Usolwelo 19 - MUKANDA USANDU WA ZAMBI 1975

¹ Mba kulutwe lia yino yuma nevwile ngwe liji linene lia mbunga yinene mwilu, ngwo, Aleluya! Ni ulamwino, ni uhenya, ni tachi, ja mbala ja Zambi yetu.

² Mumu upatwilo wenyi wamwenemwene ni wa ululi: mumu hanapatwila chikoi munene, yoze wapihishile hashi ni utanji wenyi, hanakale manyinga ja ndungo jenyi ku kwoko lienyi.

³ Ni chisuho chamuchiali yamba ngwo, Aleluya! Ni mwishi wenyi yiufwindangana ndo ku miaka yeswe ya mutolo.

⁴ Ni makumi aali a makulwana ni makulwana awana, ni akwa mwono awana afulamanyine, akawayile Zambi, yoze watwama ha ngunja, ngwo, Amene; Aleluya!

⁵ Ni liji liatuhukile mu ngunja, ngwo, Halisenu Zambi yetu, yenu eswe ndungo jenyi, yenu nwakumuvwila woma, akepe ni anene.

⁶ Mba nevwile ngwe liji lia mbunga yinene, ngwe liji lia kukulunguza cha ngolo, ngwo, Aleluya! Mumu Mwene Zambi yetu, mwe Mukwa-Ndundo-Jeswe kanayulu!

⁷ Tuwahililenu, tulikwizenu, tumuchichimiekenu; mumu umbachiso wa mwe Mwana-panga hiweza, ni mukwo-pwo hanalilulika.

⁸ Mba amuhelecho azale linyu lia kutemuka, lipema; mumu hina lia linyu lipema, ye yitanga ya ululi ya asandu.

⁹ Iye yamba kuli yami ngwenyi, Soneka ngwe, Kawaha waze hanaatambika ku ulungi wa mwe Mwana-panga. Iye yamba kuli yami ngwenyi, Wano e maliji amwenemwene a Zambi.

¹⁰ Nafulamanyine ku yiliato yenyi hanga ngumuwayile. Iye yamba kuli yami ngwenyi, Kanda uchilinga: yami nguli ndungo-ni-mukwenu, ni ndungo-ni-mukwo ni mandumbu je, waze ali ni Shindakenyo ya Yesu: wayila Zambi: mumu Shindakenyo ya Yesu, spiritu ya uprofeto.

¹¹ Mba namwene lilu lia kwazulula; ni kumanyi, kavwalu mutoma, ni yoze unatwamako anamuvuluka ngwo, Wamwenemwene, Keshi-mahuza; iye yapatula, yasa jita ni ululi.

¹² Ni meso jenyi ngwe mulengi wa kahia, ni ha mutwe wenyi hiyili yipangula yinji; iye ali ni jina linasonewa, lize niumwe manyingika shina iye mwene.

¹³ Iye kanazala hina lia kuchupika mu manyinga: ni jina lienyi lize anamuvuluka ngwo, Lie Liji lia Zambi.

¹⁴ Ni mbunga ja maswalale jize jili mwilu, amukawile hali tuvwalu atoma, kanazala linyu, litoma lipema.

¹⁵ Mu kanwa lienyi mwatuhuka katana kanambuka, hanga akalambe nenyi mavungu: iye kumakaayula ni mbwechi ya utale; iye yaliata ukamino wa vinyu ya ufwatulo wa utenu wa Zambi ya Ndundo-Jeswe.

¹⁶ Iye ha hina lienyi ni ha chitongo chenyi jina akwete, linasonewa ngwo, Mwanangana wa mianangana, Mwene WA ENE.

¹⁷ Mba namwene mungelo, kanamana mu tangwa, iye wakololokele ni liji linene, kanambe kuli tujila waze eswe akuhumuka mukachi ka lilu ngwenyi, Tweyenu, nulikungulule ku chiteleka chinene cha Zambi;

¹⁸ hanga nukalie musunya wa mianangana, ni musunya wa amanjolo, ni musunya wa yitakame, ni musunya wa tuvwalu, ni wa waze akutwamaho, ni musunya wa enya chifuchi ni ndungo, ni akepe ni anene.

¹⁹ Namwene ngongo, ni mianangana ja hashi, ni mbunga ja maswalale jo, kanakunguluka mukwasa jita ni yoze Watwamine hali kavwalu, ni mbunga ja maswalale jenyi.

²⁰ Mba akwachile mwe ngongo, ni profeta wa kwonga hamwe nenyi, yoze walingile yilayi kumeso jenyi, yize wapiangwile nayo waze atambwile mufunda wa ngongo, ni waze awayilile kaponya kenyi: eswe ni aali aanyashine a mwono mu Chitende cha kahia chize cha kuyila ni fundanga.

²¹ Mba ashihile masalila ni katana yoze wakutuhuka mu kanwa lia yoze watwamine hali kavwalu: ni tujila eswe akuchile ni musunya wo.