Usolwelo 16 - MUKANDA USANDU WA ZAMBI 1975

¹ Mba nevwile liji linene lia kukatuka ku tembele, Unambe kuli angelo shimbiali ngwo, Yénu, nukamwange misenge ya ufwatulo wa Zambi hashi.

² Mutangu wayile akamwange musenge wenyi hashi; mba kwapwile chilonda chipi ni chikalu hali atu aze apwile ni mufunda wa ngongo, ni waze awayilile kaponya kenyi.

³ Mungelo wamuchiali wamwangine musenge wenyi ha kalunga-lwiji; iye walumukine manyinga ngwe a mufu; ni akwa mwono eswe mu kalunga-lwiji afwile.

⁴ Mungelo wamuchitatu wamwangine musenge wenyi ha njiji ni ha mafuji ja meya; o alumukine manyinga.

⁵ Mba nevwile mungelo wa meya kanambe ngwenyi, Yena uli mukwa ululi, yena hwoli, yena wapwile, mwe Musandu, mumu hiunapatula chocho.

⁶ Mumu amwangine manyinga ja asandu ni aprofeta, hiunaahe manyinga a kunwa; mumu kanatelo.

⁷ Mba nevwile chilumbilo chinambe ngwenyi, Ewa, Mwene Zambi ya Ndundo-Jeswe, upatwilo we wamwenemwene ni wa ululi.

⁸ Mungelo wamuchiwana wamwangine musenge wenyi ha tangwa; alihelecho kupapa atu ni kahia.

⁹ Ni atu apapiwile ni chivukuminya chinene: mba ashililikile jina lia Zambi, yoze wapwile ni chiyulo ha lamba lino: aiioze kalikonyekene akamuchichimieke.

¹⁰ Mungelo wamuchitano wamwangine musenge wenyi ha ngunja ya ngongo; ni wanangana wenyi walayile; o ahalangenyene malimi jo ni yikola.

¹¹ O ashililikile Zambi wa mwilu mumu ha yikola yo ni yilonda yo, hindu kalikonyekeneko ha yitanga yo.

¹² Mungelo wamuchisambano wamwangine musenge wenyi ha lwiji munene, ha Ufrateze; ni meya jenyi omine chau, hanga jila ya mianangana a ku chivumbuko cha tangwa yikalulike.

¹³ Namwene munatuhuka mu kanwa lia ndragau, ni mu kanwa lia ngongo, ni mu kanwa lia profeta wa kwonga, maspiritu a luchisa atatu ngwe yula-ya-mbwota.

¹⁴ Mumu o maspiritu ja ndemoniu, nikulinga yilayi; waze akutuhuka nikuya kuli mianangana ja yifuchi yeswe ya hashi, mukwakungulula ku jita ya tangwa linene lia Zambi ya Ndundo-Jeswe.

¹⁵ (Talenu, nguneza ngwe mwiji; kawaha yoze malá, yoze mafunga mazalo jenyi, hanga kechi kenda ni uselesele, hanga kechi kamona sonyi jenyi).

¹⁶ Iye waakungulwile kuma kuze anavulukako mu Hepreu ngwo, Armangendone.

¹⁷ Mba mungelo wamuchishimbiali wamwangine musenge wenyi ha tetela; mwatuhukile liji linene mu tembele ya mwilu, ku ngunja, ngwo, Hichahwa.

¹⁸ Mba kwapwile mihenyo ni maliji ni kukulunguza, ni kwapwile minyiko yinene ngwe yize kuyapwile hanga atu apwile hashi, minyiko yipwa haha!

¹⁹ Ni limbo Hapulikile yihanda yitatu; ni membo ja mavungu apuzukile: ewulukile Babilonia kumeso ja Zambi, mukunwaha musenge wa vinyu ya ufwatulo wa utenu wenyi.

²⁰ Ni matungu eswe achinyine, ni milundu kayiwanyineko.

²¹ Ni chiwe chinene cha makelekeshi chapezala ngwe makumi asambano a makilo ni makilo atatu yichiholokela mwilu hali atu; ni atu ashililikile Zambi mumu ha lamba lia chiwe; mumu lamba liacho linene liahiana.