Usolwelo 18 - MUKANDA USANDU WA ZAMBI 1975

¹ Kulutwe lia yino yuma namwene mungelo mukwo, kanahulumuka mwilu, kali ni poko yinene ya kuyula; ni hashi hapangulukile ni uhenya wenyi.

² Iye wakololokele ni liji lia ngolo ngwenyi, Babilonia hiyapuzuka, hiyapuzuka, hiyapwa muma mwa kutwama mwa andemoniu, ni zuwo lia ususu lia maspiritu eswe a luchisa, ni zuwo lia ususu lia tujila eswe a luchisa ni tujila eswe api.

³ Mumu mavungu eswe hananu ku vinyu ya ufwatulo wa utanji wenyi, ni mianangana ja hashi hanalingi nenyi utanji, ni akwa kutalikila hanalipichisa ku tachi ja kuhungumuka chenyi ni yipi.

⁴ Mba nevwile liji likwo lia kukatuka mwilu, ngwo, Tuhukenumo, atu jami, hanga kunuchi kaliendela ni milonga yenyi, hanga kunuchi katambula ya ku lamba lienyi;

⁵ mumu milonga yenyi hiyaheta ndo mwilu, ni Zambi hanewuluka yitanga ya uhenge wenyi.

⁶ Mufwetenu chizechene ngwe hanafwetesa, ni yisuho yiali, nikulita ni yitanga yenyi; mu musenge uze hanauchinge, muchingilenu yisuho yiali.

⁷ Ku chize cheswe hanalichichimieka, ni chize hanahungumuka ni yipi, chocho kuhiana mwehenu kupinda ni kunenganyana, mumu kanambe mu mbunge yenyi ngwenyi, Nakutwama mwananganawa-pwo, hi nguli twamishi ko, chichi kamona kunenganyana nichimwe.

⁸ Kashika ha tangwa limuwika lamba lienyi kumulikeza, kufwa ni kunenganyana, ni kapunga; kumakamwocha ni kahia; mumu mukwa ngolo, Mwene Zambi yoze wakumupatwila.

⁹ Ni mianangana a hashi waze hanalingi utanji, waze hanahungumuka ni yipi hamwe nenyi, kumakalinyenga, makalila mbimbi hali iye, muze mamona mwishi wa kuwema chenyi.

¹⁰ Mamana kusuku mumu ha woma wa kupinda chenyi, ngwo, Mama yami! Mama yami! Lie limbo linene! Babilonia lie limbo lia ngolo! Mumu susumuku upatwilo we hiuneza.

¹¹ Ni akwa kutalikila ja hashi yalila, yanenganyana hali iye, mumu niumwe malanda makupa jo nawa.

¹² Makupa ja oru, ni prata, ni mawe alemu, ni kakanga, ni mahina a linyu lipema, ni a ufungo, ni seda, ni ulombo wa ngengu; ni mitondo yeswe ya taimi, ni yuma yeswe ya mazo a njamba, ni yuma yeswe ya mitondo yilemu yahiana, ni ya kengelia, ni ya utale, ni ya mawe alemu;

¹³ ni kanela, ni mulungo, ni insensu, ni yitumbo ya vumba lipema, ni libano, ni vinyu, ni maji, ni wunga wa kufufunuka, ni tiliku, ni yimuna, ni mapanga; ni tuvwalu, ni matemba, ni mijimba, ni alma ja atu.

¹⁴ Ni mihuko yize mbunge ye yayivwilile usolo, hiyinakatuka kuli yena, ni yuma yeswe yipema ya uhenya hiyinakatuka kuli yena, kechi kayiwana nawa nichimwe.

¹⁵ Ni akwa kutalikila yino yuma, waze alipichishile kuli iye, makamana kusuku mumu ha woma wa kupinda chenyi, nikulila, nikunenganyana;

¹⁶ nikwamba ngwo, Mama yami! Mama yami! Lie limbo linene lize liazalile mahina a linyu lipema ni a ufungo ni ngengu, lialejimine ni oru ni mawe alemu ni kakanga!

¹⁷ Mumu susumuku upite upwa haha hiwapwa wa hululu; ni zauli eswe, ni akwa kwenda mu maulungu eswe, ni akwa kwendesa maulungu, ni waze eswe akulinga milimo yo ha kalunga-lwiji, amanyine kusuku.

¹⁸ O akololokele shimbu atalile mwishi wa kuwema chenyi, ngwo, Limbo lika mulifwa ni limbo linene?

¹⁹ O akuwile fufuta ha mitwe yo, akololokele, nikulila, nikunenganyana, ngwo, Mama yami! Mama yami! Lie limbo linene, muze waze eswe apwile ni maulungu ha kalunga-lwiji alipichishile ku ndando yenyi yilemu! Mumu susumuku hihapwa lia hululu.

²⁰ Ivwa chiseke, yena lilu, ni yenu asandu, ni yenu apostolo, ni yenu aprofeta; mumu Zambi hanapatula upatwilo wenu hali iye.

²¹ Mba mungelo wa ngolo wanjile liwe ngwe liwe linene ha kutwa nalio, walinyashine mu kalunga-lwiji, ngwenyi, Chocho ni tachi kumakanyasa hashi Babilonia, lie limbo linene, ni kechi kaliwana nawa nichimwe.

²² Ni liji lia akwa kwimba tulialia, ni njimba, ni akwa kwimba ndembo, ni akwa kwimba yitavwi, kechi kulivwa nawa nichimwe muli yena. Ni chilangaji niumwe wa ulangaji weswawo, kechi kamuwana nichimwe muli yena; ni liji lia kutwa kechi kalivwa nawa nichimwe muli yena.

²³ Ni pangu lia ndeya kulichi kapanguka nawa nichimwe muli yena; ni liji lia sandungi ni lia ndungi kechi kalivwa nawa nichimwe muli yena; mumu akwa kutalikila je apwile mahando ja hashi; mumu ni yipandapanda ye apiangwile mavungu eswe.

²⁴ Muli iye awanyine manyinga ja aprofeta ni ja asandu, ni ja waze eswe aashihile hashi.