Usolwelo 17 - MUKANDA USANDU WA ZAMBI 1975

¹ Mba umwe wa kuli angelo shimbiali, waze apwile ni misenge shimbiali, wejile, wahanjikile ni yami, ngwenyi, Tweya kuno, mungukulweza upatwilo wa chikoi munene, yoze watwama ha meya anji eka ni eka.

² Yoze mianangana ja hashi hanalingi nenyi utanji, ni akwa hashi hanazengewa ni vinyu ya utanji wenyi.

³ Iye wangumbachile muli Spiritu ku puya; mba namwene pwo kanatwama hali ngongo muchila wa tò ni majina a kushililika, kali ni mitwe shimbiali, ni kumi lia mbinga.

⁴ Ni pwo wazalile mahina ja ufungo ni ngengu, walejimine ni oru, ni mawe alemu, ni kakanga, kali ni musenge wa oru mu kwoko lienyi unazala ni yizelwokeso, te yuma ya luchisa ya utanji wenyi.

⁵ Ni ha huma lienyi, jina linasonewa ngwo, Chijimbikilo, Babilonia yinene, NAYE YA YIKOI NI YA YIZELWOKESO YA HASHI.

⁶ Namwene pwo kanazengewa ni manyinga ja asandu, ni manyinga ja yela ja Yesu. Muze namumwene, nakomokene ni kukomoka chinene.

⁷ Ni mungelo wambile kuli yami ngwenyi, Kuchi te wakomoka? Mungukwambulwila chijimbikilo cha pwo, ni cha ngongo yoze wakumumbata ha nyima yenyi, yoze uli ni mitwe shimbiali ni kumi lia mbinga.

⁸ Ngongo yoze hiwamona, wapwile, keshiho; himakanduka mu jondo, maya ku kwonwona. Ni akwa hashi, waze majina jo kasonewene chize ku kusela cha fundamentu ya hashi mu mukanda wa mwono, makakomoka muze mamona ngongo yoze wapwile, keshiho, makeza.

⁹ Muno muchili kunyonga cha mana ngwo, Mitwe shimbiali, milundu shimbiali, haze hatwama pwo.

¹⁰ Kwali mianangana shimbiali, atano hanalimbuka, umuwika kwali, ni mukwo kanda achiza; ni muze meza, chamutamba kusala hakepe.

¹¹ Ni ngongo yoze wapwile, keshiho, iye mwene nawa wamuchinake, ni wa kuli e shimbiali; maya ku kwonwona.

¹² Ni kumi lia mbinga jize hiwamona, kumi lia mianangana, waze kanda achitambula wanangana; aiioze matambula poko ngwe mianangana, hamwe ni ngongo, ha ola yimuwika.

¹³ Wano mbunge yimuwika akwete, yahana tachi jo ni poko yo kuli ngongo.

¹⁴ Wano kumakasa jita ni mwe Mwana-panga, ni mwe Mwana-panga kumakaakumba, mumu iye Mwene wa ene, Mwanangana wa mianangana; ni waze ali hamwe nenyi, hanaatambika, aze hanaatongola, aze amwenemwene.

¹⁵ Iye yamba kuli yami ngwenyi, Meya eka ni eka aze hiwamona, haze hatwama chikoi, atu ni yizavu yinji, ni mavungu ni malimi.

¹⁶ Ni kumi lia mbinga jize hiwamona, ni ngongo, wano kumakapwa ni kole kuli chikoi, makamupwisa wa hululu, makamupwisa ni uselesele, makalia musunya wenyi, makamwocha ni kahia.

¹⁷ Mumu Zambi wasele mu mbunge jo mukulinga upale wenyi, mukulikunda ni mbunge yimuwika, mukuhana wanangana wo kuli ngongo, ndo maliji a Zambi mamanunuka.

¹⁸ Ni pwo yoze hiwamona, limbo linene lize liakuyula mianangana ja hashi.