaminya ku longeso lia Mbalau, yoze walongesele Mbalake kutela chitalingiso kulutwe lia ana ja Izalele, mukulia yuma yize hanayitambula yitapo ku mahamba, mukulinga utanji.

¹⁵ Chocho yena nawa uli no waze akulalaminya ku longeso lia A-Nikoleta chizechene.

¹⁶ Likonyeka kashika; nyi ka, mungwiza kuli yena nikawashi, mungukasa jita no ni katana wa mu kanwa liami.

¹⁷ Yoze uli ni matwi, evwe chize anambe Spiritu ku yikungulwila. Yoze makumba, mungukamwaha yimwe ya ku maná ya kuhengama: mungukamwaha lukumbo mutoma, ni ha lukumbo jina liaha linasonewa, lize niumwe manyingika shina yoze malitambula.

¹⁸ Kuli mungelo wa chikungulwila cha ku Tayatera Soneka ngwe, Yino yuma kanambe mwe Mwana Zambi, yoze ukwete meso jenyi ngwe mulengi wa kahia, ni yiliato yenyi ya kulifwa ni kengelia ja kulejima, ngwenyi,

¹⁹ Ngunanyingika yitanga ye, ni zango, ni Ufulielo, ni uvumbiko, ni kunyongonona, ni yitanga ye ya kusula yahiana yitangu.

²⁰ Alioze chino ngukuli nacho ngwami, Wakutayiza yoze pwo Jezebele kulongesa, yoze wakulivuluka profeta-wa-pwo; kakulongesa, kakupiangula ndungo jami mukulinga utanji, mukulia yuma yize hanayitambula yitapo ku mahamba.

²¹ Namuhele shimbu, hanga alikonyeke; iye kasolo kulikonyeka ha utanji wenyi.

²² Nyingikenu, mungumumbila ha muheta, ni waze akulinga nenyi utanji mungwambila mu luyinda munene, shina malikonyeka ha yitanga yenyi.

²³ Mungukashiha ana jenyi ni kufwa; ni yikungulwila yeswe kumanyingika yami nguli yoze wakuhengula muchima ni mu mbunge: mba mungukahana kuli mweswe wa kuli yenu nikulita ni yitanga yenu.

²⁴ Alioze kuli yenu, ngunambe ngwami, Kuli akwo mu Tayatera, waze eswe kanyingikine longeso lino, ngwe akwamba ngwo, Waze kanyingikine yuma ya Satana ya muma mwajotoka chishi kunutwika chilemu chikwo nichimwe.

²⁵ Hindu chize uli nacho chilalaminyenu ndo mungwiza.

²⁶ Yoze makumba, ni yoze mafunga yitanga yami ndo ku songo, mungukamwaha chiyulo hali mavungu.

²⁷ Iye makaayula ni mbwechi ya utale, ngwe sapa ja tengi mujipalwoka tuyihanda; chizechene ngwe ni yami nawa hingunatambula kuli Tata:

²⁸ Mba mungukamwaha mutumbu.

²⁹ Yoze uli ni matwi, evwe chize anambe Spiritu ku yikungulwila.