Usolwelo 14 - MUKANDA USANDU WA ZAMBI 1975

¹ Mba namwene mwe Mwana-panga, kanamana ha mulundu wa Zaione, ni hamwe nenyi kulakaji lia tununu ni makumi awana a tununu ni tununu awana, kali ni jina lienyi, ni jina lia Tato, linasonewa ha mahuma jo.

² Mba nevwile liji lia kukatuka mwilu, ngwe lundunjila wa meya anji eka ni eka, ngwe liji lia kukulunguza chinene: ni liji lize nevwile ngwe liji lia akwa kwimba tulialia, nikwimba ni tulialia two.

³ O yemba mwaso waha kulutwe lia ngunja, ni kumeso ja akwa mwono awana ni makulwana; niumwe mahasa kulilongesa mwaso uze shina kulakaji lia tununu ni makumi awana a tununu ni tununu awana, waze aalanjile hashi.

⁴ Waze kalichishile ni mapwo; mumu o malunga a kulinanga. Wano waze akukaula mwe Mwana-panga kweswako maya. Wano aalanjile hakachi ka atu ngwe mihuko yitangu kuli Zambi ni kuli mwe Mwana-panga.

⁵ Mu makanwa jo kawanyine mahuza niamwe, keshi kapalia.

⁶ Mba namwene mungelo mukwo kanahumuka mukachi ka lilu, kali ni sango lipema lia mutolo mukwambujola kuli akwa hashi, ku mavungu eswe, ni ku minyachi yeswe, ni ku malimi pswe, ni kuli atu eswe.

⁷ Iye yamba ni liji linene ngwenyi, Ivwenu woma wa Zambi, numuchichimieke; mumu ola ya upatwilo wenyi hiyeza: wayilenu yoze watangile lilu ni hashi ni kalunga-lwiji ni mafuji ja meya.

⁸ Ni mukwo, mungelo wamuchiali, wakawile, ngwenyi, Babilonia yinene hiyapuzuka, hiyapuzuka, yize yanwishine mavungu eswe vinyu ya ufwatulo wa utanji wenyi.

⁹ Ni mungelo mukwo, wamuchitatu, waakawile, kanambe ni liji linene ngwenyi, Kachi umwe mawayila ngongo ni kaponya kenyi, akatambule mufunda wenyi ha huma lienyi, hanji ha kwoko lienyi,

¹⁰ iye nawa kumakanwa vinyu ya ufwatulo wa Zambi, yize hanayilulika chizechene, kayiwezele meya, mu musenge wa utenu wenyi: kumakamumwesa lamba mu kahia ni fundanga kumeso ja angelo asandu ni kumeso ja mwe Mwana-panga.

¹¹ Ni mwishi wa kupinda cho muufwindangana ndo ku miaka yeswe ya mutolo; keshi kuhwima mwalwa ni ufuku, waze akuwayila ngongo ni kaponya kenyi, ni mweswe matambula mufunda wa jina lienyi.

¹² Muno muchili kunyongonona cha asandu, waze akufunga maliji a shimbi a Zambi ni Ufulielo wa Yesu.

¹³ Mba nevwile liji lia kukatuka mwilu ngwo, Soneka ngwe, Kawaha afu aze akufwa muli Mwene, chize ku haliapwila ndo kulutwe: ewa, chocho anambe Spiritu ngwenyi, hanga akahwime ku yikilikita yo; mumu yitanga yo kuyakukaula hamwe no.

¹⁴ Mba namwene, lelwa litoma; ni ha lelwa umwe kanatwama walifwa ni mwe mwana mutu, kali ni chipangula cha oru ha mutwe wenyi, ni mu kwoko lienyi kwengo ya kucha ya kuhela.

¹⁵ Ni mungelo mukwo watuhukile mu tembele, kanakololoka ni liji linene kuli yoze Watwamine ha lelwa ngwenyi, Tumisa kwengo ye ya kucha, Ukache: mumu ola ya kucha hiyeza, mumu kucha cha hashi hichahia naye.

¹⁶ Ni yoze Watwamine ha lelwa, wasele kwengo yenyi ya kucha hashi, achile hashi.

¹⁷ Mungelo mukwo watuhukile mu tembele yize yili mwilu, ni kwengo ya kucha ya kuhela.

¹⁸ Ni mungelo mukwo watuhukile mu chilumbilo, yoze uli ni chiyulo helu lia kahia, watambikile ni liji linene kuli yoze wapwile ni kwengo ya kucha ya kuhela, ngwenyi, Tumisa kwengo ye ya kucha ya kuhela, uhele yilende ya vindera ya hashi: mumu uva yaho yinahi chikolo.

¹⁹ Ni mungelo wasele kwengo yenyi ya kucha hashi, wahetele vindera ya hashi, wanyashine yitende mu ukamino unene wa ufwatulo wa Zambi.

²⁰ Mba aliachile ukamino haze lia limbo, ni manyinga atuhukile mu ukamino, ndo ku makanwa ja tuvwalu, ndo ku kulakaji atatu a kilometro.